ಹಣ ಕದ್ದವನ ಬಂಧಿಸಿದ ಪೊಲೀಸರು

ಕುದೂರು: ಮಾರ್ಚ್ 7ರಂದು ಕುದೂರು ಪೊಲೀಸ್ ಠಾಣಾ ವ್ಯಾಪ್ತಿಯ ಸೋಲೂರು ಹೋಬಳಿಯ ಬಾಣವಾಡಿ ಪೆಟ್ರೋಲ್ ಬಂಕ್ ಬಳಿ ನಡೆದ ಕಳ್ಳತನ ಪ್ರಕರಣದಲ್ಲಿ ತನಿಖೆ ಕೈಗೊಂಡು ಆರೋಪಿಯನ್ನು ಪತ್ತೆ ಹಚ್ಚುವಲ್ಲಿ ಕುದೂರು ಪೊಲೀಸರು ಯಶಸ್ವಿಯಾಗಿದ್ದಾರೆ. ಆರೋಪಿಯಿಂದ ಕಳ್ಳತನ ಮಾಡಿದ್ದ ₹6.40 ಲಕ್ಷ ನಗದು ಹಣ ಹಾಗೂ ಕೃತ್ಯಕ್ಕೆ ಉಪಯೋಗಿಸಿದ ದ್ವಿಚಕ್ರ ವಾಹನವನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ರಾಮನಗರ ಜಿಲ್ಲೆಯ ಪೊಲೀಸ್ ಅಧೀಕ್ಷಕ ಶ್ರೀನಿವಾಸ್ ಗೌಡ, ಅಪರ ಪೊಲೀಸ್ ಅಧೀಕ್ಷಕರಾದ ಸುರೇಶ್, ರಾಮಚಂದ್ರಪ್ಪ ಮಾರ್ಗದರ್ಶನದಲ್ಲಿ ಮಾಗಡಿ ಉಪವಿಭಾಗದ ಪೊಲೀಸ್ ಉಪಾಧ್ಯಕ್ಷಕ ಪ್ರವೀಣ್ ನೇತೃತ್ವದಲ್ಲಿ ಕುದೂರು ಠಾಣೆಯ ಪೊಲೀಸ್ ಇನ್ಸ್ಪೆಕ್ಟರ್ ನವೀನ್ ಹಾಗೂ ಪಿಎಸ್ಐ ಗಳಾದ ಕೃಷ್ಣಮೂರ್ತಿ, ಸರ್ದಾರ್ ಸಾಬ್ ಸಿಬ್ಬಂದಿಗಳಾದ ಸೂರ್ಯ ಕುಮಾರ್, ಗುರುಮೂರ್ತಿ, ಶಿವರಾಜು, ದರ್ಶನ್, ಮಾರುತಿ ಕುಮಾರ್, ಸತೀಶ್, ಲೋಹಿತ್ ನ್ಯಾಮನ್, ಶರಣಬಸು, ಚೇತನ್, ಅಪ್ಪಾಸಾಬ್, ತಾಂತ್ರಿಕ ಸಿಬ್ಬಂದಿ ಮಹಾದೇವಯ್ಯ ನೇತೃತ್ವದ ತಂಡ ವಿವಿಧ ಆಯಾಮಗಳಲ್ಲಿ ತನಿಖೆ ನಡೆಸಿ ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಮಂಡ್ಯ ಜಿಲ್ಲೆ ನಾಗಮಂಗಲ ಪಟ್ಟಣದ ಬಟ್ಟೆ ವ್ಯಾಪಾರಿ ಮಹಮ್ಮದ್ ಇಲಿಯಾಜ್ ಬಂಧಿತ ಆರೋಪಿ.

ಘಟನೆ: ಮಾರ್ಚ್ 7ರಂದು ನಾಗಮಂಗಲದಿಂದ ದಾಬಸ್ ಪೇಟೆ ಕಡೆಗೆ ಹೊರಟಿದ್ದ ಈಚರ್ ವಾಹನದ ಚಾಲಕ ಬಹಿರ್ದೆಸೆಗೆಂದು ಸೋಲೂರು ಹೋಬಳಿಯ ಬಾಣವಾಡಿ ಗ್ರಾಮದ ಪೆಟ್ರೋಲ್ ಬಂಕ್ ಬಳಿ ಹೋಗಿದ್ದಾಗ ಲಾರಿಯಲ್ಲಿದ್ದ ₹7.25 ಲಕ್ಷ ಕಳ್ಳತನವಾಗಿತ್ತು. ಘಟನೆಯು ಪೆಟ್ರೋಲ್ ಬಂಕಿನ ಸಿಸಿ ಕ್ಯಾಮೆರಾದಲ್ಲಿ ಸರಿಯಾಗಿತ್ತು.