ನಗರದಲ್ಲಿ ಕಳೆದೊಂದು ವರ್ಷದಲ್ಲಿ ಮೆಟ್ರೋ ಹಾಗೂ ವಿವಿಧ ಕಾಮಗಾರಿಗಳ ನಿರ್ವಣಕ್ಕಾಗಿ ಒಟ್ಟು 1,293 ಮರಗಳನ್ನು ಕಡಿಯಲು ಪಾಲಿಕೆ ಅನುಮತಿ ನೀಡಿದೆ. 1,110ಕ್ಕೂ ಅಧಿಕ ಉದ್ಯಾನಗಳಿರುವುದರಿಂದ ಉದ್ಯಾನ ನಗರಿ ಎಂಬ ಹೆಗ್ಗಳಿಕೆಗೂ ನಗರ ಪಾತ್ರವಾಗಿದೆ. ಆದರೆ, ಪ್ರತಿವರ್ಷ ವಿವಿಧ ಕಾಮಗಾರಿಗಳ ನಿರ್ಮಾಣ ಮಾಡುವ ದೃಷ್ಟಿಯಿಂದ ಸಾವಿರಕ್ಕೂ ಅಧಿಕ ಮರಗಳನ್ನು ಹನನ ಮಾಡಲಾಗುತ್ತಿದೆ. ಕೆಲವು ದೇಶಗಳಲ್ಲಿ ಪರಿಸರ ಉಳಿಸುವ ಕಾಳಜಿಗೆ ಹೆಚ್ಚು ಮಹತ್ವ ನೀಡಲಾಗಿದ್ದು, ಬಹುತೇಕ ಮರಗಳನ್ನು ಕಡಿಯದೆ ಸ್ಥಳಾಂತರ ಮಾಡುವ ಕಾರ್ಯ ನಡೆಯುತ್ತದೆ. ಆದರೆ, ಐಟಿ-ಬಿಟಿ ಕ್ಷೇತ್ರದಲ್ಲಿ ವಿಶ್ವವ್ಯಾಪಿ ಪ್ರಸಿದ್ಧಿ ಪಡೆದ ನಗರದಲ್ಲಿ ಮರಗಳ ಸ್ಥಳಾಂತರ ಮಾಡಲು ಸೂಕ್ತ ತಂತ್ರಜ್ಞಾನ ಮಾತ್ರ ಲಭ್ಯವಾಗಿಲ್ಲ.
