ಪರಮೇಶ್ವರ ಸಿಎಂ ಆದ್ರೆ ಎಲ್ಲರಿಗೂ ನ್ಯಾಯ

ಬೆಸ್ಕಾಂ ಮಾಜಿ ನಿರ್ದೇಶಕ, ಕಾಂಗ್ರೆಸ್​ ಮುಖಂಡ ಮುಮ್ಮೆನಹಳ್ಳಿ ಜಯರಾಮು ಅನಿಸಿಕೆ

ಮಾಗಡಿ: ಸ್ವಾತಂತ್ರ್ಯಗೊಂಡು ದಶಕಗಳೇ ಕಳೆದರೂ ನಮ್ಮ ಹಕ್ಕು ನಮಗೆ ನೀಡಿಲ್ಲ. ಹಾಗಾಗಿ ಡಾ.ಅಂಬೇಡ್ಕರ್​ ಆಶಯ ಈಡೇರಬೇಕಾದರೆ ಡಾ.ಜಿ.ಪರಮೇಶ್ವರ ಅವರನ್ನು ರಾಜ್ಯದ ಮುಖ್ಯಮಂತ್ರಿ ಮಾಡಬೇಕು. ಅವರ ಪ್ರಾಮಾಣಿಕ ಆಡಳಿತದಿಂದ ರಾಜ್ಯ ಸುಭಿಕ್ಷವಾಗಿರುವುದಲ್ಲದೇ ಎಲ್ಲ ಸಮುದಾಯಗಳಿಗೆ ನ್ಯಾಯ ಸಿಕ್ಕಂತಾಗುತ್ತದೆ ಎಂದು ಬೆಸ್ಕಾಂ ಮಾಜಿ ನಿರ್ದೇಶಕ, ಕಾಂಗ್ರೆಸ್​ ಮುಖಂಡ ಮುಮ್ಮೆನಹಳ್ಳಿ ಬಿ.ವಿ.ಜಯರಾಮು ಹೇಳಿದರು.

ಗೃಹ ಸಚಿವ ಪರಮೇಶ್ವರ ಜನ್ಮದಿನದ ಪ್ರಯುಕ್ತ ಪಟ್ಟಣದ ಸಾರ್ವಜನಿಕ ಸರ್ಕಾರಿ ಆಸ್ಪತ್ರೆಯ ಒಳ ರೋಗಿಗಳಿಗೆ ಹಣ್ಣು, ಪೌರಕಾರ್ಮಿಕರಿಗೆ ಸಮವಸ ವಿತರಿಸಿದರು. ರಾಜಕಾರಣದಲ್ಲಿ ಸಾಕಷ್ಟು ಅನುಭವದ ಜತೆಗೆ ಆಸ್ಟ್ರೆಲಿಯಾದಲ್ಲಿ ಡಾಕ್ಟರೇಟ್​ ಗಳಿಸಿದ ಪರಮೇಶ್ವರ ಅವರು ರಾಜ್ಯದ ಮುಖ್ಯಮಂತ್ರಿಯಾಗಬೇಕು ಎಂಬುದು 7 ಕೋಟಿ ಜನರ ಆಸೆ. ಈ ಆಸೆಯನ್ನು 2028ರೊಳಗೆ ಎಐಸಿಸಿ, ಸಿದ್ದರಾಮಯ್ಯ, ಡಿ.ಕೆ.ಶಿವಕುಮಾರ್​ ಈಡೇರಿಸಬೇಕು ಎಂದರು.

ಪರಮೇಶ್ವರ ಅವರು ಮಾಗಡಿ ತಾಲೂಕಿನವರೇ ಆಗಿದ್ದು, ತಾಲೂಕಿನ ಸರ್ವತೋಮುಖ ಅಭಿವೃದ್ಧಿಗೆ ಅನೇಕ ಶಾಶ್ವತ ಯೋಜನೆಗಳು ಬರುತ್ತಿವೆ ಎಂದು ಜಯರಾಮು ತಿಳಿಸಿದರು.

ದಲಿತ ಮುಖಂಡರಾದ ಚಿಕ್ಕರಾಜು, ರವಿಕುಮಾರು, ಲಕ್ಷ್ಮಣ್​, ಕೃಷ್ಣಮೂರ್ತಿ, ನಾಗರಾಜು, ಲಕ್ಷ್ಮೀಪತಿರಾಜು, ಜೀವಿಕ ಗಂಗಹನುಮಯ್ಯ, ಡಿ.ಸಿ.ಶಿವಣ್ಣ, ಕೋರಮಂಗಲ ಶ್ರೀನಿವಾಸ್​, ಬೀಚನಹಳ್ಳಿ ಸುರೇಶ್​ ಇದ್ದರು.

2 ಬಾರಿ ಅಧಿಕಾರಕ್ಕೆ ತಂದ ಶ್ರೇಯ 

ಡಾ.ಜಿ.ಪರಮೇಶ್ವರ ಅವರು ಮೂರು ದಶಕಗಳಿಂದ ರಾಜಕಾರಣದಲ್ಲಿದ್ದು, ಯಾವುದೇ ಕಪ್ಪು ಚುಕ್ಕೆ ಇಲ್ಲದೆ ಪ್ರಾಮಾಣಿಕ ಸೇವೆ ಸಲ್ಲಿಸಿ, ವಿವಿಧ ಇಲಾಖೆಗಳ ಸಚಿವರಾಗಿ 3ನೇ ಬಾರಿ ಗೃಹಸಚಿವರಾಗಿದ್ದಾರೆ. 8 ವರ್ಷ ಕೆಪಿಸಿಸಿ ಅಧ್ಯಕ್ಷರಾಗಿ, 2 ಬಾರಿ ಪಕ್ಷವನ್ನು ಅಧಿಕಾರಕ್ಕೆ ತಂದಿದ್ದಾರೆ. ಅಲ್ಲದೆ ಈ ಬಾರಿ ವಿಧಾನಸಭಾ ಚುನಾವಣೆ ವೇಳೆಯೂ ಪ್ರಣಾಳಿಕೆ ಸಮಿತಿ ಅಧ್ಯಕ್ಷರಾಗಿದ್ದ ಪರಮೇಶ್ವರ ಅವರು ಪಂಚ ಗ್ಯಾರಂಟಿ ಜಾರಿಗೊಳಿಸಿದ್ದು, 5 ಕೋಟಿ ಜನ ಯೋಜನೆಗಳಿಂದ ಪ್ರಯೋಜನ ಪಡೆಯುತ್ತಿದ್ದಾರೆ ಎಂದು ಜಯರಾಮು ಬಣ್ಣಿಸಿದರು.

ಜಾತ್ಯತಿತ ನಾಯಕ

ತಾಲೂಕು ರೈತಸಂದ ಅಧ್ಯಕ್ಷ ಲೋಕೇಶ್​ ಮಾತನಾಡಿ, ಜಿ.ಪರಮೇಶ್ವರ ಅವರು ಜಾತ್ಯತಿತ, ಪಾತೀತ ರಾಜಕಾರಣಿ. ಅವರಿಗೆ ಉತ್ತಮ ಸ್ಥಾನಮಾನ ಸಿಗಲಿ. ಅದರಂತೆ ಬಿವಿ.ಜಯರಾಮು ಅವರಿಗೂ ಉನ್ನತ ಸ್ಥಾನ ಲಭಿಸಲಿ ಎಂದರು. ತಾಪಂ ಮಾಜಿ ಸದಸ್ಯ ಸಿ.ಜಯರಾಮು ಮಾತನಾಡಿದರು.