ಪಲಿಮಾರು ಸೇತುವೆ ಶಿಥಿಲ : ವಾಹನ ಸಂಚಾರ ನಿಷೇಧ ; ಗಡಿಭಾಗದ ಜನರಿಗೆ ಸಮಸ್ಯೆ

ಹೇಮನಾಥ್ ಪಡುಬಿದ್ರಿ

ದಿನನಿತ್ಯ ಸಾವಿರಾರು ವಾಹನ ಒಡಾಡುತ್ತಿರುವ ಉಡುಪಿ ಮತ್ತು ದ.ಕ. ಜಿಲ್ಲೆಯ ಪ್ರಮುಖ ಸಂಪರ್ಕಕೊಂಡಿ ಪಲಿಮಾರು ಸೇತುವೆ ಶಿಥಿಲಗೊಂಡು ಭಾರಿ ವಾಹನ ಸಂಚಾರ ನಿಷೇಧದಿಂದ ಸೇತುವೆ ಗಡಿಭಾಗದ ಗ್ರಾಮಗಳ ಜನತೆ ಸಮಸ್ಯೆ ಎದುರಿಸುವಂತಾಗಿದೆ. ಮಂಗಳೂರು ತಾಲೂಕು ದಾಮಸ್‌ಕಟ್ಟೆ, ಬಳ್ಕುಂಜೆ ಮೂಲಕ ಉಡುಪಿ ಜಿಲ್ಲೆ ಪಲಿಮಾರು ಗ್ರಾಮ ಮೂಲಕ ಹಾದು ಕಾರ್ಕಳ, ಶಿರ್ವ ರಾಜ್ಯ ಹೆದ್ದಾರಿಗಳ ಸಂಪರ್ಕಕ್ಕೆ ಅನುಕೂಲಕರವಾಗಿ ಪಲಿಮಾರಿನಲ್ಲಿ ಶಾಂಭವಿ ನದಿಗೆ ಅಡ್ಡಲಾಗಿ 1970ರಲ್ಲಿ ಸೇತುವೆ ನಿರ್ಮಿಸಲಾಗಿತ್ತು. 5 ಅಂಕಣಗಳೊಂದಿಗೆ 107.50 ಮೀ.ಉದ್ದ ಹಾಗೂ 7.50 ಮೀ. ಸಂಚಾರ ಪಥವನ್ನೊಂದಿರುವ 54 ವರ್ಷ ಹಳೆಯದಾದ ಸೇತುವೆ ಇದೀಗ ಶಿಥಿಲವಾಗಿದೆ. ಮಂಗಳೂರು ಲೋಕೋಪಯೋಗಿ ಇಲಾಖೆ ವ್ಯಾಪ್ತಿಗೆ ಬರುವ ಈ ಸೇತುವೆ ಶಿಥಿಲವಾಗಿರುವ ಬಗ್ಗೆ ಇಲಾಖೆ ನೀಡಿದ ವರದಿಯಂತೆ ಜೂನ್ 29ರಿಂದ ಭಾರಿ ವಾಹನ ಓಡಾಟ ನಿಷೇಧಿಸಿ ದ.ಕ.ಜಿಲ್ಲಾಧಿಕಾರಿ ಆದೇಶ ಹೊರಡಿಸಿದ್ದರು.

ಬಸ್ ಸಂಚಾರಕ್ಕೆ ಬದಲಿ ಮಾರ್ಗ

ಪಲಿಮಾರು ಸೇತುವೆ ಮೂಲಕ ಚಲಿಸುತ್ತಿದ್ದ ಬಸ್ ಪಲಿಮಾರು ಚರ್ಚ್ ರಸ್ತೆಯಲ್ಲಿ ಸಂಚರಿಸಿ ಇನ್ನಾ ಮುಂಡ್ಕೂರು ರಸ್ತೆಯಲ್ಲಿ ಸಾಗಿ ಮಂಗಳೂರು- ಆತ್ರಾಡಿ ರಾಜ್ಯ ಹೆದ್ದಾರಿಯಲ್ಲಿ ಮಂಗಳೂರಿನತ್ತ ಸಾಗಬೇಕಿದೆ. ಪಲಿಮಾರನತ್ತ ಆಗಮಿಸುವ ಬಸ್‌ಗಳು ಇದೇ ಮಾರ್ಗದಲ್ಲಿ ವಾಪಸ್ ಬರಬೇಕಾಗಿದೆ. ಉಡುಪಿ ಜಿಲ್ಲಾ ವ್ಯಾಪ್ತಿಗೆ ಬರುವ ಪಲಿಮಾರು ಚರ್ಚ್ ರಸ್ತೆ ಅಗಲ ಕಿರಿದಾಗಿದ್ದು, ಈ ಮಾರ್ಗದಲ್ಲಿ ಭಾರಿ ವಾಹನಗಳ ಸಂಚಾರ ಅಪಾಯಕಾರಿಯಾಗುತ್ತಿದೆ.

ವಿದ್ಯಾರ್ಥಿಗಳಿಗೆ ಸಂಕಷ್ಟ

ಹಲವಾರು ಬಸ್‌ಗಳು ಸಂಚರಿಸುವ ಈ ಮಾರ್ಗದಲ್ಲಿ ಭಾರಿ ವಾಹನಗಳ ಓಡಾಟ ನಿಷೇಧದಿಂದ ಬಸನ್ನೇ ಅವಲಂಬಿತ ಕರ್ನಿರೆ, ಬಳ್ಕುಂಜೆ, ಪಲಿಮಾರು, ಅಡ್ವೆ ನಂದಿಕೂರು ಗ್ರಾಮಸ್ಥರು ಹಾಗೂ ಶಾಲಾ ಮಕ್ಕಳು ಸಮಸ್ಯೆ ಎದುರಿಸುವಂತಾಗಿದೆ. ಅದರಲ್ಲೂ ಬಸ್ಸನ್ನೇ ಅವಲಂಬಿತ ಶಾಲಾ ವಿದ್ಯಾಥಿಗಳು ಇದೀಗ ಸುತ್ತು ಬಳಸಿ ಬಸ್ ಅಥವಾ ಆಟೋ ಮೂಲಕ ಶಾಲೆಗಳಿಗೆ ತೆರಳುವಂತಾಗಿದೆ. ಶಾಲಾ ವಾಹನಗಳಲ್ಲಿ ತೆರಳುವ ಈ ಪರಿಸರದ ಮಕ್ಕಳು ಸೇತುವೆ ದಾಟಲು ಬೇರೊಂದು ವಾಹನ ಅವಲಂಬಿಸುವಂತಾಗಿದೆ.

https://www.vijayavani.net/information-camp-on-precautions-to-prevent-dengue-and-chikungunya

https://www.vijayavani.net/yakshagana-kalaranga-yaksha-shikshana-trust-students-training