ರಾಜ್ಯ ಸರ್ಕಾರ ಸಾರಿಗೆ ಬಸ್ಗಳಲ್ಲಿ ಮಹಿಳೆಯರಿಗೆ ಉಚಿತವಾಗಿ ಪ್ರಯಾಣ ಸೌಲಭ್ಯ ಒದಗಿಸುತ್ತಿರುವುದರಿಂದ ನಮ್ಮ ಸಂಸ್ಥೆ ಮೇಲೆ ಪರಿಣಾಮ ಆಗಿಲ್ಲ ಮತ್ತು ವಹಿವಾಟಿಗೂ ಯಾವುದೇ ಧಕ್ಕೆ ಆಗಿಲ್ಲ, ಬದಲಾಗಿ ವಿಫುಲ ಅವಕಾಶಗಳನ್ನು ಸದ್ಬಳಕೆ ಮಾಡಿಕೊಂಡು ಪ್ರಯಾಣಿಕರಿಗೆ ಇನ್ನಷ್ಟು ಸೇವೆ ಒದಗಿಲಾಗುವುದು ಎಂದು ಶಿವ ಸಂಕೇಶ್ವರ ಪ್ರತಿಕ್ರಿಯಿಸಿದರು. ಇದಕ್ಕೆ ದನಿಗೂಡಿಸಿದ ಡಾ. ವಿಜಯ ಸಂಕೇಶ್ವರ ಅವರು ರಾಜ್ಯ ಸರ್ಕಾರದ ಈ ಯೋಜನೆ ಅತ್ಯುತ್ತಮವಾಗಿದೆ. ಮಹಿಳೆಯರಿಗೆ ಆರ್ಥಿಕ ಸದೃಢತೆ ಸಿಕ್ಕಿದೆ. ಪ್ರೀಬೀಸ್ನಿಂದ ಯಾವುದೇ ಸಮಸ್ಯೆ ಉಂಟಾಗಿಲ್ಲ, ನಮ್ಮ ಗ್ರಾಹಕರು ಬೇರೆ ವರ್ಗದಡಿ ಬರುವುದರಿಂದ ಪರಿಣಾಮ ಬೀರಿಲ್ಲ, ದೂರದ ಪ್ರಯಾಣಕ್ಕೆ ಬಸ್ ಸೌಲಭ್ಯ ಉತ್ತಮ ಎಂಬ ಮನೋಭಾವ ಹಲವು ಪ್ರಯಾಣಿಕರಲ್ಲಿದೆ. ಮುಂದೆಯೂ ಇನ್ನಷ್ಟು ಸೌಲಭ್ಯಗಳು ಕೈಗೆಟಕುವ ಹಿನ್ನೆಲೆಯಲ್ಲಿ ಬಸ್ ಸೇವೆ ಮತ್ತಷ್ಟು ವಿಸ್ತರಣೆ ಆಗಲಿದೆ ಎಂದರು. ವೋಲ್ವೊ ಕಂಪನಿ ತಯಾರಿಸುವ ಬಸ್ಗಳು ವಿಶ್ವದರ್ಜೆಯನ್ನು ಹೊಂದಿವೆ. ಸುರಕ್ಷತೆ ಸೇರಿ ಇತರ ಸೌಲಭ್ಯಗಳು ಪ್ರಯಾಣಿಕರ ಸ್ನೇಹಿಯಾಗಿವೆ, ವಿಜಯಾನಂದ ಅದೆಲ್ಲ ಹಾಗೂ ವೋಲ್ವೊ ಮಧ್ಯೆ 20 ವರ್ಷಗಳ ಸಂಬಂಧ ಇದೆ. ಬಸ್ಗಳ ತಯಾರಿಕೆ, ವಿನ್ಯಾಸ ಹಾಗೂ ತಾಂತ್ರಿಕತೆಯಲ್ಲಿ ವೋಲ್ವೊಗೆ ಬೇರೆ ಯಾರು ಸರಿಸಾಟ ಇಲ್ಲ. ಆ ಸಂಸ್ಥೆ ತಯಾರಿಸುವ ಹೊಸ ಮಾದರಿಯ ಬಸ್ಗಳನ್ನು ನಾವು ಖರೀದಿಸಿ ಪ್ರಯಾಣಿಕರ ಸೇವೆಗೆ ನೀಡಿದ್ದೇವೆ. ಮುಂದೆಯೂ ಕೂಡ ಭಾರತೀಯ ಗ್ರಾಹಕರಿಗೆ ಇನ್ನಷ್ಟು ಅನುಕೂಲ ಕಲ್ಪಿಸಲು ವೋಲ್ವೊ ಮುಂದಾಗಲಿದೆ ಎಂಬ ವಿಶ್ವಾಸ ಇದೆ ಎಂದು ಡಾ. ವಿಜಯ ಸಂಕೇಶ್ವರ ತಿಳಿಸಿದರು.
