2022ರ ನ.5ರಂದು ಯೋಜನೆಗೆ ಅನುಮೋದನೆ ಸಿಕ್ಕಿತ್ತು. 2023ರ ಜೂನ್ನಿಂದ ಎಲ್ಲ ಮಾದರಿಯ ಖನಿಜ, ಉಪ ಖನಿಜ ಸಾಗಿಸುವ ಲಾರಿಗಳಿಗೆ ಜಿಪಿಎಸ್ (ಗ್ಲೋಬಲ್ ಪೊಸಿಷನಿಂಗ್ ಸಿಸ್ಟಂ) ಅಳವಡಿಸುವ ಕಾರ್ಯ ಶುರುವಾಗಿದೆ. ಈವರೆಗೆ 53,722 ಲಾರಿಗಳು ನೋಂದಣಿಯಾಗಿವೆ. ರಾಜ್ಯದಲ್ಲಿ ಅಂದಾಜು 2 ಲಕ್ಷ ವಾಹನಗಳಿದ್ದು, ಬಳ್ಳಾರಿಯಲ್ಲಿ ಅತಿ ಹೆಚ್ಚು ಅಂದರೆ 16,526 ಲಾರಿಗಳು ನೋಂದಣಿಯಾಗಿವೆ. ಗಣಿ ಗುತ್ತಿಗೆದಾರರು ಮತ್ತು ಲಾರಿ ಮಾಲೀಕರು ಶಾಮೀಲಾಗಿ ಒಂದು ಟ್ರಿಪ್ಗೆ ಪರವಾನಗಿ ಪಡೆದು ಹತ್ತಾರು ಟ್ರಿಪ್ ಹೊಡೆಯುತ್ತಿದ್ದರು. ಬೆಂಗಳೂರಿನಿಂದ ಮೈಸೂರಿಗೆ ಮರಳು ಸಾಗಣೆ ಮಾಡಬೇಕಿದ್ದರೆ,ಲಾರಿ ಮಾಲೀಕರು ಚಾಮರಾಜನಗರಕ್ಕೆ ಪರ್ಮಿಟ್ ತೋರಿಸುತ್ತಿದ್ದರು. ಈ ಅವಧಿಯಲ್ಲಿ ನಾಲ್ಕೈದು ಟ್ರಿಪ್ಗಳನ್ನು ಬೇರೆ ಬೇರೆ ಸ್ಥಳಗಳಿಗೆ ಸಾಗಣೆ ಮಾಡುತ್ತಿದ್ದರು. ಇದರಿಂದ ಸರ್ಕಾರಕ್ಕೆ ಕೋಟ್ಯಂತರ ರೂ. ಆದಾಯ ಖೋತಾ ಆಗುತ್ತಿತ್ತು. ಈಗ ಜಿಪಿಎಸ್ ತಂತ್ರಜ್ಞಾನ ಅಳವಡಿಕೆ ನಂತರ ಅಕ್ರಮ ನಿಂತಿದೆ ಎಂದು ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
