ತಾಲೂಕಿನ ತಿಮ್ಮಾಪುರ ಗ್ರಾಮದ ಇಂದ್ರಮ್ಮ ಚಿಕ್ಕಳ್ಳಿ ಪರಿಹಾರದಿಂದ ವಂಚಿತಗೊಂಡ ವೃದ್ಧೆ. ಇವರು 2019-20ನೇ ಸಾಲಿನಲ್ಲಿ ಬೆಳೆ ಹಾನಿ ಪರಿಹಾರಕ್ಕೆ ತಹಸೀಲ್ದಾರ್ ಕಚೇರಿಗೆ ಅರ್ಜಿ ಸಲ್ಲಿಸಿದ್ದರು. ಬಳಿಕ ಕಂದಾಯ, ತೋಟಗಾರಿಕೆ, ಕೃಷಿ ಇಲಾಖೆ, ಗ್ರಾಮ ಪಂಚಾಯಿತಿ, ತಾಲೂಕಿನ ನೋಡಲ್ ಅಧಿಕಾರಿ ಸೇರಿದಂತೆ ಐದು ಜನರ ತಂಡ ಬೆಳೆ ಪರಿಶೀಲಿಸಿತ್ತು. ಜಿಪಿಎಸ್ ಮಾಡಿಕೊಂಡು, ತೀವ್ರ ಮಳೆಗೆ ಹಾನಿಗೊಂಡ ಬೆಳೆಗೆ ಶೇಕಡವಾರು ಹಾನಿ ಅಂದಾಜು ನಮೂದಿಸಿ, ಪರಿಹಾರ ಮಂಜೂರಾತಿಗೆ ಶಿಫಾರಸು ನೀಡಿತ್ತು. ತಹಸೀಲ್ದಾರ್ ಕಾರ್ಯಾಲಯ ಸಿಬ್ಬಂದಿ ಆಧಾರ, ಪಾಸ್ ಬುಕ್ ಪಡೆದಿದ್ದಾರೆ. ಆದರೆ, ಕೃಷಿ ಇಲಾಖೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ರೈತ ಅನುವುಗಾರನ ಹೆಸರಿಗೆ ಗ್ರಾಮಲೆಕ್ಕಾಧಿಕಾರಿಯೊಬ್ಬರು ತನ್ನ ಲಾಗಿನ್ನಿಂದ ಹಣ ಜಮೆ ಮಾಡಿ ವೃದ್ಧೆಗೆ ಮೋಸವೆಸಗಿದ್ದಾರೆ. ಈ ವಂಚನೆಯು ತೀವ್ರ ಚರ್ಚೆಗೂ ಕಾರಣವಾಗಿತ್ತು. ಬಳಿಕ ಆಗಿನ ಆಪರ ಜಿಲ್ಲಾಧಿಕಾರಿಯವರು ಗ್ರಾಮಲೆಕ್ಕಾಧಿಕಾರಿ ವಿರುದ್ಧ ಪೊಲೀಸ್ ಪ್ರಕರಣ ದಾಖಲಿಸಿದ್ದರು. ಆದರೆ, ಆರೋಪಿತನ ಅಮಾನತು ಸಹ ಆಗಿಲ್ಲ; ಬದಲಾಗಿ ಬೇರೆ ಸ್ಥಳಕ್ಕೆ ನಿಯೋಜಿಸಲಾಗಿದೆ.
