ರಾಜ್ಯ, ಕೇಂದ್ರ ಸಚಿವರಿಂದಲೂ ಆಕ್ಷೇಪ: ಶಂಕುಸ್ಥಾಪನೆ ನಂತರ ಜಾಗದ ಬದಲಾವಣೆ ವಿಚಾರಗಳ ಹಿಂದೆ ಅನೇಕ ಊಹಾಪೋಹಗಳು ಎದ್ದಿವೆ. ಕಾಲೇಜ್ ಶಂಕುಸ್ಥಾಪನೆ ಕಾರ್ಯಕ್ರಮಕ್ಕೆ ಬಂದಿದ್ದ ವೈದ್ಯಕೀಯ ಶಿಕ್ಷಣ ಸಚಿವ ಡಾ. ಸುಧಾಕರ, ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ಅವರು ಈ ಜಾಗವು ನಗರ, ಜಿಲ್ಲಾಸ್ಪತ್ರೆ ಹಾಗೂ ಹೆದ್ದಾರಿಯಿಂದ ದೂರದಲ್ಲಿರುವ ಕುರಿತು ಅಪಸ್ವರ ಎತ್ತಿದ್ದರಂತೆ. ಅಲ್ಲದೆ, ಡಾ. ಸುಧಾಕರ ಅವರು ಇಲ್ಲಿ ಕಾಲೇಜ್ ನಿರ್ವಿುಸಿದರೆ ಎಂಸಿಐ (ಮೆಡಿಕಲ್ ಕೌನ್ಸಿಲ್ ಆಫ್ ಇಂಡಿಯಾ)ನವರು ಮುಂದೆ ವಿರೋಧ ವ್ಯಕ್ತಪಡಿಸುವ ಸಾಧ್ಯತೆಯಿದೆ. ಸರ್ಕಾರದ ದುಡ್ಡು ಪೋಲಾಗುವುದು ಸರಿಯಲ್ಲ. ಸೂಕ್ತ ಸ್ಥಳ ಗುರುತಿಸುವಂತೆ ಜಿಲ್ಲಾಡಳಿತಕ್ಕೆ ಸೂಚನೆ ನೀಡಿದ್ದರಂತೆ. ಹೀಗಾಗಿ, ಈಗ ಸ್ಥಳ ಬದಲಾವಣೆಯ ವಿಚಾರ ಮತ್ತೆ ಮುನ್ನಲೆಗೆ ಬಂದಿದೆ ಎಂಬ ಮಾತು ಕೇಳಿಬರತೊಡಗಿವೆ. ಸಾರ್ವಜನಿಕರು ಹಾಗೂ ಸ್ಥಳೀಯ ಶಾಸಕರು ಮೊದಲೇ ಎತ್ತಿದ್ದ ಆಕ್ಷೇಪಕ್ಕೆ ಇದೀಗ ಮತ್ತಷ್ಟು ಬಲ ಬಂದಿದೆ. ಜನರ ಅನುಕೂಲತೆಯ ದೃಷ್ಟಿಯಿಂದ ಈ ಸಾರಿ ಕಾಲೇಜ್ ದೇವಗಿರಿ-ಯಲ್ಲಾಪುರದಿಂದ ನೆಲೋಗಲ್ಲ ಗುಡ್ಡಕ್ಕೆ ಸ್ಥಳಾಂತರಗೊಳ್ಳುವ ಆಶಾಭಾವನೆ ಈ ಹಿಂದೆ ವಿರೋಧ ವ್ಯಕ್ತಪಡಿಸಿದವರಲ್ಲಿ ಮೂಡಿದೆ.
