ಮಹಿಳಾ ಕಾಲೇಜಿನಲ್ಲಿಲ್ಲ ಸವಲತ್ತು

ಹಿರೇಕೆರೂರ: ಹಾವೇರಿಯ ಜಿಲ್ಲೆಯ ಏಕೈಕ ಸರ್ಕಾರಿ ಮಹಿಳಾ ಐಟಿಐ ಕಾಲೇಜ್ ಮೂಲಸೌಕರ್ಯಗಳಿಂದ ಬಳಲುತ್ತಿದ್ದು, ವಿದ್ಯಾರ್ಥಿಗಳು ಶಿಕ್ಷಣ ಪಡೆಯಲು ಹಿಂದೇಟು ಹಾಕುತ್ತಿದ್ದಾರೆ.
ಪಟ್ಟಣದ ಬಸವೇಶ್ವರ ನಗರದ ಬಾಡಿಗೆ ಕಟ್ಟಡದಲ್ಲಿ 2007-08ರಲ್ಲಿ ಕಾಲೇಜ್ ಕಾರ್ಯಾರಂಭಿಸಿತು. ಹೆಸರಿಗೆ ಮಾತ್ರ ಮಹಿಳಾ ಕಾಲೇಜ್. ಇಲ್ಲಿ ಪುರುಷ ವಿದ್ಯಾರ್ಥಿಗಳೂ ಕಲಿಯುತ್ತಿದ್ದಾರೆ. ಇಲೆಕ್ಟ್ರಿಷಿಯನ್, ಮೆಕಾನಿಕಲ್, ಐಸಿಟಿಎಸ್​ಎಂ ಹಾಗೂ ಹೊಲಿಗೆ ತರಬೇತಿ ಕೋಸ್​ಗಳಿದ್ದು, ಒಟ್ಟು 120 ವಿದ್ಯಾರ್ಥಿಗಳಿಗೆ ಪ್ರವೇಶವಿದೆ. ಪ್ರಸ್ತುತ 136 ವಿದ್ಯಾರ್ಥಿಗಳು ಶಿಕ್ಷಣ ಪಡೆಯುತ್ತಿದ್ದಾರೆ. ಹೊಲಿಗೆ ತರಬೇತಿ ಕೋರ್ಸ್​ಗೆ ಶಿಕ್ಷಕರು ಇಲ್ಲದ ಕಾರಣ ಯಾರೊಬ್ಬರೂ ಪ್ರವೇಶ ಪಡೆದಿಲ್ಲ.
ಸ್ಥಳಾವಕಾಶ ಕೊರತೆ:
ಕಾಲೇಜಿಗೊಂದು ನಾಮಫಲಕವಿಲ್ಲ. ಸ್ಥಳಾವಕಾಶದ ಕೊರತೆಯಿಂದಾಗಿ ಪ್ರಾಯೋಗಿಕ ಯಂತ್ರಗಳು ಮೂಲೆ ಸೇರಿವೆ. ವಿದ್ಯುತ್ ವ್ಯವಸ್ಥೆ ಸಮರ್ಪಕವಾಗಿಲ್ಲ. ಜನರೇಟರ್ ಬಳಸುತ್ತಿಲ್ಲವಾದ್ದರಿಂದ ಮೂಲೆಗುಂಪಾಗಿದೆ. ಕೊಠಡಿಗಳು ಚಿಕ್ಕದಾಗಿದ್ದು, ಆಸನಗಳ ವ್ಯವಸ್ಥೆ ಸರಿಯಾಗಿಲ್ಲ. ಕುಡಿಯುವ ನೀರಿನ ಸೌಲಭ್ಯವಿಲ್ಲ. ಸ್ವಚ್ಛತೆ ಮರಿಚಿಕೆಯಾಗಿದೆ. ಶೌಚಗೃಹಗಳು ದುರ್ನಾತ ಬೀರುತ್ತಿವೆ. ಪ್ರತ್ಯೇಕ ಪ್ರಯೋಗಾಲಯವಿಲ್ಲ. ತರಬೇತಿ ಸಾಮಗ್ರಿಗಳು ಇಲ್ಲ, ಮುಖ್ಯವಾಗಿ ಬೋಧನಾ ಫಲಕಗಳು ಹಾಳಾಗಿವೆ.
ಒಟ್ಟು 26 ಹುದ್ದೆಗಳ ಪೈಕಿ ಒಬ್ಬರು ಕಚೇರಿ ಅಧೀಕ್ಷಕ, ಒಬ್ಬರು ಪ್ರಥಮ ದರ್ಜೆ ಸಹಾಯಕ, ಒಬ್ಬರು ದ್ವಿತಿಯ ದರ್ಜೆ ಸಹಾಯಕ, ಮೂವರು ಕಿರಿಯ ತರಬೇತಿ ಅಧಿಕಾರಿಗಳು ಕಾರ್ಯನಿರ್ವಹಿಸುತ್ತಿದ್ದು, 20 ಹುದ್ದೆಗಳು ಖಾಲಿ ಇವೆ.
ಆಡಳಿತಾಧಿಕಾರಿ ಹಾಗೂ ಪ್ರಾಚಾರ್ಯರು ಪ್ರಭಾರಿಯಾಗಿದ್ದು, ಬನವಾಸಿ, ಸಿದ್ದಾಪುರ ಹಾಗೂ ಹಿರೇಕೆರೂರಿನಲ್ಲಿ ಮೂರು ಕಾಲೇಜಿನಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಉಳಿದಂತೆ ಪ್ರ.ದ.ಸ 2, ದ್ವಿ.ದ.ಸ 1, ತರಬೇತಿ ಅಧಿಕಾರಿ 1, ಕಿರಿಯ ತರಬೇತಿ ಅಧಿಕಾರಿ 09, ಗ್ರುಪ್ ಡಿ 2, ವರ್ಕ್​ಶಾಪ್ 3 ಸೇರಿ ಒಟ್ಟು 20 ಹುದ್ದೆಗಳು ಖಾಲಿ ಇವೆ. ಇದರಿಂದ ವಿದ್ಯಾರ್ಥಿಗಳ ಶಿಕ್ಷಣದ ಮೇಲೆ ವ್ಯತಿರಕ್ತ ಪರಿಣಾಮ ಬೀರುತ್ತಿದೆ.