ಪಿಯು ಅತಿಥಿ ಉಪನ್ಯಾಸಕರಿಗೂ ಐದು ತಿಂಗಳಿನಿಂದಲೂ ಬಾರದ ವೇತನ !

ವಿಶೇಷ ವರದಿ

ತುಮಕೂರು: ಸೇವೆ ಕಾಯಂಮಾತಿ ಹಾಗೂ ಸೇವಾಭದ್ರತೆಗೆ ಆಗ್ರಹಿಸಿ ಸರ್ಕಾರಿ ಪ್ರಥಮದರ್ಜೆ ಕಾಲೇಜುಗಳ ಅತಿಥಿ ಉಪನ್ಯಾಸಕರ ಹೋರಾಟ ಬೆನ್ನಲ್ಲೇ ಜಿಲ್ಲೆಯ ಸರ್ಕಾರಿ ಪದವಿ ಪೂರ್ವ ಕಾಲೇಜುಗಳ ಅತಿಥಿ ಉಪನ್ಯಾಸಕರು ಕಳೆದ ಐದು ತಿಂಗಳಿನಿಂದ ವೇತನ ನೀಡದ ಬಗ್ಗೆ ಧ್ವನಿಎತ್ತಿದ್ದಾರೆ.

ಜಿಲ್ಲೆಯಲ್ಲಿ 324 ಅತಿಥಿ ಉಪನ್ಯಾಸಕರು ಸೇವೆ ಸಲ್ಲಿಸುತ್ತಿದು ಕಳೆದ ಆಗಸ್ಟ್‌ನಿಂದ ಪ್ರತೀ ತಿಂಗಳ ವೇತನ ರೂಪವಾಗಿ 12 ಸಾವಿರ ರೂ., ಗೌರವಧನವನ್ನು ನೀಡಿಲ್ಲ. ಪದವಿಪೂರ್ವ ಶಿಕ್ಷಣ ಇಲಾಖೆ ರಾಜ್ಯದ ಬೇರೆ ಜಿಲ್ಲೆಗಳ ಅತಿಥಿ ಉಪನ್ಯಾಸಕರ ಗೌರವಧನವನ್ನು ಅಕ್ಟೋಬರ್‌ವರೆಗೆ ಬಿಡುಗಡೆ ಮಾಡಿದ್ದು ಜಿಲ್ಲೆಯ ಉಪನ್ಯಾಸಕರಿಗೆ ನೀಡಿಲ್ಲದಿರುವುದು ಇದೀಗ ಬೆಳಕಿಗೆ ಬಂದಿದೆ. ಇದರಲ್ಲಿ ಕೆಲವರಿಗೆ ಜೂನ್ ತಿಂಗಳಿನಿಂದಲೇ ಗೌರವಧನ ಬಂದಿಲ್ಲದಿರುವುದು ಅತಿಥಿ ಉಪನ್ಯಾಸಕರನ್ನು ಸರ್ಕಾರ ನಡೆಸಿಕೊಳ್ಳುತ್ತಿರುವುದಕ್ಕೆ ನಿದರ್ಶನವೆನಿಸಿದೆ.

74 ಸರ್ಕಾರಿ ಕಾಲೇಜು: ಜಿಲ್ಲೆಯಲ್ಲಿ 74 ಸರ್ಕಾರಿ ಪದವಿ ಪೂರ್ವ ಕಾಲೇಜುಗಳಿದ್ದು ಪ್ರಥಮ, ದ್ವಿತೀಯ ಪಿಯುಸಿಯಲ್ಲಿ ಒಟ್ಟು 26 ಸಾವಿರಕ್ಕು ಹೆಚ್ಚು ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ. 324 ಅತಿಥಿ ಉಪನ್ಯಾಸಕರು ಜಿಲ್ಲೆಯ ವಿವಿಧ ಕಾಲೇಜುಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದು ನಿರ್ದಿಷ್ಟ ಖಾಲಿ ಹುದ್ದೆಗಳಿಗೆ ನೇಮಿಸಿಕೊಂಡಿರುವರಿಗೆ ಮಾತ್ರ ಮೊದಲೆರಡು ತಿಂಗಳ ಗೌರವಧನ ನೀಡಲಾಗಿದೆ. ಆದರೆ, ಹೆಚ್ಚುವರಿ ಹಾಗೂ ಹುದ್ದೆ ಮಂಜೂರಾಗದ ಕಾಲೇಜುಗಳಲ್ಲಿ ಆರಂಭಿಸಿರುವ ಹೊಸ ಕೋರ್ಸ್ ಇರುವ ಕಡೆ ನೇಮಿಸಿಕೊಂಡಿರುವ ಅತಿಥಿ ಉಪನ್ಯಾಸಕರಿಗೂ ಈಗ ಗೌರವಧನ ನೀಡಲು ಮೀನಮೇಷ ಎಣಿಸಲಾಗುತ್ತಿದೆ. ಕೆಲವರಿಗೆ ಜೂನ್‌ನಿಂದಲೇ ಗೌರವಧನ ಬಂದಿಲ್ಲ. ಇನ್ನು ಉಳಿದವರಿಗೆ ಆಗಸ್ಟ್‌ನಿಂದ ಗೌರವಧನ ನೀಡಿಲ್ಲ.