ದೂರದಿಂದಲೇ ದೂರು ಸ್ವೀಕಾರ

ವಿಜಯವಾಣಿ ಸುದ್ದಿಜಾಲ ರಾಣೆಬೆನ್ನೂರ

ಕರೊನಾ ಸೋಂಕು ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇನ್ಮುಂದೆ ಪೊಲೀಸ್ ಠಾಣೆಗಳಿಗೆ ಸಾರ್ವಜನಿಕರು ಮಾತ್ರವಲ್ಲ ಪೊಲೀಸ್ ಕಾನ್​ಸ್ಟೇಬಲ್​ಗಳೂ ಒಳಗೆ ಪ್ರವೇಶ ಮಾಡುವಂತಿಲ್ಲ.

ರಾಜ್ಯದ ವಿವಿಧೆಡೆ ಪೊಲೀಸರಿಗೆ ಸೋಂಕು ತಗಲಿರುವ ಹಿನ್ನೆಲೆಯಲ್ಲಿ ಸರ್ಕಾರದ ಸೂಚನೆ ಮೇರೆಗೆ ಇಲ್ಲಿಯ ಶಹರ, ಗ್ರಾಮೀಣ, ಸಂಚಾರ, ಹಲಗೇರಿ ಹಾಗೂ ಕುಮಾರಪಟ್ಟಣ ಸೇರಿ 5 ಪೊಲೀಸ್ ಠಾಣೆಗಳ ಒಳಗೆ ಸಾರ್ವಜನಿಕರಿಗೆ ಪ್ರವೇಶ ನಿರ್ಬಂಧಿಸಲಾಗಿದೆ. ಅಲ್ಲದೆ, ಕರೊನಾ ಸೋಂಕು ಪ್ರಕರಣ ಕಂಡು ಬಂದ ಪ್ರದೇಶದಲ್ಲಿ ಬಂದೋಬಸ್ತ್ ಕರ್ತವ್ಯ ನಿರ್ವಹಿಸುವ ಸಿಬ್ಬಂದಿ ಠಾಣೆಗೆ ಬರದಂತೆ ಸೂಚಿಸಲಾಗಿದೆ.

ಸಿಬ್ಬಂದಿಗೆ ಕರ್ತವ್ಯದ ವಿವರ ನೀಡುವುದಕ್ಕಾಗಿ ವಾಟ್ಸ್​ಆಪ್ ಗ್ರುಪ್ ಮಾಡಿಕೊಳ್ಳಲಾಗಿದ್ದು, ಸಿಬ್ಬಂದಿಗೆ ವಾಟ್ಸ್​ಆಪ್ ಮೂಲಕವೇ ಯಾವ ಪ್ರದೇಶದಲ್ಲಿ ಕರ್ತವ್ಯಕ್ಕೆ ನಿಯೋಜನೆಗೊಳ್ಳಬೇಕು ಎಂದು ಸೂಚಿಸಲು ವ್ಯವಸ್ಥೆ ಮಾಡಿಕೊಳ್ಳಲಾಗಿದೆ. ಅಲ್ಲದೆ, ವಾಟ್ಸ್​ಆಪ್ ಇಲ್ಲದ ಸಿಬ್ಬಂದಿಗಾಗಿ ನೋಟಿಸ್ ಬೋರ್ಡ್ ಮೇಲೆ ಕರ್ತವ್ಯದ ವಿವರ ತಿಳಿಸಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಈ ಮೂಲಕ ಸಾಮೂಹಿಕ ಕರ್ತವ್ಯ ನೇಮಿಸುವುದನ್ನು ಕೈ ಬಿಡಲಾಗಿದೆ.

ದೂರು ಪ್ರತಿ ಸಹ ತರುವಂತಿಲ್ಲ: ಸಾರ್ವಜನಿಕರು ಪೊಲೀಸರಿಗೆ ದೂರು ಪ್ರತಿ ಸಹ ನೀಡುವಂತಿಲ್ಲ. ಬದಲಾಗಿ ಠಾಣೆ ಕಾಂಪೌಂಡ್ ಎದುರು ನಿಯೋಜಿಸಲಾದ ಸಿಬ್ಬಂದಿ ಮುಂದೆ ದೂರು-ಅಹವಾಲು ಹೇಳಿಕೊಳ್ಳಬೇಕು. ಪೊಲೀಸರು ವಿಚಾರಣೆ ನಡೆಸಿ, ದೂರು ಸ್ವೀಕಾರ ಮಾಡಬೇಕಾದರೆ ಸ್ಯಾನಿಟೈಸರ್ ಹಾಕಿದ ಪೇಪರ್​ನಲ್ಲಿ ಅವರೇ ದೂರು ಬರೆದುಕೊಳ್ಳುತ್ತಾರೆ.

ಗಂಭೀರ ಪ್ರಕರಣ ಅಥವಾ ತುರ್ತಾಗಿ ದೂರು ದಾಖಲಿಸಿಕೊಳ್ಳಬೇಕಾದ ಸಂದರ್ಭ ಎದುರಾದರೆ ಅಂತಹ ಪ್ರಕರಣಕ್ಕೆ ಸಂಬಂಧಿಸಿದ ಒಬ್ಬರನ್ನು ತಪಾಸಣೆ ನಡೆಸಿ, ಸ್ಯಾನಿಟೈಸರ್ ಹಾಕಿ ಒಳಗಡೆ ಕರೆದುಕೊಳ್ಳುವ ವ್ಯವಸ್ಥೆ ಮಾಡಲಾಗಿದೆ.