ಮಳೆ ನೀರಿಗೆ ಸೋರಿಕೆ, ನೆಲ್ಲೂಡಿ ಗ್ರಾಪಂ ಕಟ್ಟಡ ನಿರ್ಮಾಣ ಯಾವಾಗ ?

ಕಂಪ್ಲಿ: ತಾಲೂಕಿನ ನೆಲ್ಲೂಡಿ ಗ್ರಾಮ ಪಂಚಾಯಿತಿ ಕಟ್ಟಡ ಶಿಥಿಲಗೊಂಡಿದ್ದು, ಮಳೆ ನೀರಿಗೆ ಸೋರುತ್ತಿದೆ. 2002-03ನೇ ಸಾಲಿನಲ್ಲಿ ಕುರುಗೋಡು ಶಾಸಕ ಅಲ್ಲಂ ವೀರಭದ್ರಪ್ಪ ಗ್ರಾಪಂ ಕಟ್ಟಡವನ್ನು ಉದ್ಘಾಟಿಸಿ ಚಾಲನೆಗೊಳಿಸಿದ್ದರು. ಇದೀಗ ಎರಡು ದಶಕಗಳ ಮೇಲ್ಚಾವಣಿ ಶಿಥಿಲಗೊಂಡು ಮಳೆ ನೀರು ಸೋರುತ್ತಿದೆ.

ಇದನ್ನೂ ಓದಿ: ಅಂಗನವಾಡಿ ಕೇಂದ್ರದ ಕಟ್ಟಡ ಶಿಥಿಲ; ಆತಂಕದಲ್ಲಿ ನೆಲ್ಲೂಡಿ ಗ್ರಾಮದ ಮಕ್ಕಳ ಕಲಿಕೆ

ಸಿಮೆಂಟ್ ಉದುರುತ್ತಿದೆ. ಮಳೆನೀರು ಸೋರಿ ದಾಖಲೆ ಹಾಗೂ ಕಂಪ್ಯೂಟರ್ ರಕ್ಷಣಾ ವ್ಯವಸ್ಥೆಗೆ ತೊಂದರೆಯಾಗಿದೆ. ರಸ್ತೆಗಿಂತ ಕೆಳಮಟ್ಟದಲ್ಲಿ ಕಟ್ಟಡ ಇದ್ದು ಮಳೆ ನೀರು ನುಗ್ಗುತ್ತದೆ. ಗ್ರಾಪಂಗೆ ಹೊಸ ಕಟ್ಟಡ ನಿರ್ಮಿಸುವಂತೆ ಗ್ರಾಮಸ್ಥರು ಅನೇಕ ಬಾರಿ ಒತ್ತಾಯಿಸಿದ್ದರೂ ನೂತನ ಗ್ರಾಪಂ ಕಟ್ಟಡ ನಿರ್ಮಾಣಕ್ಕೆ ಮುಹೂರ್ತ ಕೂಡಿ ಬರುತ್ತಿಲ್ಲ.

ಶಿಥಿಲಗೊಂಡ ಕಟ್ಟಡವನ್ನು ತೆರವುಗೊಳಿಸಿ, ಅದೇ ಸ್ಥಳದಲ್ಲಿ ಹೊಸ ಕಟ್ಟಡ ನಿರ್ಮಿಸುವ ಅಗತ್ಯತೆಯಿದೆ. ಆದರೆ ಗ್ರಾಪಂ ಸದಸ್ಯರು ಸಭೆಯಲ್ಲಿ ಚರ್ಚಿಸಿ, ಈಗಿರುವ ಕಟ್ಟಡದ ಹಿಂದೆ ಐದುಸೆಂಟ್ಸ್ ಜಾಗ ತೆಗೆದುಕೊಂಡು ಅಲ್ಲಿ ಹೊಸ ಕಟ್ಟಿಸಬೇಕು. ಹಳೆಯ ಕಟ್ಟಡ ತೆರವು ಸ್ಥಳವನ್ನು ಆವರಣ, ವಾಹನ ನಿಲುಗಡೆಗೆ ವ್ಯವಸ್ಥೆ ಮಾಡಿಕೊಳ್ಳಬೇಕು ಎನ್ನುವ ಚಿಂತನೆಯಲ್ಲಿದ್ದಾರೆ.