ಅವಧೂತ ದತ್ತ ಪೀಠದಿಂದ ಸಂಸ್ಕೃತ ಕೋರ್ಸ್‌ಗಳಿಗೆ ಚಾಲನೆ

ದತ್ತ ಪೀಠದ ಪ್ರಮುಖ ಅಂಗ ಸಂಸ್ಥೆಗಳಾದ ಎಸ್‌ಜಿಎಸ್ ವೇದನಿಧಿ ಅಕಾಡೆಮಿ ಮತ್ತು ಮಾಸ್ಟರ್ಸ್ ಇನ್‌ಸ್ಟಿಟ್ಯೂಟ್, ಕೇಂದ್ರ ಸಂಸ್ಕೃತ ವಿಶ್ವವಿದ್ಯಾಲಯದ ಸಹಯೋಗದೊಂದಿಗೆ ಈ ಕೋರ್ಸ್‌ಗಳನ್ನು ಪ್ರಾರಂಭಿಸಲಾಗಿದೆ.

ಶ್ರೀ ಗಣಪತಿ ಸಚ್ಚಿದಾನಂದ ಸ್ವಾಮೀಜಿ ಹಾಗೂ ಎಸ್‌ಜಿಎಸ್ ವೇದನಿಧಿ ಅಕಾಡೆಮಿಯ ಗೌರವಾನ್ವಿತ ಅಧ್ಯಕ್ಷರಾದ ಶ್ರೀದತ್ತ ವಿಜಯಾನಂದ ತೀರ್ಥ ಸ್ವಾಮೀಜಿ ದೀಪ ಬೆಳಗಿಸಿ, ಫಲಕವನ್ನು ಅನಾವರಣಗೊಳಿಸುವ ಮೂಲಕ ಕಾರ್ಯಕ್ರವಕ್ಕೆ ಚಾಲನೆ ನೀಡಿದರು.

ಸಂಸ್ಕೃತ, ಶಾಸ್ತ್ರಗಳು ಹಾಗೂ ಸಂಬಂಧಿತ ವಿಷಯಗಳನ್ನು ಕಲಿಯಲು ಆಸಕ್ತಿ ಇರುವ ಯಾರು ಬೇಕಾದರೂ ಈ ಕೋರ್ಸ್‌ಗಳಿಗೆ ಸೇರಬಹುದಾಗಿದೆ. ಸಂಸ್ಕೃತ ಡಿಪ್ಲೋಮಾ ಕೋರ್ಸ್ ಆರು ತಿಂಗಳು ಅಥವಾ ಒಂದು ವರ್ಷದ ಸರಳ ಕೋರ್ಸ್ ಅಗಿದ್ದು, ಸಂಸ್ಕೃತ ಸಂಭಾಷಣೆ, ವ್ಯಾಕರಣ ಮತ್ತು ನಮ್ಮ ಸಂಸ್ಕೃತಿಯ ಮೂಲ ಜ್ಞಾನವನ್ನು ಒದಗಿಸುತ್ತದೆ ಎಂದು ಸ್ವಾಮೀಜಿ ತಿಳಿಸಿದರು.

ಪ್ರಾಕ್-ಶಾಸ್ತ್ರೀ ಸಂಸ್ಕೃತ ಪ್ರೈಮರ್ ಪಿಯುಸಿ (ಪ್ರೀ-ಯೂನಿವರ್ಸಿಟಿ) ಮಟ್ಟದ ಎರಡು ವರ್ಷಗಳ ಕೋರ್ಸ್ ಅಗಿದ್ದು, 10ನೇ ತರಗತಿ ಹಾಗೂ ಅದಕ್ಕಿಂತ ಮೇಲ್ಪಟ್ಟ ವಿದ್ಯಾರ್ಥಿಗಳಿಗೆ ಬಿ.ಎ ಮತ್ತು ಎಂ.ಎ ಪದವಿಗಳಿಗೆ ಪ್ರವೇಶ ಪಡೆಯಲು ಪೂರಕವಾಗಿದೆ ಎಂದರು.

ಅದ್ವೈತ ವೇದಾಂತ, ಪುರಾಣ ಇತಿಹಾಸ ಮತ್ತು ವ್ಯಾಕರಣ ಉನ್ನತ ವ್ಯಾಸಂಗದ ಗಂಭೀರ ಕೋರ್ಸ್‌ಗಳು, ಯೋಗ ಕೋರ್ಸ್ ಕೇವಲ ಆಸನಗಳಿಗೆ ಸೀಮಿತವಾಗಿರದೆ ಮಾನವ ಅಂಗರಚನಾ ಶಾಸ್ತ್ರ, ಆಯುರ್ವೇದ ಮತ್ತು ಆಧುನಿಕ ವೈದ್ಯಕೀಯ ದೃಷ್ಟಿಕೋನವನ್ನೊಳಗೊಂಡ ವೃತ್ತಿಪರ ತರಬೇತಿ ಆಗಿದೆ ಎಂದು ತಿಳಿಸಿದರು.

ಹಿಂದೂ ಧರ್ಮ ಅಧ್ಯಯನ (ಎಂ.ಎ)ವು 40-50 ವರ್ಷ ದಾಟಿದವರು ತಮ್ಮ ಸ್ವಯಂ ಜ್ಞಾನಾರ್ಜನೆಗಾಗಿ ಈ ಸ್ನಾತಕೋತ್ತರ ಪದವಿಯನ್ನು ಕೈಗೊಳ್ಳಬಹುದು, ವೇದಭಾಷ್ಯ ಕೋರ್ಸ್ ವೇದ ಮಂತ್ರಗಳ ಅರ್ಥವನ್ನು ಆಳವಾಗಿ ತಿಳಿಯಲು ಬಯಸುವ ವೇದ ವಿದ್ವಾಂಸರಿಗಾಗಿ ಈ ವಿಶೇಷ ಕೋರ್ಸ್ ರೂಪಿಸಲಾಗಿದೆ ಎಂದು ಹೇಳಿದರು.

ಬಿ.ಎ ಮತ್ತು ಎಂ.ಎ ಪದವಿಗಳ ವಿದ್ಯಾರ್ಥಿಗಳು ಸ್ವಯಂ ಅಧ್ಯಯನವನ್ನು ಎಲ್ಲಿದ್ದರೂ ಮಾಡಬಹುದು, ಆದರೆ ಪರೀಕ್ಷೆಗಳನ್ನು ಮೈಸೂರು ಆಶ್ರಮದ ಆವರಣದಲ್ಲೇ ಬರೆಯಬೇಕಾಗುತ್ತದೆ. ಇನ್ನು ಡಿಪ್ಲೊಮಾ ಮತ್ತು ಸರ್ಟಿಫಿಕೇಟ್ ಕೋರ್ಸ್‌ಗಳ ವಿದ್ಯಾರ್ಥಿಗಳಿಗೆ ವಿಶ್ವವಿದ್ಯಾಲಯವು ವಿನಾಯಿತಿ ನೀಡಿದ್ದು, ಇಂಟರ್ನೆಟ್ ಆಧಾರಿತ ಪ್ರೊಟೋಕಾಲ್ ಮೂಲಕ ವಿಶ್ವದ ಯಾವುದೇ ಮೂಲೆಯಿಂದ ಬೇಕಾದರೂ ಪರೀಕ್ಷೆ ಬರೆಯಲು ಅವಕಾಶ ಕಲ್ಪಿಸಲಾಗಿದೆ ಎಂದು ತಿಳಿಸಿದರು.

ಜೂನ್ ಮೊದಲ ವಾರದಲ್ಲಿ ಅಧಿಕೃತ ಮಂಜೂರಾತಿ ಪತ್ರಗಳು ದೊರೆತ ನಂತರ, ಕೋರ್ಸ್‌ನ ಸಂಪೂರ್ಣ ಪಠ್ಯಕ್ರಮ ಮತ್ತು ವಿವರಗಳನ್ನು ಡಿಞಜಿ.ಜ್ಞಿ/್ಚಠ್ಠ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗುವುದು ಎಂದು ಪೀಠದ ಪ್ರಮುಖರು ತಿಳಿಸಿದ್ದಾರೆ.

ಪ್ರಥಮ ಪಿಎಚ್.ಡಿ ಪದವಿ ಪ್ರದಾನ:

2012 ರಿಂದ ಸಂಸ್ಕೃತ ಸಂಶೋಧನಾ ಕೇಂದ್ರವಾಗಿ ಗುರುತಿಸಲ್ಪಟ್ಟಿರುವ ಈ ಸಂಸ್ಥೆಯಿಂದ ಇದೀಗ ಚಿನ್ಮಯ ದತ್ತ ಅವರು ಯಶಸ್ವಿಯಾಗಿ ಪಿಎಚ್.ಡಿ ಪದವಿ ಪಡೆದ ಮೊದಲ ವಿದ್ಯಾರ್ಥಿಯಾಗಿದ್ದಾರೆ. ಇವರು ಋಗ್ವೇದದ ’ಐತ್ರೇಯ ಬ್ರಾಹ್ಮಣ ಮತ್ತು ಉಪನಿಷತ್’ ವಿಷಯದ ಮೇಲೆ ಸಂಶೋಧನಾ ಪ್ರಬಂಧ ಮಂಡಿಸಿದ್ದು, ಶ್ರೀಗಳು ಪ್ರಮಾಣ ಪತ್ರ ವಿತರಿಸಿದರು.