ದೊಡ್ಡಾನೆ ಗ್ರಾಮಕ್ಕೆ ಸೌರ ವಿದ್ಯುತ್‌ ಸೌಲಭ್ಯ

ಚಾಮರಾಜನಗರ ಜಿಲ್ಲೆಯ ಹನೂರು ತಾಲ್ಲೂಕಿನ ದೊಡ್ಡಾನೆ ಗ್ರಾಮಕ್ಕೆ ಸುರಕ್ಷಿತ, ವಿಶ್ವಾಸಾರ್ಹ ಮತ್ತು ಸುಸ್ಥಿರ ಸ್ವರೂಪದಲ್ಲಿ ವಿದ್ಯುತ್‌ ಸೌಲಭ್ಯ ಒದಗಿಸುವುದು ಈ ಉಪಕ್ರಮದ ಪ್ರಾಥಮಿಕ ಆದ್ಯತೆಯಾಗಿದೆ.

ಇಂಗಾಲ ಹೊರಸೂಸುವಿಕೆ ಕಡಿಮೆ ಮಾಡುವ ಹಾಗೂ ಪರಿಸರ ಸ್ನೇಹಿ ಸೌರಶಕ್ತಿ ವಿದ್ಯುತ್‌ ದೀಪಗಳನ್ನು ಒದಗಿಸುವ ಈ ಉಪಕ್ರಮವು ಪರಿಸರ ಸಂರಕ್ಷಣೆಗೆ ಕ್ವೆಸ್ಟ್ ಗ್ಲೋಬಲ್‌ನ ಬದ್ಧತೆಯನ್ನು ಸೂಚಿಸುತ್ತದೆ.

ಸೀಮೆಎಣ್ಣೆ ಬಳಸಿ ದೀಪ ಬೆಳಗಿಸುವ ಪ್ರವೃತ್ತಿಯಿಂದ ಜನರನ್ನು ದೂರವಿಡುವ ಮತ್ತು ಹೆಚ್ಚು ಇಂಗಾಲ ಹೊರಸೂಸುವ ಗ್ರಿಡ್ ವಿದ್ಯುತ್ ಮೇಲಿನ ಅವಲಂಬನೆ ಕಡಿಮೆ ಮಾಡುವ , ಸೌರ ವಿದ್ಯುತ್‌ ಶಕ್ತಿಯ ಮೂಲಸೌಕರ್ಯವು ಪರಿಸರ ಸುಸ್ಥಿರತೆಗೆ ಅರ್ಥಪೂರ್ಣ ಕೊಡುಗೆ ನೀಡುತ್ತದೆ. ಇದು ಪಳೆಯುಳಿಕೆ-ಇಂಧನ ಬಳಕೆ ಹಾಗೂ ಸಾರಿಗೆ ಸಂಬಂಧಿಸಿದ ಇಂಗಾಲದ ಹೊರಸೂಸುವಿಕೆಯನ್ನು ನಿವಾರಣೆ ಮಾಡಲಿದೆ. ದೀರ್ಘಕಾಲೀನ ಹವಾಮಾನ ಗುರಿಗಳನ್ನು ತಲುಪಲು ನೆರವಾಗಲಿದೆ.

ಅರಣ್ಯ ಪ್ರದೇಶದೊಳಗೆ ಸುಮಾರು 15 ಕಿ.ಮೀ ಒಳಗೆ ಇರುವ 94 ಬುಡಕಟ್ಟು ಕುಟುಂಬಗಳು ನೆಲೆಸಿರುವ ದೊಡ್ಡಾನೆ, ಇದುವರೆಗೂ ವಿದ್ಯುತ್‌ ಸೌಲಭ್ಯವನ್ನೇ ಕಂಡಿಲ್ಲ. ಪರಿಸರ ಸಂರಕ್ಷಣೆಯ ಕಾಳಜಿ ಜೊತೆಗೆ ಈ ಕೊರತೆ ಪರಿಹರಿಸಲು, ಕ್ವೆಸ್ಟ್ ಗ್ಲೋಬಲ್ ಮತ್ತು ಉಥಿಷ್ಟ ಚಾರಿಟಬಲ್ ಟ್ರಸ್ಟ್ (Uthishta Charitable Trust) ಕೇಂದ್ರೀಕೃತ ಸೌರಶಕ್ತಿ ವ್ಯವಸ್ಥೆಯನ್ನು ಜಾರಿಗೆ ತಂದಿವೆ. ಈ ಸೌಲಭ್ಯದಡಿ ಇಂಧನ- ದಕ್ಷತೆಯ ಎಲ್ಇಡಿ ಬೀದಿ ದೀಪಗಳ ಮೂಲಕ ಗ್ರಾಮವನ್ನು ಬೆಳಗಿಸಲಾಗುತ್ತಿದೆ.

ಸೌರ ವಿದ್ಯುತ್‌ ದೀಪ ವ್ಯವಸ್ಥೆ ಅಳವಡಿಸುವುದು ಪೂರ್ಣಗೊಂಡ ನಂತರ, ಈ ಸೌಲಭ್ಯವು ಸಂಪೂರ್ಣವಾಗಿ ಕಾರ್ಯನಿರ್ವಹಿಸಲಿದೆ. ತಕ್ಷಣದಿಂದಲೇ ಬೀದಿ ವಿದ್ಯುತ್‌ ದೀಪಗಳು ಬೆಳಗಲಿವೆ. ಪರಿಸರ ಸ್ನೇಹಿಯಾದ ಸ್ವಚ್ಛ, ನವೀಕರಿಸಬಹುದಾದ, ವಿದ್ಯುತ್‌ ಗ್ರಿಡ್‌ ಅವಲಂಬಿಸದ ಬೆಳಕಿನ ಸೌಲಭ್ಯವು ದೊಡ್ಡಾನೆ ಗ್ರಾಮದ ನಿವಾಸಿಗಳಿಗೆ ಆರೋಗ್ಯಕರ ಮತ್ತು ಸುರಕ್ಷಿತ ವಾತಾವರಣ ಸೃಷ್ಟಿಸಲಿದೆ.

ಈ ಉಪಕ್ರಮವು ಗಮನಾರ್ಹ ಬಗೆಯಲ್ಲಿ ಸಾಮಾಜಿಕ ಪ್ರಯೋಜನಗಳನ್ನು ನೀಡುವ ನಿರೀಕ್ಷೆಯಿದೆ. ಮಕ್ಕಳು ಸಂಜೆ ಹೊತ್ತಿನಲ್ಲಿ ಓದು -ಬರಹಕ್ಕೆ ಹಚ್ಚು ಸಮಯ ಕಳೆಯಬಹುದು. ಮಹಿಳೆಯರು, ಮಕ್ಕಳು ಮತ್ತು ವೃದ್ಧರಿಗೆ ಸುಧಾರಿತ ಸುರಕ್ಷತೆ ದೊರೆಯಲಿದೆ. ಸೂರ್ಯಾಸ್ತದ ನಂತರ ಹೆಚ್ಚಿದ ಸಮುದಾಯ ಸಂವಹನದಂತಹ ಅನುಕೂಲತೆಗಳನ್ನು ಒದಗಿಸಲಿದೆ.

ಕತ್ತಲಾದ ನಂತರವೂ ಮಕ್ಕಳು ಈಗ ಶಿಕ್ಷಣ ಕಲಿಯಲು, ಮನೆಗೆಲಸ ಮತ್ತು ಕಲಿಕಾ ಚಟುವಟಿಕೆಗಳಿಗಾಗಿ ಸುರಕ್ಷಿತವಾಗಿ ಒಟ್ಟುಗೂಡಬಹುದು. ಇಂಗಾಲದ ಹೊರ ಸೂಸುವಿಕೆ ಪ್ರಮಾಣವನ್ನು ಹೆಚ್ಚಿಸದೆ ಸ್ಥಿರವಾದ ಅಧ್ಯಯನ ದಿನಚರಿಗಳನ್ನು ಮತ್ತು ಸುಧಾರಿತ ರೀತಿಯಲ್ಲಿ ಶೈಕ್ಷಣಿಕ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳುವಿಕೆಯನ್ನು ಹೆಚ್ಚಿಸಬಹುದು. ಈ ಸೌಲಭ್ಯದ ಕಾರ್ಯನಿರ್ವಹಣೆ ಮೇಲೆ ಪ್ರತಿ ತಿಂಗಳೂ ನಿಗಾ ಇರಿಸಲಾಗುವುದು. ನಿರ್ವಹಣಾ ಮಾದರಿ ಮತ್ತು ಸಮುದಾಯದ ಪ್ರತಿಕ್ರಿಯೆಯನ್ನು ನಿರಂತರವಾಗಿ ಗಮನಿಸಲಾಗುವುದು. ಸೌರ ವಿದ್ಯುತ್‌ ಬೀದಿ ದೀಪಗಳ ಬಳಕೆ ಮುಂಚಿನ ಹಾಗೂ ನಂತರದ ಪರಿಣಾಮವನ್ನು ದಾಖಲಿಸಲಾಗುವುದು.

ಈ ಉಪಕ್ರಮದ ಕುರಿತು ಮಾತನಾಡಿರುವ ಕ್ವೆಸ್ಟ್ ಗ್ಲೋಬಲ್‌ನ ಸಹ-ಸಂಸ್ಥಾಪಕ ಮತ್ತು ಸಿಇಒ ಅಜಿತ್ ಪ್ರಭು ಅವರು , “ಎಂಜಿನಿಯರಿಂಗ್ ಶ್ರೇಷ್ಠತೆಯು ಅರ್ಥಪೂರ್ಣ ಸಾಮಾಜಿಕ ಪರಿಣಾಮವಾಗಿ ಬದಲಾಗಬೇಕು ಎಂಬುದು ಕ್ವೆಸ್ಟ್ ಗ್ಲೋಬಲ್‌ನಲ್ಲಿರುವ ನಮ್ಮ ದೃಢ ನಂಬಿಕೆಯಾಗಿದೆ. ಸುಸ್ಥಿರತೆಗೆ ಸಂಬಂಧಿಸಿದ ನಮ್ಮ ಬದ್ಧತೆಯು ತಂತ್ರಜ್ಞಾನವನ್ನು ಮೀರಿ, ಜನರ ಜೀವನ ಮಟ್ಟ ಸುಧಾರಿಸುವ ಆಶಯ ಹೊಂದಿದೆ. ಉಥಿಷ್ಟ ಚಾರಿಟಬಲ್ ಟ್ರಸ್ಟ್‌ ಜೊತೆಗಿನ ನಮ್ಮ ಪಾಲುದಾರಿಕೆಯ ಮೂಲಕ, ನಾವು ದೀರ್ಘಾವಧಿಯಿಂದಲೂ ವಿದ್ಯುತ್ ಸೌಲಭ್ಯ ಪಡೆಯುವುದೇ ಒಂದು ಸವಾಲಾಗಿರುವ ದೊಡ್ಡಾನೆಯಂತಹ ಅರಣ್ಯದಲ್ಲಿ ವಾಸಿಸುವ ಸಮುದಾಯಗಳಿಗೆ ಶುದ್ಧ ಸೌರಶಕ್ತಿ ಮತ್ತು ಸುರಕ್ಷಿತ ಬೆಳಕಿನ ಸೌಲಭ್ಯವನ್ನು ಒದಗಿಸುತ್ತಿದ್ದೇವೆʼ ಎಂದು ಹೇಳಿದ್ದಾರೆ.

ದೊಡ್ಡಾನೆಯಲ್ಲಿನ ಯಶಸ್ಸು ಆಧರಿಸಿ, ಕ್ವೆಸ್ಟ್ ಗ್ಲೋಬಲ್ ಎಚ್‌ಡಿ ಕೋಟೆ ಗ್ರಾಮದಲ್ಲಿಯೂ ಇದೇ ರೀತಿಯ ಸೌರಶಕ್ತಿಯ ಬೀದಿ ದೀಪ ಅಳವಡಿಸುವ ಯೋಜನೆಯನ್ನು ಜಾರಿಗೆ ತಂದಿದೆ.