ದಸರಾದಲ್ಲಿ ಕಂಬಳ ಆಯೋಜನೆಗೆ ಪ್ರತಾಪ್ ಸಿಂಹ ವಿರೋಧ

ನಗರದಲ್ಲಿ ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ನಮ್ಮ ದಸರಾ ಆಚರಣೆ ನಡುವೆ ಬೇರೆಯದನ್ನು ಏಕೆ ಇಲ್ಲಿಗೆ ತರುತ್ತೀರಾ? ಆಯಾ ನೆಲದ ಕ್ರೀಡೆಗಳು ಆಯಾ ನೆಲದ ಸಂಸ್ಕೃತಿಗಳು ಅದೇ ಸ್ಥಳದಲ್ಲಿ ವೈಭವವಾಗಿ ನಡೆಯಲಿ. ದಸರಾದಲ್ಲಿ ಎಲ್ಲ ಪರಂಪರೆಗಳನ್ನು ತುರುಕುತ್ತಾ ಹೋದರೆ ಮೂಲ ದಸರಾಕ್ಕೆ ಧಕ್ಕೆ ಬರುವುದಿಲ್ಲವೇ? ಸಾಂಕೇತಿಕವಾಗಿ ದಸರಾದಲ್ಲಿ ನಾಡಿನ ಎಲ್ಲ ಸಂಸ್ಕೃತಿಯನ್ನು ಸ್ತಬ್ಧಚಿತ್ರಗಳಲ್ಲಿ ಮೂಡಿಸುತ್ತೇವೆ. ಅಷ್ಟು ಸಾಕು. ಅದನ್ನೇ ಒಂದು ಪ್ರತ್ಯೇಕ ಕಾರ್ಯಕ್ರಮ ಮಾಡುವುದು ಸರಿಯಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಈ ವಿಚಾರದಲ್ಲಿ ಸಂಸದ ಯದುವೀರ್ ಕೂಡ ಧ್ವನಿ ಎತ್ತಿದ್ದಾರೆ. ಅವರ ಮಾತಿಗೆ ನನ್ನ ಸಹಮತ ಇದೆ ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.

ಬೆಂಗಳೂರು- ಮೈಸೂರು ಹೆದ್ದಾರಿಯಲ್ಲಿ ಕುಟುಂಬದ ಮೇಲೆ ನಡೆದ ಹಲ್ಲೆ ಪ್ರಕರಣ ಕುರಿತು ಪ್ರತಿಕ್ರಿಯಿಸಿದ ಅವರು, ಪ್ರಿಯಾಂಕ್ ಖರ್ಗೆ ಗೃಹ ಸಚಿವರಾದ ಮೇಲೆ ಪೊಲೀಸ್ ಇಲಾಖೆ ಕಾರ್ಯ ಸುಧಾರಣೆ ಬಗ್ಗೆ ಮಾತಾಡಿದ್ದಾರೆಯೇ? ಗೃಹ ಸಚಿವರು ತಲೆ ಹರಟೆ ಮಾತಾಡಿಕೊಂಡಿದ್ದಾರೆ. ಅವರಿವರ ಬಗ್ಗೆ ಕೊಂಕು ಮಾತಾಡೋದು, ಟ್ವೀಟ್ ಮಾಡೋದು ಗೃಹ ಸಚಿವರ ಕೆಲಸ. ಪೆದ್ದು ಪೆದ್ದು ಮಾತಾಡಿಕೊಂಡು ಕೂಗು ಮಾರಿ ತರ ಸರ್ಕಾರದಲ್ಲಿ ಇದ್ದಾರೆ ಎಂದು ಹರಿಹಾಯ್ದರು.

ಮಂಡ್ಯ ಪೊಲೀಸರಿಗೆ ಕಾಮನ್‌ಸೆನ್ಸ್ ಇದ್ದಿದ್ದರೆ ಘಟನೆಯಲ್ಲಿನ ಆರೋಪಿಗಳ ಮೇಲೆ ಸರಳವಾದ ಸೆಕ್ಷನ್ ಹಾಕುತ್ತಿರಲಿಲ್ಲ. ಎಲ್ಲ ಆರೋಪಿಗಳ ಮೇಲೆ ಮಾರಣಾಂತಿಕ ಹಲ್ಲೆಯ ಕೇಸ್ ಹಾಕಿ ಬಂಧನ ಮಾಡಬೇಕು ಎಂದು ಆಗ್ರಹಿಸಿದರು.

ಬೆಂಗಳೂರು-ಮೈಸೂರು ಹೆದ್ದಾರಿಯಲ್ಲಿ ತಡೆ ಬೇಲಿ ಕಿತ್ತು ಜನ ಬಿಡಾಡಿ ದನಗಳ ರೀತಿ ಓಡಾಡುತ್ತಿದ್ದಾರೆ. ಮಂಡ್ಯ ಪೊಲೀಸರು ಕಣ್ಮುಚ್ಚಿ ಕುಳಿತಿದ್ದಾರೆ. ಪ್ರಕರಣದಲ್ಲಿ ಆರೋಪಿಗಳ ಬಂಧನ ಮಾಡದಿದ್ದರೆ ಪೊಲೀಸರ ವಿರುದ್ಧ ರಸ್ತೆಗೆ ಇಳಿಯುತ್ತೇವೆ ಎಂದು ಗುಡುಗಿದರು.

ಎಸ್‌ಐಆರ್ ಪ್ರಕ್ರಿಯೆ ಕುರಿತು ಎಲ್ಲ ಕಡೆಗಳಿಂದ ದೂರುಗಳು ಬರುತ್ತಿವೆ. ತುಂಬಾ ಕಡೆ ಗೊಂದಲವಾಗುತ್ತಿದೆ. ಪ್ರತಿ ಭಾನುವಾರ ಸಂಬಂಧಪಟ್ಟ ಬೂತ್‌ನಲ್ಲಿ ಬೆಳಗ್ಗೆ 8ರಿಂದ ಸಂಜೆ 5ರ ಗಣತಿ ನಮೂನೆ ವಿತರಣೆ ಮಾಡಿ ಸಮಸ್ಯೆಗೆ ಪರಿಹಾರ ಕೊಡಬೇಕು. ಆಯಾಯ ಬೂತ್ ಮಟ್ಟದಲ್ಲೇ ಈ ಕೆಲಸವಾದರೆ ಗೊಂದಲ ಬಗೆಹರಿಯತ್ತದೆ ಎಂದು ಹೇಳಿದರು.