ಜಾನಕಿ ಹಾಡುಗಳ ಮೋಡಿಯಲ್ಲಿ ಮಿಂದೆದ್ದ ಮೈಸೂರು; ನಮನ ಕಾರ್ಯಕ್ರಮಕ್ಕೆ ಜನಸಾಗರ

ನಗರದ ದಟ್ಟಗಳ್ಳಿಯ ಸಾ.ರಾ. ಕನ್ವೆನ್ಷನ್ ಹಾಲ್‌ನಲ್ಲಿ ಎಸ್.ಜಾನಕಿ ಚಾರಿಟಬಲ್ ಟ್ರಸ್ಟ್ ವತಿಯಿಂದ ಆಯೋಜಿಸಿದ್ದ ಎಸ್. ಜಾನಕಿ ನಮನ ಕಾರ್ಯಕ್ರಮ ಭಾವನೆಗಳ ಸಂಗಮವಾಗಿ ಮಾರ್ಪಟ್ಟಿತು. ಆಂಧ್ರಪ್ರದೇಶದಲ್ಲಿ ಜನಿಸಿದರೂ, ಜೀವನದ ಕೊನೆಯ ದಿನಗಳನ್ನು ಕಳೆದದ್ದು ಮತ್ತು ಕೊನೆಯುಸಿರು ಎಳೆದದ್ದು ಮೈಸೂರಿನಲ್ಲೇ. ಮೈಸೂರಿಗೂ ಜಾನಕಿ ಅವರಿಗೂ ಅವಿನಾಭಾವ ಸಂಬಂಧವಿದೆ. ಈ ಕಾರಣದಿಂದಲೇ ಅವರನ್ನು ನೆನೆಯಲು ನಡೆದ ಕಾರ್ಯಕ್ರಮಕ್ಕೆ ಅಭಿಮಾನಿಗಳು ಅಪಾರ ಸಂಖ್ಯೆಯಲ್ಲಿ ಆಗಮಿಸಿದ್ದರು. ಸಭಾಂಗಣ ಜನರಿಂದ ಕಿಕ್ಕಿರಿದು ತುಂಬಿತ್ತು. ಆಸನಗಳು ಸಾಲದೆ ಅನೇಕರು ನಿಂತುಕೊಂಡೇ ಕಾರ್ಯಕ್ರಮವನ್ನು ವೀಕ್ಷಿಸಿದರು. ಆದರೆ ಯಾರ ಮುಖದಲ್ಲೂ ಅಸಮಾಧಾನ ಇರಲಿಲ್ಲ. ಜಾನಕಿ ಅವರ ಹಾಡುಗಳನ್ನು ಕೇಳಲು ನಿಂತರೂ ಸರಿ ಎಂಬ ಭಾವನೆ ಎಲ್ಲರಲ್ಲೂ ಕಾಣಿಸುತ್ತಿತ್ತು.

ಕಾರ್ಯಕ್ರಮದ ಅಂಗವಾಗಿ ಜಾನಕಿ ಅವರು ಹಾಡಿ ಅಮರಗೊಳಿಸಿದ ಕನ್ನಡದ ಅಜರಾಮರ ಗೀತೆಗಳ ಗಾಯನ ನಡೆಯಿತು. ರಾಜ್ಯದ ವಿವಿಧ ಭಾಗಗಳಿಂದ ಆಗಮಿಸಿದ್ದ ಖ್ಯಾತ ಗಾಯಕರು ತಮ್ಮ ಸುಮಧುರ ಕಂಠದಲ್ಲಿ ಆ ಹಾಡುಗಳಿಗೆ ಮತ್ತೊಮ್ಮೆ ಜೀವ ತುಂಬಿದರು. ಒಂದೊಂದು ಹಾಡು ಮೊಳಗುತ್ತಿದ್ದಂತೆ ಸಭಾಂಗಣದಲ್ಲಿ ಭಾವನೆಗಳ ಅಲೆ ಹರಡಿತು. ಕೆಲವರು ತಲೆದೂಗಿ ಹಾಡುಗಳನ್ನು ಆಸ್ವಾದಿಸಿದರೆ, ಹಲವರು ಚಪ್ಪಾಳೆ ತಟ್ಟಿ ಗಾಯಕರನ್ನು ಹುರಿದುಂಬಿಸಿದರು.

ಭುವನೇಶ್ವರಿಯ ನೆನೆ ಮನವೇ.., ಬಂದ ಬಂದ ಮೇಘರಾಜ ನಮ್ಮ ಊರ ಕೆರೆಗೆ.., ಕರೆದರೂ ಕೇಳದೆ ಸುಂದರನೇ..., ಚೆಲುವೆ ಒಂದು ಕೇಳ್ತೀನಿ.., ಜೀವಾ ಹೂವಾಗಿದೆ ಭಾವ ಜೇನಾಗಿದೆ.., ಶಿಲೆಗಳು ಸಂಗೀತ ಆಡಿವೆ, ಬೇಲೂರು ಗುಡಿಯಲಿ... ಸೇರಿದಂತೆ ಅನೇಕ ಅಮರ ಗೀತೆಗಳು ಕಾರ್ಯಕ್ರಮದಲ್ಲಿ ಮೊಳಗಿದವು. ಪ್ರತಿಯೊಂದು ಹಾಡೂ ನೆರೆದಿದ್ದವರನ್ನು ಹಳೆಯ ನೆನಪುಗಳ ಲೋಕಕ್ಕೆ ಕರೆದೊಯ್ದಿತು.

ಜಾನಕಿ ಅವರು ಭೌತಿಕವಾಗಿ ನಮ್ಮೊಂದಿಗಿಲ್ಲದಿದ್ದರೂ, ಅವರ ಧ್ವನಿ ಎಂದೆಂದಿಗೂ ಕನ್ನಡಿಗರ ಮನಗಳಲ್ಲಿ ಜೀವಂತವಾಗಿರುತ್ತದೆ ಎಂಬುದನ್ನು ಈ ಕಾರ್ಯಕ್ರಮ ಮತ್ತೊಮ್ಮೆ ಸಾಬೀತುಪಡಿಸಿತು. ಸಂಗೀತದ ಮೂಲಕ ಅಭಿಮಾನಿಗಳು ತಮ್ಮ ಪ್ರೀತಿಯ ಗಾಯಕಿಗೆ ಸಲ್ಲಿಸಿದ ಈ ಗೌರವ ನಿಜಕ್ಕೂ ಭಾವಪೂರ್ಣ, ಅರ್ಥಪೂರ್ಣ ಮತ್ತು ಅವಿಸ್ಮರಣೀಯವಾಗಿತ್ತು.