ವಸತಿ ರಹಿತ ಅಂಗವಿಕಲರಿಗೆ ಸೂರು ಭಾಗ್ಯ ಶೀಘ್ರ

ಜಿಲ್ಲೆಯಲ್ಲಿ ವಾಸಿಸುತ್ತಿರುವ ವಸತಿ ರಹಿತ ಅಂಗವಿಕಲರಿಗೆ ಇಲ್ಲೊಂದು ಸಿಹಿ ಸುದ್ದಿ...! ಜಿಲ್ಲಾಡಳಿತ ವಿಕಲಾಂಗರ ಬಾಳಿಗೆ ‘ದೀಪ’ವಾಗಲು ಮುಂದಾಗಿದೆ. ಜಿಲ್ಲೆಯಲ್ಲಿ ವಾಸಿಸುತ್ತಿರುವ ವಸತಿ ರಹಿತ ಅಂಗವಿಕಲರಿಗೆ ಸ್ವಂತ ಸೂರು ಕಲ್ಪಿಸುವ ಉದ್ದೇಶದಿಂದ ಜಿಲ್ಲಾಡಳಿತ ‘ಪ್ರತ್ಯೇಕ ಕಾಲನಿ’ ನಿರ್ಮಾಣ ಮಾಡಲು ಮುಂದಾಗಿದೆ.

ಇದು ಅಂಗವಿಕಲರ ಬದುಕಿನಲ್ಲಿ ಹೊಸ ಭರವಸೆ ಮೂಡಿಸಿದೆ. ಈ ಸಂಬಂಧ ಜಿಲ್ಲಾಡಳಿತವೀಗ ಜಾಗ ಕೂಡ ಅಂತಿಮಗೊಳಿಸಿದ್ದು, ಎಲ್ಲ ಅಂದುಕೊಂಡಂತೆ ಆದರೆ ಶೀಘ್ರದಲ್ಲೇ ವಿಕಲಾಂಗರು ನಿವೇಶನ ಪಡೆಯಲಿದ್ದಾರೆ.

ಸಾಮಾನ್ಯರಂತೆ ಅಂಗವಿಕಲರು ಬದುಕು ನಡೆಸಬೇಕೆಂಬ ಆಶಯದೊಂದಿಗೆ ಸರ್ಕಾರ ನಾನಾ ಯೋಜನೆ ರೂಪಿಸಿದೆ. ಆದರೆ, ಇಂದಿಗೂ ನಿರ್ದಿಷ್ಟ ಕೆಲಸವಾಗಲಿ, ವಾಸಿಸಲು ಮನೆಯಾಗಲಿ ದೊರಕಿಲ್ಲ. ಪಿಂಚಣಿ ಸೌಲಭ್ಯವೂ ನಿಯಮಿತವಾಗಿ ಬರುತ್ತಿಲ್ಲ. ಬ್ಯಾಂಕ್‌ನಲ್ಲಿ ಸಾಲ ಸೌಲಭ್ಯ ಸಿಗುತ್ತಿಲ್ಲ. ಸ್ವಾವಲಂಬಿ ಜೀವನ ನಡೆಸಲು ನೂರಾರು ಸಂಕಷ್ಟ ಎದುರಿಸುತ್ತಿದ್ದಾರೆ.

ಅಂಗವಿಕಲರಿಗೆ ಸ್ವಂತ ಸೂರು ಕಲ್ಪಿಸುವ ಉದ್ದೇಶದಿಂದ ಜಿಲ್ಲಾಡಳಿತ ಭೂಮಿ ಅಂತಿಮಗೊಳಿಸಿದೆ. ಮೈಸೂರು ತಹಸೀಲ್ದಾರ್ ಅವರು ದಡ್ಡಹಳ್ಳಿ ಗ್ರಾಮದ ಸರ್ವೇ ನಂ.66ರಲ್ಲಿರುವ 4 ಎಕರೆ ಭೂಮಿಯನ್ನು ಈ ಸಂಬಂಧ ಮೀಸಲುಗೊಳಿಸಿ ಮೈಸೂರು ಮಹಾನಗರ ಪಾಲಿಕೆಗೆ ಹಸ್ತಾಂತರಿಸಲಾಗಿದೆ.

2011ರ ಜನಗಣತಿ ಪ್ರಕಾರ ಜಿಲ್ಲೆಯಲ್ಲಿ ಒಟ್ಟು 44,094 ಅಂಗವಿಕಲರು ಇದ್ದಾರೆ. ಈ ಪೈಕಿ ದೈಹಿಕ ವಿಕಲಾಂಗರು 22,732, ದೃಷ್ಟಿ ದೋಷವುಳ್ಳವರು 7,964, ಶ್ರವಣ ದೋಷವುಳ್ಳವರು 784, ಬುದ್ಧಿಮಾಂದ್ಯರು 3,558, ಮಾನಸಿಕ ಅಸ್ವಸ್ಥರು 981, ಕುಷ್ಠರೋಗ ನಿವಾರಿತರು 846 ಹಾಗೂ ಬಹುವಿಧ 929 ಜನ ಅಂಗವಿಕಲರಿದ್ದಾರೆ. ಇವರಲ್ಲಿ ಬಹುತೇಕರು ಬಾಡಿಗೆ ಮನೆಯಲ್ಲಿ ವಾಸ ಮಾಡುತ್ತಿದ್ದಾರೆ. ಎಷ್ಟೋ ಜನರಿಗೆ ಬಾಡಿಗೆ ಕಟ್ಟಲು ಆಗದಂತಹ ಆರ್ಥಿಕ ಸಂಕಷ್ಟ ಇದೆ. ಹೀಗಾಗಿ ಜಿಲ್ಲಾಡಳಿತ ಅಂಗವಿಕಲರಿಗಾಗಿ ನಗರದಲ್ಲಿ ಪ್ರತ್ಯೇಕ ಬಡಾವಣೆ ಮಾಡಲು ಮುಂದಾಗಿದೆ.

ಅನುದಾನ ಕೊರತೆಯಿಂದ ಎರಡು ವರ್ಷದಿಂದ ಸ್ಥಗಿತಗೊಂಡಿರುವ, ಅಂಗವಿಕಲರಿಗೆ ಹಲವು ಸೌಲಭ್ಯ ಕಲ್ಪಿಸುತ್ತಿದ್ದ ‘ಜಿಲ್ಲಾ ವಿಕಲಚೇತನರ ಪುನರ್ವಸತಿ ಕೇಂದ್ರ’ವನ್ನು ಮತ್ತೆ ಆರಂಭಿಸುವ ಉದ್ದೇಶದಿಂದ ಜಿಲ್ಲಾ ಅಂಗವಿಕಲರ ಕಲ್ಯಾಣ ಇಲಾಖೆ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ. ಸಾಮಾನ್ಯರಂತೆ ವಿಕಲಾಂಗರು ಬದುಕು ನಡೆಸಬೇಕೆಂಬ ಆಶಯದೊಂದಿಗೆ ಸರ್ಕಾರ ನಾನಾ ಯೋಜನೆಗಳನ್ನು ಹಮ್ಮಿಕೊಳ್ಳುತ್ತಿದೆ. ಆ ಯೋಜನೆಯ ಭಾಗವಾಗಿಯೇ ನಗರದ ತಿಲಕ್‌ನಗರದ ಸಮೀಪ ಪುನರ್ವಸತಿ ಕೇಂದ್ರವನ್ನು ದಶಕದ ಹಿಂದೆ ಆರಂಭಿಸಲಾಗಿತ್ತು. ಇದು, ಜಿಲ್ಲಾಡಳಿತ ಹಾಗೂ ರೆಡ್‌ಕ್ರಾಸ್ ಸಹಯೋಗದೊಂದಿಗೆ ಕಾರ್ಯ ನಿರ್ವಹಿಸುತ್ತಿತ್ತು. ಅಗತ್ಯ ಸಲಕರಣೆ ಒದಗಿಸುವುದು (ಶ್ರವಣ ಸಾಧನ, ಕನ್ನಡಕ, ಬೆಲ್ಟ್, ಬ್ರೈಲ್ ವಾಚ್, ಶೂ, ಕುರ್ಚಿ ಇತ್ಯಾದಿ), ತಾಲೂಕು ಕೇಂದ್ರಗಳಲ್ಲಿ ಆರೋಗ್ಯ ಶಿಬಿರ ಆಯೋಜಿಸುವುದು ಸೇರಿದಂತೆ ಹಲವು ಮುಖ್ಯ ಉದ್ದೇಶ ಹೊಂದಿತ್ತು. ಇದರಿಂದ ಜಿಲ್ಲೆಯಲ್ಲಿರುವ ಸುಮಾರು 45 ಸಾವಿರ ಮಂದಿಗೆ ಸೌಲಭ್ಯಗಳು ಸಿಗುತ್ತಿದ್ದವು. ಆದರೆ, 2022ರಲ್ಲಿ ಅನುದಾನ ಹಾಗೂ ಸಮನ್ವಯತೆ ಕೊರತೆಯಿಂದ ಕೇಂದ್ರವನ್ನು ಮುಚ್ಚಲಾಯಿತು.

ಅಂಗವಿಕಲರಿಗೆ ಸರ್ಕಾರ ಸೌಲಭ್ಯಗಳ ಜತೆಗೆ ಅಗತ್ಯ ಮಾರ್ಗದರ್ಶನ ಮಾಡುವುದು ‘ಜಿಲ್ಲಾ ವಿಕಲಚೇತನರ ಪುನರ್ವಸತಿ ಕೇಂದ್ರ’ದ ಉದ್ದೇಶವಾಗಿದೆ. ಶ್ರವಣ ಸಾಧನ, ಕನ್ನಡಕ ಹಾಗೂ ಗಾಲಿ ಕುರ್ಚಿ ಎಲ್ಲವೂ ಕಾಲಕಾಲಕ್ಕೆ ದುರಸ್ತಿಗೆ ಬರುತ್ತವೆ. ಪುನವರ್ಸತಿ ಕೇಂದ್ರದಿಂದ ಸಲಕರಣೆಗಳನ್ನು ಉಚಿತವಾಗಿ ರಿಪೇರಿ ಮಾಡಿಸಿಕೊಳ್ಳುತ್ತಿದ್ದರು. ಜತೆಗೆ ಹೊಸ ಸಲಕರಣೆಗಳನ್ನು ಪಡೆದುಕೊಳ್ಳುತ್ತಿದ್ದರು. ತಜ್ಞ ವೈದ್ಯರಿಂದ ಆರೋಗ್ಯ ಮಾರ್ಗದರ್ಶನದ ಜತೆಗೆ ಥೆರಪಿಗಳನ್ನು ಉಚಿತವಾಗಿ ಪಡೆಯುತ್ತಿದ್ದರು. ಇದಕ್ಕಾಗಿ 10ಕ್ಕೂ ಹೆಚ್ಚು ಸಿಬ್ಬಂದಿ ಕೇಂದ್ರದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದರು. ಕೇಂದ್ರವನ್ನು ಮುಚ್ಚಿರುವುದರಿಂದ ವಿಕಲಾಂಗರಿಗೆ ಆರ್ಥಿಕ ಹೊರೆ ಹೆಚ್ಚಾಗಿದೆ. ಹೊಸ ಸಲಕರಣೆಗಳನ್ನು ದುಡ್ಡು ಕೊಟ್ಟು ಖರೀದಿಸಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ.

"

ನಿವೇಶನ ನೀಡಬೇಕು ಎಂದು ಅನೇಕ ವರ್ಷಗಳಿಂದ ಹೋರಾಟ ಮಾಡುತ್ತಿದ್ದೇವೆ. ಸರ್ಕಾರದ ಎಲ್ಲ ಸೌಲಭ್ಯಗಳು ದೊರೆಯಬೇಕು. ಮುಖ್ಯವಾಗಿ ಜಿಲ್ಲಾ ವಿಕಲಚೇತನರ ಪುನರ್ವಸತಿ ಕೇಂದ್ರ ಮತ್ತೆ ಆರಂಭಗೊಳ್ಳಬೇಕು. ಕೇಂದ್ರ ಮುಚ್ಚಿರುವುದರಿಂದ ಅಂಗವಿಕಲರು ಸಲಕರಣೆಗಳನ್ನು ರಿಪೇರಿ ಮಾಡಿಸಿಕೊಳ್ಳಲು ಪರದಾಡುವಂತಾಗಿದೆ.

— ಎಂ.ಪ್ರಭುಸ್ವಾಮಿ, ಜಿಲ್ಲಾಧ್ಯಕ್ಷ, ಕರ್ನಾಟಕ ರಾಜ್ಯ ಅಂಗವಿಕಲರ ವೇದಿಕೆ