ಕಾಡಂಚಿನಲ್ಲಿ ಮಿತಿಮೀರಿದ ಕಾಡಾನೆ ಹಾವಳಿ

ತಾಲೂಕಿನ ಮಡುವಿನಹಳ್ಳಿ, ಈರೇಗೌಡನ ಹುಂಡಿ, ಹೊಸವೀಡು, ಒಡೆಯನಪುರ, ದೇಪೇಗೌಡನಪುರ, ಬಳ್ಳೂರ ಹುಂಡಿ, ಮಹದೇವನಗರ, ನಾಗನಾಪುರ, ದೇವರಾಯಶೆಟ್ಟಿಪುರ, ಕೊತ್ತನಹಳ್ಳಿ, ಕುರುಬರಹುಂಡಿ, ಶ್ರೀಕಂಠಪುರ, ಅಂಜನಾಪುರ ಸೇರಿದಂತೆ ಕಾಡಂಚಿನ ಹತ್ತಾರು ಗ್ರಾಮಗಳ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವನ್ಯಪ್ರಾಣಿಗಳ ಹಾವಳಿ ಮಿತಿಮೀರಿದೆ. ಎಲ್ಲ ಗ್ರಾಮಗಳು ಓಂಕಾರ್, ನಂಜನಗೂಡು ಹಾಗೂ ಯಡಿಯಾಲ ಅರಣ್ಯ ಪ್ರದೇಶಗಳ ವ್ಯಾಪ್ತಿಗೆ ಒಳಪಟ್ಟಿವೆ.

ವನ್ಯ ಪ್ರಾಣಿಗಳು ಹೆಚ್ಚಾಗಿರುವ ಅರಣ್ಯ ಭಾಗದಿಂದ ಕಾಡಾನೆಗಳು ನಿರಂತರವಾಗಿ ರೈತರ ಜಮೀನುಗಳಿಗೆ ದಾಳಿ ಮಾಡುತ್ತಲೇ ಇವೆ. ಕಬ್ಬು, ಬಾಳೆ, ಅರಿಶಿನ, ತೆಂಗು, ಟೊಮ್ಯಾಟೋ ಬೆಳೆ ನಾಶಪಡಿಸುತ್ತಿವೆ.

ನಿತ್ಯ ಕಾಡಾನೆಗಳ ಕಾಟದಿಂದ ಅಸಹಾಯಕರಾಗಿರುವ ರೈತರು ತಾವು ಬೆಳೆದಿರುವ ಬೆಳೆ ಕೈ ಸೇರುತ್ತದೆ ಎಂಬ ಭರವಸೆಯನ್ನೇ ಕಳೆದುಕೊಂಡಿದ್ದಾರೆ. ಈಗಾಗಲೇ ಅರಣ್ಯ ಅಂಚಿನ ಸಾಕಷ್ಟು ರೈತರು ಕಾಡು ಪ್ರಾಣಿಗಳ ಉಪಟಳಕ್ಕೆ ಬೇಸತ್ತು ವ್ಯವಸಾಯವನ್ನೇ ಬಿಟ್ಟು ಇತರ ಕೆಲಸಗಳಲ್ಲಿ ತೊಡಗಿಕೊಂಡಿರುವುದು ಕಂಡುಬರುತ್ತಿದೆ.

ಕಾಡಾನೆಗಳ ದಾಳಿ ತಡೆಯುವ ನಿಟ್ಟಿನಲ್ಲಿ ಕೆಲ ರೈತರು ತಮ್ಮ ಜಮೀನುಗಳಲ್ಲಿ ಸೌರಬೇಲಿ ಸೇರಿದಂತೆ ಹಲವು ತಂತ್ರಗಳನ್ನು ಉಪಯೋಗಿಸಿಕೊಂಡು ಬೆಳೆ ಬೆಳೆಯುವ ಜತೆಗೆ, ಹಗಲು ರಾತ್ರಿ ಜಮೀನುಗಳಲ್ಲಿ ಮರಗಳ ಮೇಲೆ ಅಟ್ಟಣಿ ನಿರ್ಮಾಣ ಮಾಡಿಕೊಂಡು ಕಾವಲು ಕಾಯುತ್ತಿದ್ದಾರೆ. ಆದರೂ ಕಾಡಾನೆಗಳ ದಾಳಿ ತಪ್ಪಿಸಲು ಸಾಧ್ಯವಾಗದ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ಈ ಭಾಗದ ರೈತರ ಅಳಲು.

ಕಾಡಂಚಿನ ಪ್ರದೇಶಗಳಲ್ಲಿನ ರೈತರು ಬೆಳೆ ಬೆಳೆದರೂ ಕೈಗೆ ಸೇರದೆ ಕಂಗಾಲಾಗಿದ್ದು, ಸಂಬಂಧಪಟ್ಟ ಅರಣ್ಯಾಧಿಕಾರಿಗಳು ಹಾಗೂ ಸ್ಥಳೀಯ ಶಾಸಕರು ಇತ್ತ ಗಮನಹರಿಸಿ ಕಾಡುಪ್ರಾಣಿಗಳ ನಿಯಂತ್ರಣಕ್ಕೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂಬುದು ರೈತರ ಒತ್ತಾಯವಾಗಿದೆ.