ಬೆಂಗಳೂರು ಬಳಿಕ ಮೈಸೂರಿನಲ್ಲೂ ಫುಟ್‌ಪಾತ್ ಒತ್ತುವರಿ ತೆರವು

ನಗರಪಾಲಿಕೆ ಆಡಳಿತಾಧಿಕಾರಿಯೂ ಆದ ಪ್ರಾದೇಶಿಕ ಆಯುಕ್ತ ನಿತೇಶ್ ಪಟೇಲ್ ಅಧ್ಯಕ್ಷತೆಯಲ್ಲಿ ಪಾಲಿಕೆ ಸಭಾಂಗಣದಲ್ಲಿ ಆಯೋಜಿಸಿದ್ದ ಕೌನ್ಸಿಲ್ ಸಭೆಯಲ್ಲಿ ಈ ನಿರ್ಣಯ ಕೈಗೊಳ್ಳಲಾಯಿತು. ಪ್ರವಾಸಿ ತಾಣವಾಗಿರುವ ಮೈಸೂರಿನ ಹೃದಯಭಾಗದಲ್ಲಿಯೇ ಜನರು ಸಂಚಾರ ಮಾಡಲು ಆಗದಂತೆ ಫುಟ್‌ಪಾತ್ ಒತ್ತುವರಿ ಆಗಿದೆ. ಇದರಿಂದ ಪಾದಚಾರಿಗಳು ರಸ್ತೆಯಲ್ಲಿ ಸಂಚಾರ ಮಾಡಿ ಅಪಘಾತವೂ ನಡೆಯುತ್ತಿದೆ. ಆದ್ದರಿಂದ ಬೆಂಗಳೂರಿನಂತೆ ಮೈಸೂರಿನಲ್ಲಿಯೂ ಸುಪ್ರೀಂಕೋರ್ಟ್ ಆದೇಶದಂತೆ ತೆರವು ಕಾರ್ಯಾಚರಣೆ ನಡೆಯಬೇಕು ಎಂದು ನಿತೇಶ್ ಪಾಟೀಲ್ ಸೂಚಿಸಿದರು.

ಕಳೆದ ಎರಡ್ಮೂರು ವರ್ಷಗಳಲ್ಲಿ ಫುಟ್‌ಪಾತ್‌ನ ಕ್ಯಾಂಟೀನ್‌ನಲ್ಲಿ ಅಡುಗೆ ಎಣ್ಣೆ ಬಾಣಲಿಗೆ ಬಿದ್ದು ಬಾಲಕಿ ಮೃತಪಟ್ಟಿದ್ದಳು. ಮತ್ತೊಂದು ಪ್ರಕರಣದಲ್ಲಿ ಮಹಿಳೆ ಸಾವು ಸಂಭವಿಸಿತ್ತು. ಆದರೂ ಫುಟ್‌ಪಾತ್ ತೆರವುಗೊಳಿಸಿಲ್ಲ ಎಂದು ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು.

ನಗರಪಾಲಿಕೆಯ ಎಲ್ಲ ವಲಯ ಕಚೇರಿ ವ್ಯಾಪ್ತಿಯಲ್ಲೂ ಕಟ್ಟುನಿಟ್ಟಾಗಿ ತೆರವು ಕಾರ್ಯಾಚರಣೆ ನಡೆಯಬೇಕು. ಈ ವೇಳೆ ಸೂಕ್ತ ರಕ್ಷಣೆ ನೀಡುವಂತೆ ಪೊಲೀಸರಿಗೆ ಅಧಿಕೃತ ಪತ್ರ ಬರೆಯಬೇಕು. ಸೆಸ್ಕ್, ಪಾಲಿಕೆ ತಂಡ ಒಟ್ಟಾಗಿ ಕಾರ್ಯಾಚರಣೆ ನಡೆಸಬೇಕು. ಈ ಬಗ್ಗೆ ಮುಂದಿನ ಕೌನ್ಸಿಲ್ ಸಭೆಯಲ್ಲಿ ಸವಿವರ ನೀಡಬೇಕು. ಗೊಂದಲ ಆಗದಂತೆ ಎಚ್ಚರಿಕೆ ವಹಿಸಬೇಕು ಎಂದು ತಿಳಿಸಿದರು.

ಶಾಶ್ವತ ಅಂಗಡಿ ನಿರ್ಮಾಣ

ಪಾಲಿಕೆ ಆಯುಕ್ತ ಶೇಖ್ ತನ್ವೀರ್ ಆಸಿಫ್ ಮಾತನಾಡಿ, ಪಾಲಿಕೆಯಿಂದ ಈ ಹಿಂದೆ ಕೆಲವೆಡೆ ಫುಟ್‌ಪಾತ್ ಒತ್ತುವರಿ ತೆರವುಗೊಳಿಸಲಾಗಿತ್ತು. ಆದರೆ, ಈಗ ಮತ್ತೆ ವಿಶಾಲ ರಸ್ತೆಗಳ ಫುಟ್‌ಪಾತ್‌ಗಳನ್ನು ಒತ್ತುವರಿ ಮಾಡಿಕೊಂಡು ಶಾಶ್ವತ ಅಂಗಡಿ, ಕ್ಯಾಂಟೀನ್ ಮಾಡಿಕೊಳ್ಳಲಾಗಿದೆ. ಹಾಗಾಗಿ ಶೀಘ್ರವೇ ತೆರವು ಕಾರ್ಯಾಚರಣೆ ನಡೆಸಬೇಕು ಎಂದು ಸೂಚನೆ ನೀಡಿದರು.

ಮಳಿಗೆಗಳ ಮಾಲೀಕರೇ ಅಂಗಡಿ ಮುಂದೆ ವಸ್ತುಗಳನ್ನು ಇಟ್ಟು ಪಾದಚಾರಿಗಳಿಗೆ ತೊಂದರೆ ನೀಡುತ್ತಿದ್ದಾರೆ. ಮೊದಲು ಇಂಥವರ ವಿರುದ್ಧವೇ ಕ್ರಮ ವಹಿಸಬೇಕು. ರೂಫ್ ಟಾಪ್ ಸೇರಿದಂತೆ ವಾಣಿಜ್ಯ ಕಟ್ಟಡಗಳು ಸಿಆರ್, ಪಾಲಿಕೆಯಿಂದ ಪರವಾನಗಿ ಪಡೆದುಕೊಳ್ಳದಿದ್ದರೆ ಅಂತಹ ಕಟ್ಟಡಗಳ ವಿದ್ಯುತ್ ಸಂಪರ್ಕ ರದ್ದು ಪಡಿಸಲು ಸೆಸ್ಕ್‌ಗೆ ಪತ್ರ ಬರೆದು ಕ್ರಮವಹಿಸಿ ಎಂದರು.

ಜೀವನೋಪಾಯಕ್ಕೆ ಯಾರು, ವಾಣಿಜ್ಯ ಉದ್ದೇಶದಿಂದ ಯಾರು ಫುಟ್‌ಪಾತ್ ಒತ್ತುವರಿ ಮಾಡಿಕೊಂಡಿದ್ದಾರೆ ಎನ್ನುವುದನ್ನು ಗಮನಿಸಿ. ವಾಣಿಜ್ಯ ಉದ್ದೇಶದವರನ್ನು ಮೊದಲು ತೆರೆವುಗೊಳಿಸಿ. ಸಂಚಾರಕ್ಕೆ ತೊಂದರೆ ಆಗುವಂತೆ ನಾಮಫಲಕ, ್ಲೆಕ್ಸ್ ಬೋರ್ಡ್, ಸೈನ್‌ಬೋರ್ಡ್ ಅಳವಡಿಸಿದ್ದರೂ ತೆರವು ಮಾಡಬೇಕು. ಇದರ ಜವಾಬ್ದಾರಿಯನ್ನು ವಲಯ ಆಯುಕ್ತರು, ಅಭಿವೃದ್ಧಿ ಅಧಿಕಾರಿಗಳು ತೆಗೆದುಕೊಳ್ಳಬೇಕು ಎಂದು ನಿರ್ದೇಶನ ನೀಡಿದರು.

ಅಂಗವಿಕಲರಿಗೆ ಸೌಲಭ್ಯ ನೀಡಿ:

ನಗರಪಾಲಿಕೆಯಲ್ಲಿ ಅಂಗವಿಕಲರಿಗಾಗಿ ಮೀಸಲಿಟ್ಟ 25 ಕೋಟಿ ರೂ. ಅನುದಾನ ಕೆಲ ವರ್ಷಗಳಿಂದ ಹಾಗೆಯೇ ಉಳಿದಿದೆ. ಇದನ್ನು ಸಮರ್ಪಕವಾಗಿ ಬಳಸಿಕೊಳ್ಳಬೇಕು ಎಂದು ನಿತೇಶ್ ಪಟೇಲ್ ನಿರ್ದೇಶನ ನೀಡಿದರು.

ನಗರದಲ್ಲಿ ಎಷ್ಟುಮಂದಿ ಅಂಗವಿಕಲರಿದ್ದಾರೆಂಬ ಮಾಹಿತಿ ಪಾಲಿಕೆಯಲ್ಲಿ ಇಲ್ಲ. ಅಂಗವಿಕಲರಿಂದ ಅರ್ಜಿ ಪಡೆದು ಸೌಲಭ್ಯ ನೀಡಿ. ವಾರ್ಡ್ ವಾರು ಸಮೀಕ್ಷೆ ನಡೆಸಿ, ಇದಕ್ಕೆ ಅಂಗವಿಕಲರ ಕಲ್ಯಾಣ ಇಲಾಖೆ, ಎನ್‌ಜಿಒಗಳ ಸಹಕಾರ ಪಡೆದುಕೊಳ್ಳಿ. ಮುಂದಿನ ಸಭೆಯಲ್ಲಿ ಅಂಗವಿಕಲರ ಅಂಕಿ-ಅಂಶ ನೀಡಿ ಎಂದರು.

ನಗರಪಾಲಿಕೆಯ ಅಧಿಕೃತ ವೆಬ್‌ಸೈಟ್‌ನಲ್ಲಿ ಅಂಗವಿಕಲರಿಗೆ ಸಾಲಸೌಲಭ್ಯ, ಸಲಕರಣೆ ವಿತರಿಸಲು ಅರ್ಹರಿಂದ ಅರ್ಜಿ ಆಹ್ವಾನಿಸುವ ಬಗ್ಗೆ ಅಪ್ಲೋಡ್ ಮಾಡಿ. ಸಹಾಯವಾಣಿ ಸಂಖ್ಯೆ ನೀಡಿ ಎಂದು ಆದೇಶಿಸಿದರು.

ಪಾಲಿಕೆ ಜಾಗ, ಮಳಿಗೆಗಳನ್ನು ಮರು ಟೆಂಡರ್ ನಡೆಸಬೇಕು ಎಂದು ನಗರಪಾಲಿಕೆ ಆಡಳಿತಾಧಿಕಾರಿ ನಿತೇಶ್‌ಪಾಟೀಲ್ ಸೂಚಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಅಧಿಕಾರಿಗಳು, ನಗರದ ವಿವಿಧ ಭಾಗದಲ್ಲಿರುವ ಪಾಲಿಕೆಯ ಖಾಲಿ ಸ್ಥಳ, ಪೆಟ್ರೋಲ್ ಬಂಕ್ ಹಾಗೂ ವ್ಯಾಪಾರಿ ಮಳಿಗೆಗಳನ್ನು ಗುತ್ತಿಗೆ ನೀಡಲು ಟೆಂಡರ್ ಕರೆಯಲಾಗಿತ್ತು. ಈ ಬಗ್ಗೆ ಹೆಚ್ಚಿನ ಪ್ರತಿಕ್ರಿಯೆ ಬಂದಿಲ್ಲ ಎಂದರು.

ಮರು ಟೆಂಡರ್ ಕರೆಯಬೇಕು. ಹೆಚ್ಚು ಜನರ ಭಾಗವಹಿಸಿದರೆ ಪಾಲಿಕೆಗೆ ಆದಾಯ ಹೆಚ್ಚುತ್ತದೆ ಎಂದು ನಿತೇಶ್‌ಪಾಟೀಲ್ ಸೂಚಿಸಿದರು.

ಕಳೆದ ಕೌನ್ಸಿಲ್‌ನಲ್ಲಿ ಕೆಲ ಕಾಮಗಾರಿಗಳಿಗೆ ಒಪ್ಪಿಗೆ ಸೂಚಿಸಿದ್ದರೂ ಆ್ಯಕ್ಷನ್ ಪ್ಲ್ಯಾನ್ ಮಾಡಲು ವಿಳಂಬ ಮಾಡಿರುವುದು ಮತ್ತು ಡಿಸಿ ಕಚೇರಿಗೆ ಕಡತ ಕಳಿಸಿ, ಅದರ ಅನುಪಾಲನೆ ಮಾಡದಿರುವುದನ್ನು ಗಮನಿಸಿದ ಆಡಳಿತಾಧಿಕಾರಿಗಳು, ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು. ವಾರ್ಡ್ ಸಮಿತಿ ರಚನೆ, ಪೌರಕಾರ್ಮಿಕರಿಗೆ ವಿತರಿಸುವ ಸಮವಸ್ತ್ರದ ಗುಣಮಟ್ಟ ಪರೀಕ್ಷಿಸಲು ಸೂಚಿಸಿದರು.