ಮುತ್ತೈದೆಯರ ಪೂಜೆ, ಕೊಂಡೋತ್ಸವ ಸಂಭ್ರಮ

ತಿ.ನರಸೀಪುರ: ತಾಲೂಕಿನ ದೊಡ್ಡನಹುಂಡಿ ಗ್ರಾಮದಲ್ಲಿ ಸೋಮವಾರ ಮುತ್ತೈದೆಯರ ಪೂಜೆ ಹಾಗೂ ಕೊಂಡೋತ್ಸವ ವಿಜೃಂಭಣೆಯಿಂದ ನೆರವೇರಿತು.

ಹಬ್ಬದ ಹಿನ್ನೆಲೆಯಲ್ಲಿ ಶ್ರೀಮಹದೇಶ್ವರ ದೇವಸ್ಥಾನವನ್ನು ತಳಿರು- ತೋರಣ, ವಿದ್ಯುತ್ ದೀಪಗಳಿಂದ ಅಲಂಕರಿಸಲಾಗಿತ್ತು. ದೇಗುಲದಲ್ಲಿ ಬೆಳಗ್ಗೆಯಿಂದಲೇ ವಿವಿಧ ಅಭಿಷೇಕ ಹಾಗೂ ಪೂಜೆ ನೆರವೇರಿದವು. ಮಧ್ಯಾಹ್ನ 12ಗಂಟೆಗೆ ಗಂಗಾಪೂಜೆ ನೆರವೇರಿಸಲಾಯಿತು. ನಂತರ ಮಂಗಳವಾದ್ಯ, ಬಸವ, ಸುಮಂಗಲಿಯರ ಕಳಸ ಕನ್ನಡಿಯೊಂದಿಗೆ ಮೆರವಣಿಗೆ ನಡೆಯಿತು.

1 ಗಂಟೆಗೆ ಶ್ರೀಮಹದೇಶ್ವರ ಹಾಗೂ ಶ್ರೀ ಸೀಸಳ್ಳಿ ಮಾರಮ್ಮ ದೇವಿ ಅವಾಹನೆಯಾದ ಅರ್ಚಕರು, ಭಕ್ತರ ಜಯಘೋಷದೊಂದಿಗೆ ಕೊಂಡ ಹಾಯ್ದರು. ಭಕ್ತರಿಗೆ ಅನ್ನಪ್ರಸಾದ, ಪಾನಕ, ಮಜ್ಜಿಗೆ ವಿತರಿಸಲಾಯಿತು.

ಬದನವಾಳು ದಿಲೀಪ್ ಶಾಸ್ತ್ರಿ ಮತ್ತು ತಂಡದಿಂದ ಶ್ರೀ ಶನಿಮಹಾತ್ಮ ಹರಿಕಥೆ ನಡೆಯಿತು.