ಶಿರಾಗೇಟ್​ ಫಾರ್ಮ್ ಹೌಸ್ ನಲ್ಲಿ ರಾಜೇಂದ್ರ ಕೊಲೆಗೆ ಸಂಚು !?

ತುಮಕೂರು: ಕೊಲೆಗೆ ಸಂಚು ರೂಪಿಸಿರುವ ಬಗ್ಗೆ ಶುಕ್ರವಾರ ಮಧ್ಯಾಹ್ನ 12.30ರಲ್ಲಿ ಆರ್​.ರಾಜೇಂದ್ರ ಸಲ್ಲಿಸಿದ ದೂರಿನ ಹಿನ್ನೆಲೆ ಭಾರತೀಯ ನ್ಯಾಯ ಸಂಹಿತಾ (ಬಿಎನ್​ಎಸ್​) ಅಡಿ ಕಲಂ 109, 329 (4), 61(2), ಸೆಕ್ಷನ್​ 190ರಡಿ ಸೋಮ, ಭರತ್​, ಅಮಿತ್​, ಗುಂಡ, ಯತೀಶ್​ ಹಾಗೂ ಇತರರ ವಿರುದ್ಧ ಎಫ್ ಐಆರ್ ದಾಖಲಿಸಲಾಗಿದೆ.

ಮಹಿಳೆ ಜತೆ ಹುಡಗನೊಬ್ಬ ಸಂಭಾಷಣೆ ನಡೆಸಿರುವ ಆಡಿಯೋ ರೆಕಾರ್ಡ್​ನಲ್ಲಿ ಕೊಲೆಗೆ ಸಂಚು ರೂಪಿಸಿರುವುದರ ಬಗ್ಗೆ ಜನವರಿಯಲ್ಲಿ ಮಾಹಿತಿ ದೊರೆತಿದ್ದು ಈ ಸಾಕ್ಷ್ಯವನ್ನು ಪೆನ್ ಡ್ರೈವ್​ ನಲ್ಲಿ ಪೊಲೀಸರಿಗೆ ರಾಜೇಂದ್ರ ನೀಡಿದ್ದಾರೆ.

ಶಿರಾಗೇಟ್​ ಫಾರ್ಮ್ ಹೌಸ್ ​ನಲ್ಲಿ ಸಂಚು !

ಹಿರಿಯ ಮಗಳ ಜನ್ಮದಿನದ ಸಂದರ್ಭದಲ್ಲಿ ಶಾಮಿಯಾನ ಹಾಕುವ ಕಾರ್ಮಿಕರ ವೇಷಧಾರಿಯಾಗಿ ಬಂದು ಕೊಲೆಗೆ ಸಂಚು ರೂಪಿಸಿ ಅಕ್ರಮವಾಗಿ ಸುಪಾರಿ ಕಿಲ್ಲರ್​ಗಳು ರಾಜೇಂದ್ರ ಮನೆ ಪ್ರವೇಶಿಸಿದ್ದರು. ಈ ಯೋಜನೆ ವಿಫಲವಾಗಿತ್ತು.

ಹಾಗಾಗಿ, ಮುಂದೊಂದು ದಿನ ಹತ್ಯೆ ಮಾಡಲು ರಾಜೇಂದ್ರ ಕಾರಿಗೆ ಜಿಪಿಎಸ್​ ಸಹ ಅಳವಡಿಸಲು ಸಂಚು ರೂಪಿಸಿರುವುದು ಆಡಿಯೋ ತುಣುಕಿನಲ್ಲಿದೆ. ಬಳಿಕ ಈ ತಂಡವು ಶಿರಾ ಗೇಟ್​ನ ಫಾರ್ಮ್ ಹೌಸ್​ನಲ್ಲಿ ಮತ್ತೊಮ್ಮೆ ಸಂಚು ರೂಪಿಸಿ ಅಕ್ರಮ ಶಸ್ತ್ರಾಸ್ತ್ರಗಳನ್ನು ಸಂಗ್ರಹಿಸಿ ಕೃತ್ಯಕ್ಕೆ ಕಾರು ಸಹ ಖರೀದಿಸಿದ್ದರು. ಬೆಂಗಳೂರಿನ ಕಲಾಸಿಪಾಳ್ಯ, ತುಮಕೂರು, ಮಧುಗಿರಿಯಲ್ಲಿ ರಾಜೇಂದ್ರ ಚಲನವಲನಗಳ ಮೇಲೆ ಕಣ್ಣಿಡಲು ಮಾಹಿತಿದಾರರನ್ನು ಸಹ ನೇಮಿಸಿಕೊಂಡಿರುವುದು ದೂರಿನಲ್ಲಿ ದಾಖಲಿಸಲಾಗಿದೆ.