ಕೊಲೆಗೆ ಸುಪಾರಿ ಎಸ್ಪಿಗೆ ದೂರು ಕೊಟ್ಟ ಎಂಎಲ್ಸಿ ರಾಜಣ್ಣ

ತುಮಕೂರು: ಸಚಿವ ಕೆ.ಎನ್​.ರಾಜಣ್ಣ ಪುತ್ರ ಎಂಎಲ್ಸಿ ಆರ್​.ರಾಜೇಂದ್ರ ಶುಕ್ರವಾರ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಕೆ.ವಿ.ಅಶೋಕ್​ರನ್ನು ಭೇಟಿ ಮಾಡಿ ತನ್ನ ಕೊಲೆಗೆ ಸುಪಾರಿ ನೀಡಿರುವ ಕುರಿತ ಸಾಕ್ಷ್ಯ ಒದಗಿಸುವ "ಪೆನ್ ಡ್ರೈವ್​' ಸಮೇತ ಲಿಖಿತ ದೂರನ್ನು ಸಲ್ಲಿಸಿದರು. ಎಸ್ಪಿ ಸೂಚನೆಯಂತೆ ಕೊಲೆಗೆ ಯತ್ನಿಸಿದ್ದ ಘಟನೆ ನಡೆದ ಸ್ಥಳದ ವ್ಯಾಪ್ತಿಗೆ ಬರಲಿರುವ ಕ್ಯಾತಸಂದ್ರ ಠಾಣೆಗೆ ತೆರಳಿದ ರಾಜೇಂದ್ರ ಮಧ್ಯಾಹ್ನ ಠಾಣಾಧಿಕಾರಿ ಬಳಿ ದೂರು ನೀಡಿದರು.

ಡಿಜಿಪಿ ಅಲೋಕ್​ ಮೋಹನ್​ರನ್ನು ಬೆಂಗಳೂರಿನಲ್ಲಿ ಗುರುವಾರ ಭೇಟಿ ಮಾಡಿ ತಮ್ಮ ಕೊಲೆಗೆ ಯತ್ನಿಸಿದ್ದಾಗಿ ದೂರು ನೀಡಿದ್ದ ರಾಜೇಂದ್ರರನ್ನು ತುಮಕೂರು ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಭೇಟಿ ಮಾಡಿ ಲಿಖಿತ ದೂರು ಸಲ್ಲಿಸಲು ಸೂಚಿಸಿದ್ದರು. ಈ ಹಿನ್ನೆಲೆ ಶುಕ್ರವಾರ ಬೆಳಗ್ಗೆ 11.15ರ ಹೊತ್ತಿಗೆ ಜಿಲ್ಲಾ ಪೊಲೀಸ್​ ಕಚೇರಿಗೆ ಭೇಟಿಯಿತ್ತ ರಾಜೇಂದ್ರ ದೂರಿನ ಪ್ರತಿ ಜತೆ "ಪೆನ್ ಡ್ರೈವ್​'ಸಹ ಸಲ್ಲಿಸಿದರು. ಈ ವೇಳೆ 30 ನಿಮಿಷಗಳಿಗು ಹೆಚ್ಚು ಕಾಲ ರಾಜೇಂದ್ರರೊಂದಿಗೆ ಎಸ್ಪಿ ಚರ್ಚೆ ನಡೆಸಿ ಸಾಕಷ್ಟು ಮಾಹಿತಿ ಪಡೆದುಕೊಂಡರು. ಅಷ್ಟರೊಳಗೆ ಕ್ಯಾತಸಂದ್ರ ಪಿಎಸ್​ಐ ಚೇತನ್​ ಕುಮಾರ್​ರನ್ನು ಕಚೇರಿಗೆ ಕರೆಸಿಕೊಂಡರು.

ಕ್ಯಾತಸಂದ್ರ ಠಾಣೆಗೆ ದೂರು: ಘಟನೆ ನಡೆದ ಸ್ಥಳದ ವ್ಯಾಪ್ತಿಗೆ ಬರುವ ಕ್ಯಾತಸಂದ್ರ ಠಾಣೆಯಲ್ಲಿ ದೂರು ನೀಡುವಂತೆ ಎಸ್ಪಿ ಸಲಹೆ ನೀಡಿದ ಹಿನ್ನೆಲೆಯಲ್ಲಿ ಎಸ್ಪಿ ಕಚೇರಿಯಿಂದ ನೇರವಾಗಿ ಅಲ್ಲಿಗೆ ತೆರಳಿದ ರಾಜೇಂದ್ರ ದೂರು ಸಲ್ಲಿಸಿದರು. ಈ ದೂರಿನ ಹಿನ್ನೆಲೆ ಎಫ್ ಐಆರ್​ ದಾಖಲಿಸಿಕೊಂಡ ಪೊಲೀಸರು ಮುಂದಿನ ತನಿಖೆ ಕೈಗೊಂಡಿದ್ದಾರೆ.

ಪೆನ್ ಡ್ರೈವ್​ ನಲ್ಲಿ 18 ನಿಮಿಷದ ಸಂಭಾಷಣೆ !!

ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಕೆ.ವಿ.ಅಶೋಕ್​ ನೀಡಿದ ದೂರಿನ ಪ್ರತಿ ಜತೆಗೆ "ಪೆನ್ ಡ್ರೈವ್​' ಅನ್ನು ಪರಿಷತ್​ ಸದಸ್ಯ ರಾಜೇಂದ್ರ ಸಲ್ಲಿಸಿದ್ದರು. ದೂರು ನೀಡಿ ಹೊರಬಂದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ರಾಜೇಂದ್ರ "ಪೆನ್ ಡ್ರೈವ್​' ರಹಸ್ಯ ಬಿಚ್ಚಿಟ್ಟಿರು. ನನ್ನ ಕೊಲೆಗೆ ಯತ್ನಿಸಿ ಸುಪಾರಿ ಕೊಟ್ಟಿರುವ ಕುರಿತು ಮಹಿಳೆ ಮತ್ತು ಹುಡಗನೊಬ್ಬನ ಜತೆಗಿನ ಸಂಭಾಷಣೆಯ 18 ನಿಮಿಷಗಳ "ಆಡಿಯೋ' ಸಾಕ್ಷ್ಯವನ್ನು ಒದಗಿಸಲಾಗಿದೆ. ಈ ಆಡಿಯೋದಲ್ಲಿ ಸೋಮ, ಭರತ ಎಂಬುವರ ಹೆಸರು ಪ್ರಸ್ತಾಪವಾಗಿದೆ. ಒಟ್ಟು 70 ಲಕ್ಷಕ್ಕೆ ನನ್ನ ಕೊಲ್ಲಲು ಸುಪಾರಿ ಕೊಟ್ಟಿದ್ದು 5 ಲಕ್ಷ ಮುಂಗಡವಾಗಿ ಅವರಿಬ್ಬರ ಖಾತೆಗು ಜಮಾ ಮಾಡಿರುವ ವಿಷಯವು ಸಂಭಾಷಣೆಯಲ್ಲಿದೆ. ನನ್ನ ಮಗಳ ಹುಟ್ಟುಹಬ್ಬದ ಸಂದರ್ಭದಲ್ಲಿ ಶಾಮಿಯಾನ ಹಾಕಲು ಬಂದಿದ್ದ ವೇಳೆ ಈ ಯತ್ನ ಮಾಡಲಾಗಿದೆ ಎಂಬುದನ್ನು ಮಾಧ್ಯಮಗಳ ಮುಂದಿಟ್ಟರು.