ಧರ್ಮಾ ಕಾಲುವೆಗೆ ಬಿದ್ದ ತಾಯಿ, ಮಗನ ಶವ ಪತ್ತೆ

ಹಾನಗಲ್ಲ: ಕಂಚಿನೆಗಳೂರಿನಿಂದ ಕಾಡಶೆಟ್ಟಿಹಳ್ಳಿಗೆ ಬೈಕ್​ನಲ್ಲಿ ಬರುತ್ತಿದ್ದ ತಾಯಿ-ಮಗ ಮಂಗಳವಾರ ರಾತ್ರಿ ಧರ್ಮಾ ಕಾಲುವೆಗೆ ವಾಹನದೊಂದಿಗೆ ಬಿದ್ದಿದ್ದು, ಬುಧವಾರ ಬೆಳಗ್ಗೆ ಅಗ್ನಿಶಾಮಕ ದಳದ ಸಿಬ್ಬಂದಿ ಇಬ್ಬರ ಶವಗಳನ್ನು ಹೊರತೆಗೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ಕಂಚಿನೆಗಳೂರು-ಕಾಡಶೆಟ್ಟಿಹಳ್ಳಿ ಮಧ್ಯದಲ್ಲಿರುವ ಧರ್ವ ಕಾಲುವೆಯ ಸಮೀಪದ ತಿರುವಿನಲ್ಲಿ ಮಂಗಳವಾರ ರಾತ್ರಿ ಬೈಕ್​ನಲ್ಲಿದ್ದ ಬರುತ್ತಿದ್ದ ಬಸವರಾಜ ಕುಂದೂರ (24) ಹಾಗೂ ಚನ್ನವ್ವ ಪಂಚಾಕ್ಷರಿ ಕುಂದೂರ (42) ಕಾಲುವೆಯಲ್ಲಿ ಬಿದ್ದು ನೀರಿನಲ್ಲಿ ಮುಳುಗಿದ್ದರು. ಸುಮಾರು 8 ಅಡಿಗಳಷ್ಟಿದ್ದ ನೀರಿನಲ್ಲಿ ಅಗ್ನಿಶಾಮಕ ಸಿಬ್ಬಂದಿ ರಾತ್ರಿಯಿಡಿ ಶೋಧ ಕಾರ್ಯ ನಡೆಸಿದ್ದರೂ ಶವ ದೊರೆತಿರಲಿಲ್ಲ. ಬುಧವಾರ ಬೆಳಗ್ಗೆ ತಾಯಿ-ಮಗನ ಶವ ಪತ್ತೆಯಾಗಿದ್ದು, ಸಂಬಂಧಿಕರ ಆಕ್ರಂದನ ಮುಗಿಲು ಮುಟ್ಟಿತ್ತು. ರಸ್ತೆ ತಿರುವಿನಲ್ಲಿ ಬೈಕ್ ನಿಯಂತ್ರಿಸಲಾಗದೇ ರಸ್ತೆ ಪಕ್ಕದ ಧರ್ವ ಕಾಲುವೆಗೆ ವಾಹನ ಸಮೇತ ಬಿದ್ದಿದ್ದಾರೆ. ವಾಹನವನ್ನು ವೇಗವಾಗಿ ಚಲಾಯಿಸಿದ್ದರಿಂದ ತಿರುವಿನಲ್ಲಿ ಬೈಕ್ ನಿಯಂತ್ರಣಗೊಳ್ಳಲಿಲ್ಲ ಎನ್ನಲಾಗಿದ್ದು, ತಾಯಿ-ಮಗ ದುರಂತ ಸಾವಿಗೀಡಾಗಿದ್ದಾರೆ.

ಶ್ರೀನಿವಾಸ ಮಾನೆ ಭೇಟಿ: ವಿಧಾನ ಪರಿಷತ್ ಸದಸ್ಯ ಶ್ರೀನಿವಾಸ ಮಾನೆ ಧರ್ವ ಕಾಲುವೆ ಸ್ಥಳಕ್ಕೆ ಬುಧವಾರ ಭೇಟಿ ನೀಡಿ, ಘಟನೆಯ ವಿವರ ಪಡೆದರು. ಮೃತರ ಕುಟುಂಬದ ಸದಸ್ಯರಿಗೆ ಸಾಂತ್ವನ ಹೇಳಿದರು. ತಾಲೂಕು ತಹಸೀಲ್ದಾರ್ ಪಿ.ಎಸ್.ಎರ್ರಿಸ್ವಾಮಿ, ಸಿಪಿಐ ಶಿವಶಂಕರ ಗಣಾಚಾರಿ, ಆಡೂರ ಪಿಎಸ್​ಐ ಆಂಜನೇಯ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ. ಈ ಕುರಿತು ಆಡೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.