ಜನರ ಮೇಲೆ ವಾನರ ಗುಂಪು ದಾಳಿ : ಕುಂಬಳೆ, ಮುಳಿಯಾರಿನಲ್ಲಿ ಘಟನೆ

ಕಾಸರಗೋಡು: ಕುಂಬಳೆಯಲ್ಲಿ ಕೋತಿ ದಾಳಿಯಿಂದ ಮದ್ರಸಾ ಶಿಕ್ಷಕ ಹಾಗೂ ಸೈಕಲ್ ಸವಾರ ವಿದ್ಯಾರ್ಥಿ ಗಾಯಗೊಂಡಿದ್ದಾರೆ. ಕುಂಬಳೆ ಸಿಎಚ್‌ಸಿ ರಸ್ತೆಯಲ್ಲಿರುವ ಮದ್ರಸಾ ಶಿಕ್ಷಕ ಪವಾಸ್ ದಾರಿಮಿ ಹಾಗೂ ಇದೇ ಹಾದಿಯಾಗಿ ಸೈಕಲ್ ಸವಾರ ವಿದ್ಯಾರ್ಥಿ ಮೇಲೆ ಕೋತಿ ದಾಳಿ ನಡೆಸಿದೆ. ಮದ್ರಸಾ ಎದುರಿನ ಗೇಟ್ ಮುಚ್ಚಲು ತೆರಳಿದ್ದ ಸಂದರ್ಭ ಮರದಲ್ಲಿದ್ದ ಕೋತಿ ಏಕಾಏಕಿ ಪವಾಸ್ ದಾರಿಮಿ ತಲೆಮೇಲೆ ಜಿಗಿದು ಪರಚಿ ಗಾಯಗೊಳಿಸಿದೆ. ಇದೇ ರಸ್ತೆಯಲ್ಲಿ ಸೈಕಲಲ್ಲಿ ಸಂಚರಿಸುತ್ತಿದ್ದ ವಿದ್ಯಾರ್ಥಿ ಮೇಲೆ ಜಿಗಿದ ಪರಿಣಾಮ ವಿದ್ಯಾರ್ಥಿ ಸೈಕಲಿಂದ ಬಿದ್ದು ಗಾಯಗೊಂಡಿದ್ದಾರೆ.

ಮಹಿಳೆ ಕೈಮೂಳೆ ಮುರಿತ

ಮುಳಿಯಾರು ಪಂಚಾಯಿತಿಯ ಬಾವಿಕ್ಕರ ಕೊಳತ್ತಿಂಗಾಲ್ ಎಂಬಲ್ಲಿ ತೆಂಗಿನಮರವೇರಿದ್ದ ಕೋತಿಯೊಂದು ತೆಂಗಿನಕಾಯಿ ಎಸೆದ ಪರಿಣಾಮ ಮಹಿಳೆ ಕೈಮೂಳೆ ಮುರಿದ ಘಟನೆ ನಡೆದಿದೆ. ಇಲ್ಲಿನ ನಿವಾಸಿ ಕೃಷ್ಣನ್ ನಾಯರ್ ಎಂಬುವರ ಪತ್ನಿ ಸಾವಿತ್ರಿ ಎಂಬುವರ ಕೈಮೂಳೆ ಮುರಿದಿದೆ. ಸಾವಿತ್ರಿ ಮನೆ ಎದುರಿನ ನೀರಿನ ಟ್ಯಾಪಲ್ಲಿ ಪಾತ್ರೆ ತೊಳೆಯಲು ಹೊರಬಂದಾಗ ಮರದಲ್ಲಿದ್ದ ಕೋತಿ ತೆಂಗಿನಕಾಯಿಯನ್ನು ಬಲವಾಗಿ ಎಸೆದಿದ್ದು, ಇದು ಸಾವಿತ್ರಿ ಅವರ ಕೈಗೆ ಬಿದ್ದು, ಮೂಳೆ ಮುರಿತಕ್ಕೆ ಕಾರಣವಾಗಿದೆ. ಈ ಪ್ರದೇಶದಲ್ಲಿ ವ್ಯಾಪಕವಾಗಿ ಕೃಷಿನಾಶ ನಡೆಸುತ್ತಿರುವ ವಾನರ ಗುಂಪು, ಇದೀಗ ಮಾನವ ಜೀವಕ್ಕೂ ಅಪಾಯ ತಂದೊಡ್ಡಲಾರಂಭಿಸಿದೆ.

https://www.vijayavani.net/karthika-puja-invitation-issued-in-pulkur-constituency

https://www.vijayavani.net/kumble-upazila-kerala-school-science-festival