ಅಧಿಕಾರಿಗೆ ಧಮ್ಕಿ ಪ್ರಕರಣ ಶಾಸಕ ಬಾಲಕೃಷ್ಣ ನಿರ್ದೋಷಿ

ಮಾಗಡಿ

ಪೊಲೀಸ್​ ಠಾಣೆಗೆ ನುಗ್ಗಿ ಸಿಪಿಐಗೆ ಧಮ್ಕಿ ಹಾಕಿದ್ದ ಪ್ರಕರಣದಲ್ಲಿ ಶಾಸಕ ಬಾಲಕೃಷ್ಣ ಸೇರಿ 16 ಮಂದಿ ವಿರುದ್ಧದ ಪ್ರಕರಣವನ್ನು ಬೆಂಗಳೂರಿನ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯ ವಜಾಗೊಳಿಸಿದೆ.

ತಾಲೂಕಿನ ಐಯ್ಯಂಡಹಳ್ಳಿ ರಂಗಸ್ವಾಮಿ ಎಂಬುವರು ಎಚ್​.ಸಿ.ಬಾಲಕೃಷ್ಣ ಅವರ ಕಾರ್ಯಕರ್ತರ ಮೇಲೆ ದೌರ್ಜನ್ಯ ಎಸಗಿದರೂ ಈ ಬಗ್ಗೆ ಸಿಪಿಐ ನಂದೀಶ್​ ಕ್ರಮಕೈಗೊಳ್ಳದೆ ಒಬ್ಬರ ಪರವಾಗಿದ್ದಾರೆ ಎಂದು 7 ವರ್ಷದ ಹಿಂದೆ ಕುದೂರು ಪೊಲೀಸ್​ ಠಾಣೆಗೆ ಬೆಂಬಲಿಗರೊಂದಿಗೆ ತೆರಳಿ ಸಿಪಿಐ ಅವರನ್ನು ಅವ್ಯಾಚ್ಯವಾಗಿ ನಿಂದಿಸಿ, ವಾಗ್ವಾದ ನಡೆಸಿದ್ದರು ಎಂಬ ವಿಚಾರವಾಗಿ ಎಚ್​.ಸಿ.ಬಾಲಕೃಷ್ಣ ಸೇರಿ 16 ಮಂದಿ ವಿರುದ್ಧ ಎಫ್​ಐಆರ್​ ದಾಖಲಾಗಿತ್ತು.

16 ಮಂದಿಯೂ ಮಾಗಡಿ ಒಂದನೇ ಜೆಎಂಎಫ್​ಸಿ ಕೋರ್ಟ್​ನಲ್ಲಿ ಜಾಮೀನು ಪಡೆದಿದ್ದರು. ನಂತರ, ಬೆಂಗಳೂರಿನ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯದಲ್ಲಿ ಪ್ರಕರಣ ನಡೆಯುತ್ತಿದ್ದು, ಎರಡು ವರ್ಷದ ಹಿಂದೆ ಪ್ರಮುಖ ಸಾದಾರ ಕೆ.ಆರ್​.ಪುರಂನಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಸಿಪಿಐ ನಂದೀಶ್​ ಮೃತಪಟ್ಟಿದ್ದರು. ಅಂತಿಮವಾಗಿ ಗುರುವಾರ ಆ ಪ್ರಕರಣವನ್ನು ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯ ವಜಾಗೊಳಿಸಿದೆ.

ಎಚ್​.ಸಿ.ಬಾಲಕೃಷ್ಣ, ಬಮುಲ್​ ನಿರ್ದೇಶಕ ನರಸಿಂಹಮೂರ್ತಿ, ಎಂ.ಕೆ.ಧನಂಜಯ, ಹೊನ್ನಾಪುರ ಶಿವಪ್ರಸಾದ್​, ಧನಂಜಯ ನಾಯ್ಕ, ಶಿವರಾಜು, ಲೋಕೇಶ್​, ಮೂರ್ತಿ, ಮಣ್ಣಿಗಾನಹಳ್ಳಿ ಸುರೇಶ್​, ಪೊಲೀಸ್​ ರಾಮಣ್ಣ, ಮಣ್ಣಿಗನಹಳ್ಳಿ ರಮೇಶ್​, ಹುಲಿಕಲ್ಲು ಶಶಿ, ಐಯ್ಯಂಡಹಳ್ಳಿ ಚಂದ್ರು, ಜಿ.ವಿ.ರಾಮಣ್ಣ, ಐಯ್ಯಂಡಹಳ್ಳಿ ಚಂದ್ರಪ್ಪ ಸೇರಿ 16 ಮಂದಿ ವಿರುದ್ಧ ಪ್ರಕರಣ ದಾಖಲಿಸಲಾಗಿತ್ತು.

ಕಾರ್ಯಕರ್ತನಿಗೆ ನೋವಾಗಿರುವ ಬಗ್ಗೆ ಜನಪ್ರತಿನಿಧಿ ನೆಲೆಯಲ್ಲಿ ಮಾತನಾಡಿದ್ದೆ. ಯಾವುದೇ ದ್ವೇಷದಿಂದ, ವೈಯಕ್ತಿಕವಾಗಿ ಮಾತನಾಡಿರಲಿಲ್ಲ. ಈ ಘಟನೆಯನ್ನು ಕೆಲವರು ವೈಭವೀಕರಣ ಮಾಡಿದ್ದರು. ಬೆಂಗಳೂರಿನ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯ ಪರಿಗಣಿಸಿ ವಿಮುಕ್ತಿಗೊಳಿಸಿದೆ.

 ಎಚ್​.ಸಿ.ಬಾಲಕೃಷ್ಣ ಶಾಸಕ