ಮನೋಹರ ಬಳಂಜ ಬೆಳ್ತಂಗಡಿ
ಮೆಸ್ಕಾಂ ಬಿಲ್ ಪಾವತಿಸಲು ಮೆಸ್ಕಾಂ ಉಪ ವಿಭಾಗಗಳಲ್ಲಿ ಅಳವಡಿಸಲಾಗಿದ್ದ ಎಟಿಪಿ (ಎನಿ ಟೈಮ್ ಪೇಮೆಂಟ್) ವ್ಯವಸ್ಥೆಯನ್ನು ಜ.1ರಿಂದ ನಿಲ್ಲಿಸಲಾಗಿದೆ. ಮೆಸ್ಕಾಂ ಉಪ ವಿಭಾಗಗಳಲ್ಲಿ ದಿನದ 24 ಗಂಟೆಯೂ ಬಿಲ್ ಪಾವತಿಗಾಗಿ ಎಟಿಪಿ ಮಷಿನ್ಗಳ ಸೇವೆಯನ್ನು 2010ರಲ್ಲಿ ಆರಂಭಿಸಲಾಗಿತ್ತು. ಗ್ರಾಹಕರಿಗೆ ಪಾವತಿಗೆ ಸುಲಭ ವ್ಯವಸ್ಥೆ ಮಾಡುವುದು ಇದರ ಉದ್ದೇಶವಾಗಿತ್ತು. ಇದು ಮೆಸ್ಕಾಂ ಜಿಲ್ಲೆಯ ಶಿವಮೊಗ್ಗ, ಚಿಕ್ಕಮಗಳೂರು, ಮಂಗಳೂರು ಹಾಗೂ ಉಡುಪಿ ಜಿಲ್ಲೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದು 75 ಉಪವಿಭಾಗಗಳಲ್ಲಿ ಈ ವ್ಯವಸ್ಥೆ ಅಳವಡಿಸಲಾಗಿತ್ತು.
15 ವರ್ಷಗಳಿಂದ ಇದ್ದ ಈ ವ್ಯವಸ್ಥೆಯನ್ನು ನಗರ ಪ್ರದೇಶದ ವಿದ್ಯಾವಂತ ಜನಾಂಗ ಸುಲಭದಲ್ಲಿ ಬಳಸುತ್ತಿದ್ದರೆ, ಗ್ರಾಮೀಣ ಭಾಗದ ಜನರಿಗೆ ಇದು ಹೆಚ್ಚಿನ ಪ್ರಯೋಜನ ನೀಡಿರಲಿಲ್ಲ. ಈ ಕಾರಣದಿಂದ ಹೆಚ್ಚಿನ ಎಟಿಪಿಗಳಲ್ಲಿ ಬೆಳಗ್ಗೆ 9ರಿಂದ ಸಂಜೆ 5ಗಂಟೆ ತನಕ ಸಿಬ್ಬಂದಿಯನ್ನು ನೇಮಿಸಿ ಬಿಲ್ ಪಾವತಿಗೆ ವ್ಯವಸ್ಥೆ ಮಾಡಲಾಗುತ್ತಿತ್ತು. ಎಟಿಪಿ ವ್ಯವಸ್ಥೆಯ ಒಟ್ಟು ಜವಾಬ್ದಾರಿಯನ್ನು ಟೆಂಡರ್ ಆಧಾರದಲ್ಲಿ ಗುತ್ತಿಗೆದಾರ ಕಂಪನಿಗಳಿಗೆ ನೀಡುತ್ತಿದ್ದು, ಇಲ್ಲಿ ಪಾವತಿಸುವ ಪ್ರತಿ ಬಿಲ್ಗೆ ಸರಾಸರಿ 6 ರೂ.ಗಳನ್ನು ಮೆಸ್ಕಾಂ ಗುತ್ತಿಗೆ ಕಂಪನಿಗೆ ನೀಡಬೇಕಿತ್ತು.
ಬಿಡ್ ಮೊತ್ತ ಹೆಚ್ಚಳ
ಈ ಗುತ್ತಿಗೆ ಡಿ.31ಕ್ಕೆ ಮುಗಿದಿದ್ದು ಹೊಸ ಟೆಂಡರ್ನಲ್ಲಿ ಪ್ರತಿ ಬಿಲ್ಗೆ 18 ರೂ. ಪಾವತಿಸುವಂತೆ ಕಂಪನಿ ಬಿಡ್ ಮಾಡಿತ್ತು. ಯಾವುದೇ ಮೊತ್ತದ ಬಿಲ್ಗೆ 18 ರೂ. ಪಾವತಿಸುವ ಅನಿವಾರ್ಯತೆ ಉಂಟಾದ ಕಾರಣ ಇದು ಮೆಸ್ಕಾಂಗೆ ನಷ್ಟದ ಹಾದಿಯಾಗಿದ್ದು ಗುತ್ತಿಗೆಯನ್ನು ಮುಂದುವರಿಸಿಲ್ಲ. ಪ್ರಸ್ತುತ ಗೃಹಜ್ಯೋತಿ ಯೋಜನೆಯಿಂದ ಮೆಸ್ಕಾಂಗೆ ಹೆಚ್ಚಿನ ಬಿಲ್ಗಳು ಬರುತ್ತಿಲ್ಲ. ಮೆಸ್ಕಾಂ ಎಟಿಪಿ ಹಾಗೂ ಕ್ಯಾಶ್ ಕೌಂಟರ್ಗಳು ಒಂದೇ ಕಡೆ ಇರುವ ಕಾರಣ ಈ ವ್ಯವಸ್ಥೆ ಕೆಲವೆಡೆ ಹೆಚ್ಚು ಪರಿಣಾಮಕಾರಿಯಾಗಿರಲಿಲ್ಲ. ಇಂದು ತಂತ್ರಜ್ಞಾನ ಸಾಕಷ್ಟು ಮುಂದುವರಿದಿದ್ದು ಮನೆಯಲ್ಲೇ ಕುಳಿತು ಹಣ ಪಾವತಿಗೆ ಸಾಕಷ್ಟು ವ್ಯವಸ್ಥೆಗಳು ಇರುವ ಕಾರಣ ಎಟಿಪಿಯತ್ತ ಬರುತ್ತಿದ್ದ ಗ್ರಾಹಕರ ಸಂಖ್ಯೆಯಲ್ಲೂ ಗಣನೀಯ ಇಳಿಕೆಯಾಗಿದೆ. ಈ ಸೇವೆ ಸ್ಥಗಿತಗೊಂಡ ಕಾರಣ ಇಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಹಲವು ಉದ್ಯೋಗಿಗಳು ಕೆಲಸ ಕಳೆದುಕೊಳ್ಳುವಂತಾಗಿದೆ.
ಬಿಲ್ ಪಾವತಿಗೆ ವ್ಯವಸ್ಥೆಗಳು
ಮೆಸ್ಕಾಂ ಬಿಲ್ಗಳನ್ನು ಉಪ ವಿಭಾಗದ ನಗದು ಕೌಂಟರ್, ಮಂಗಳೂರು ಒನ್ ಕೌಂಟರ್, ಗೂಗಲ್ ಪೇ, ಫೋನ್ ಪೇ, ಪೇಟಿಎಂ ಮೂಲಕ, ನನ್ನ ಮೆಸ್ಕಾಂ ಮೊಬೈಲ್ ಆ್ಯಪ್ ಮೂಲಕ, ಮೆಸ್ಕಾಂ ವೆಬ್ಸೈಟ್ನಲ್ಲಿ, ಅಂಚೆ ಕಚೇರಿ ಕೌಂಟರ್ಗಳಲ್ಲಿ ಪಾವತಿಸುವ ವ್ಯವಸ್ಥೆ ಮಾಡಲಾಗಿದೆ.
