ಜಯತೀರ್ಥ ವಿದ್ಯಾಪೀಠದ 20 ವಿದ್ಯಾರ್ಥಿಗಳು ಶ್ರೀಮನ್ನಾ್ಯಯ ಸುಧಾ ಮಂಗಳೋತ್ಸವದಲ್ಲಿದ್ದಾರೆ. ಮೊದಲನೇ ದಿವಸ ನಾಲ್ಕು ಸುಧಾಜ್ಞಾನ ಸಂಪನ್ನ ವಿದ್ಯಾರ್ಥಿಗಳು ಯತಿಗಳ ಸಮ್ಮುಖ ಅರ್ಥಪೂರ್ಣ ವಿಷಯ, ಉಪನ್ಯಾಸ ಮಂಡಿಸಿ ಗಮನ ಸೆಳೆದರು. ಸಂಸ್ಕೃತದಲ್ಲಿ ವಿದ್ವತ್ಪೂರ್ಣ ವಿಚಾರವನ್ನು ತರ್ಕಬದ್ಧವಾಗಿ ಮಂಡಿಸಿದರು. ಕನ್ನಡದಲ್ಲಿ ವಿವರಣಾತ್ಮಕ ಸಾರ ಹೇಳಿದರು. ಶ್ರೀಗಳಿಂದ ಮುದ್ರಾಧಾರಣೆ ಮಾಡಿಕೊಂಡ ಎಡಿಜಿಪಿ ಭಾಸ್ಕರರಾವ್ ಮಾತನಾಡಿ, ಧರ್ಮ, ಸಂಸ್ಕೃತಿ ಉಳಿಸುವ ಕೆಲಸ ಎಲ್ಲರೂ ಸೇರಿ ಮಾಡಬೇಕು. ಸುಧಾ ಮಂಗಳೋತ್ಸವದಲ್ಲಿ ಇಷ್ಟೊಂದು ಸಂಖ್ಯೆಯಲ್ಲಿ ವಿಪ್ರರು ಸೇರಿರುವುದು ಖುಷಿ ತಂದಿದೆ. ನಮ್ಮ ಆಚರಣೆಗಳನ್ನು ಯಾವತ್ತಿಗೂ ಮರೆಯಕೂಡದು. ಇನ್ನೊಬ್ಬರ ಒಳಿತಿಗಾಗಿ ದುಡಿಯುವ ಸಮಾಜ ನಮ್ಮದು ಎಂಬುದು ಹೆಮ್ಮೆಯ ವಿಷಯ ಎಂದರು. ವಿವಿಧೆಡೆಯ ವಿದ್ಯಾಪೀಠಗಳ ವಿದ್ವಾಂಸರು, ಯತಿಗಳು, ಆಚಾರ್ಯರು, ವಿದ್ಯಾರ್ಥಿಗಳು, ದೇಶಾದ್ಯಂತ ಹರಡಿರುವ ಉತ್ತರಾದಿ ಮಠದ ಶಿಷ್ಯರು ಭಾಗವಹಿಸಿದ್ದರು. ಎಲ್ಲರಿಗೂ ಊಟೋಪಹಾರ, ವಸತಿ ಸೇರಿ ಎಲ್ಲ ವ್ಯವಸ್ಥೆ ಅಚ್ಚುಕಟ್ಟಾಗಿ ಮಾಡಲಾಗಿದೆ. ರಾತ್ರಿ ನಾಡಿನ ಪ್ರಖ್ಯಾತ ಕಲಾವಿದರಿಂದ ದಾಸವಾಣಿ, ಜಯ ಜಾಗರಣೆ ನಡೆಯಿತು. ವಿದ್ವಾಂಸರ ಪ್ರವಚನ ಕಾಗಿಣಾ ನದಿ ತಟದಲ್ಲಿ ಸಂಸ್ಕೃತದ ಕಹಳೆಯನ್ನೇ ಮೊಳಗಿಸಿತು. ಶನಿವಾರ ಕಾರ್ಯಕ್ರಮಕ್ಕೆ ತೆರೆ ಬೀಳಲಿದೆ.
