ಪ್ರಸ್ತುತ ದೂರದೃಷ್ಟಿಯುಳ್ಳ ನಾಯಕರು ಅಗತ್ಯ

ಪಟ್ಟಣದ ಜೆಎಂಎಫ್‌ಸಿ ನ್ಯಾಯಾಲಯದ ಆವರಣದಲ್ಲಿ ಶುಕ್ರವಾರ ವಕೀಲರ ಸಂಘದಿಂದ ಆಯೋಜಿಸಿದ್ದ ನಾಡಪ್ರಭು ಕೆಂಪೇಗೌಡರ 517ನೇ ಜಯಂತ್ಯುತ್ಸವದಲ್ಲಿ ಅವರು ಮಾತನಾಡಿದರು. ಸಂಪತ್ತು, ಹಣ, ಅಧಿಕಾರದ ಹಿಂದೆ ಓಡುತ್ತಿರುವ ಇಂದಿನ ನಾಯಕರಿಗೆ ಕೆಂಪೇಗೌಡರ ದೂರದೃಷ್ಟಿ ನಾಯಕತ್ವ ಎಳ್ಳಷ್ಟು ಇಲ್ಲವಾಗಿದೆ. ಇಂದು ಹಣವಿದ್ದವರು ನಾಯಕರಾಗುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ನಾಡು ಕಟ್ಟುವ ಜತೆಗೆ ಸಮಾಜವನ್ನು ಕಟ್ಟಿದ ಕೆಂಪೇಗೌಡರನ್ನು ಸ್ಮರಿಸುವ ಅಗತ್ಯವಿದೆ ಎಂದರು.

ಇಂದಿನ ಹಾಗೂ ಮುಂದಿನ ತಲೆಮಾರಿಗೆ ನಾಡಪ್ರಭು ಕೆಂಪೇಗೌಡರನ್ನು ಪರಿಚಯಿಸಿಕೊಡಬೇಕಿದೆ. ಕೆಂಪೇಗೌಡರು ಸ್ವತಂತ್ರ ರಾಜರಾಗಿರದಿದ್ದರೂ ವಿಜಯನಗರ ರಾಜರ ವಿಶ್ವಾಸ, ನಂಬಿಕೆಯನ್ನು ಗಳಿಸಿ, ಬೆಂಗಳೂರನ್ನು ಕಟ್ಟಿದರು. ಜತೆಗೆ ವಿಜಯನಗರ ಸಾಮ್ರಾಜ್ಯ ಕಟ್ಟಲು ಶ್ರಮಿಸಿ ಆದರ್ಶರಾಗಿದ್ದರು. ಇವರ ಎಲ್ಲ ಕೆಲಸಗಳಿಗೆ ವಿಜಯನಗರ ಅರಸರು ಬೆಂಬಲ ಸೂಚಿಸಿ ಆತ್ಮವಿಶ್ವಾಸ ತುಂಬುತ್ತಿದ್ದರು. ಕೆಂಪೇಗೌಡರ ಇಚ್ಛಾಶಕ್ತಿ ಮತ್ತು ದೂರದೃಷ್ಟಿಯಿಂದಾಗಿ ಇಂದು ಬೆಂಗಳೂರು ವಿಶ್ವಮಾನ್ಯತೆ ಪಡೆದಿದೆ ಎಂದರು.

ಕೆಂಪೇಗೌಡರು ಯುದ್ಧದಿಂದ ನಾಡು ಕಟ್ಟಲಿಲ್ಲ. ಶಾಂತಿ, ಪ್ರೀತಿ, ನಂಬಿಕೆಯಿಂದ ಕಟ್ಟಿದರು. ನಾಡು ಶಾಂತಿ, ನೆಮ್ಮದಿಯಿಂದ ಇರಲು ಎಲ್ಲ ಜನವರ್ಗಗಳನ್ನು ಪ್ರೋತ್ಸಾಹಿಸಬೇಕಿದೆ. ಅಂತೆಯೇ ಕೆಂಪೇಗೌಡರು ಬೆಂಗಳೂರಿನಲ್ಲಿ ಹಲವಾರು ಪೇಟೆಗಳನ್ನು ನಿರ್ಮಾಣ ಮಾಡಿ ಎಲ್ಲ ದುಡಿಯುವ ವರ್ಗಗಳಿಗೆ ಬದುಕು ನೀಡಿದ್ದರು. ಇದರ ಫಲವಾಗಿ ಬೆಂಗಳೂರು ವಾಣಿಜ್ಯ ನಗರವಾಗಿ ಹೊರಹೊಮ್ಮಲು ಸಾಧ್ಯವಾಯಿತು ಎಂದು ಹೇಳಿದರು.

ಹಿರಿಯ ಶ್ರೇಣಿ ಪ್ರಧಾನ ಸಿವಿಲ್ ನ್ಯಾಯಾಧೀಶ ಆರ್.ಮಹೇಶ್ ಮಾತನಾಡಿ, ನಾಡಪ್ರಭು ಕೆಂಪೇಗೌಡರು ಕೆರೆ-ಕಟ್ಟೆ, ವಾಣಿಜ್ಯ ವಹಿವಾಟು ನಿರ್ಮಾಣ ಮಾಡುವ ಮೂಲಕ ಬೆಂಗಳೂರನ್ನು ಶಕ್ತಿಶಾಲಿಯಾಗಿಸಿದರು. ಸುಮಾರು 54 ವ್ಯಾಪಾರ ಪೇಟೆಗಳನ್ನು ನಿರ್ಮಾಣ ಮಾಡಿ ವೃತ್ತಿ ಆಧಾರಿತ ಆರ್ಥಿಕ ನಗರವನ್ನಾಗಿ ಸದೃಢಗೊಳಿಸಿದರು. ಇಂತಹ ದೂರದೃಷ್ಟಿಯುಳ್ಳವರಿಂದಾಗಿಯೇ ನಾಡು ಉಳಿದಿದೆ ಎಂದರು.

ಪ್ರಧಾನ ಸಿವಿಲ್ ನ್ಯಾಯಾಧೀಶೆ ಎಚ್.ಎಸ್.ಪೂಜಾಶ್ರೀ, ಹೆಚ್ಚುವರಿ ಸಿವಿಲ್ ನ್ಯಾಯಾಧೀಶ ಎನ್.ಬಾಬು, ವಕೀಲರ ಸಂಘದ ಅಧ್ಯಕ್ಷ ಗಂಗರಾಜು, ಕಾರ್ಯದರ್ಶಿ ಕೆ.ಎಸ್.ಮೋಹನ್ ಕುಮಾರ್, ಉಪಾಧ್ಯಕ್ಷ ಎಸ್.ಜಯರಾಮು, ಖಜಾಂಚಿ ಟಿ.ಜೆ.ಪುಷ್ಪಾಲತಾ, ಕರ್ನಾಟಕ ರಾಜ್ಯ ವಕೀಲರ ಪರಿಷತ್ತಿನ ನೂತನ ಸದಸ್ಯರಾದ ಕೆ.ಎಸ್.ಮಹದೇವಪ್ರಸಾದ್, ಎನ್.ಶಿವಕುಮಾರ್, ಶಿವಮೂರ್ತಿ, ಜೆ.ನಾರಾಯಣಸ್ವಾಮಿ ಇದ್ದರು.