ಪೌತಿಖಾತೆ ಆಂದೋಲನಕ್ಕೆ ನೂರೆಂಟು ತೊಡಕು

Pauthikathe movement

Published on:

11 Dec 2025, 2:16 pm

ಪ್ರಮುಖ ಮುಖ್ಯಾಂಶಗಳು

ವಾರಸುದಾರ ಬದಲಾವಣೆ, ಆಸ್ತಿ ಹಂಚಿಕೆ ವಿಷಯದಲ್ಲಿ ಗೊಂದಲ
ಅಧಿಕಾರಿಗಳಿಗೂ ತಲೆಬೇನೆ

ಕೆ.ಆರ್.ಪೇಟೆ: ರಾಜ್ಯ ಸರ್ಕಾರದ ಪೌತಿ ಖಾತೆ ಆಂದೋಲನ ರೈತರಲ್ಲಿ ಹೊಸ ಭರವಸೆಯನ್ನು ತಂದಿತ್ತು. ಆದರೆ, ಹಲವು ಸಮಸ್ಯೆಗಳು ರೈತರ ಆಸೆ ಈಡೇರದಂತೆ ಮಾಡಿದ್ದು, ಪೌತಿ ಖಾತೆಗೆ ರೈತರು ಅರ್ಜಿ ಸಲ್ಲಿಸದಂತಾಗಿದೆ.

ತಾಲೂಕಿನಲ್ಲಿ ಸಾವಿರಾರು ಪೌತಿ ಪ್ರಕರಣಗಳು ಅವರ ವಾರಸುದಾರರ ಹೆಸರಿಗೆ ಬದಲಾಗದೆ ಮೃತಪಟ್ಟವರ ಹೆಸರಿನಲ್ಲೇ ಇವೆ. ಇವುಗಳ ಪೌತಿ ವಾರಸುದಾರರ ಹೆಸರಿಗೆ ಬದಲಾವಣೆಗೆ ಹಲವು ತೊಡಕಿರುವುದರಿಂದ ಮೂರು, ನಾಲ್ಕು ತಲೆಮಾರಿನಲ್ಲಿ ಆಸ್ತಿ ಮಾಲೀಕತ್ವ ಇದ್ದವರ ಹೆಸರಿನಲ್ಲಿಯೇ ಆರ್‌ಟಿಸಿ ಬರುತ್ತಿವೆ. ಪೌತಿ ಆಗಿರುವವರಿಂದ ಅವರ ವಾರಸುದಾರರಿಗೆ ಜಮೀನಿನ ಮಾಲೀಕತ್ವ ಕೊಡಬೇಕೆಂದು ಸರ್ಕಾರ ಪೌತಿ ಖಾತೆ ಆಂದೋಲನವನ್ನು ಮಹತ್ವಾಕಾಂಕ್ಷಿಯಾಗಿ ತೆಗೆದುಕೊಂಡಿದೆ.

48944 ಪೌತಿ ಪ್ರಕರಣಗಳು!: ತಾಲೂಕಿನಾದ್ಯಂತ 48,944 ಪ್ರಕರಣಗಳನ್ನು ಪೌತಿ ಖಾತೆ ಮಾಡಬೇಕಿದೆ. ಕಸಬಾ 6621, ಸಂತೇಬಾಚಹಳ್ಳಿ 10160, ಬೂಕನಕೆರೆ 4724, ಕಿಕ್ಕೇರಿ 11542, ಶೀಳನೆರೆ 10622, ಅಕ್ಕಿಹೆಬ್ಬಾಳು 5275 ಪ್ರಕರಣಗಳಿವೆ. ಈಗಾಗಲೇ ಆಂದೋಲನದಿಂದ 2000 ಪ್ರಕರಣಗಳು ಪೌತಿ ಖಾತೆ ಮಾಡಿ ವಾರಸುದಾರರ ಹೆಸರಿಗೆ ಖಾತೆ ಮಾಡಿಕೊಡಲಾಗಿದೆ. ಉಳಿದ 46,944 ಪ್ರಕರಣಗಳ ಪೌತಿ ಖಾತೆಗೆ ಕಂದಾಯ ಅಧಿಕಾರಿಗಳು ಆಂದೋಲನ ಹಮ್ಮಿಕೊಂಡಿದ್ದಾರೆ.

ಸಮಸ್ಯೆಗಳು: ಮೂರು ನಾಲ್ಕು ತಲೆಮಾರಿನವರ ಹೆಸರಿನಲ್ಲಿರುವ ಜಮೀನಿನ ಮಾಲೀಕತ್ವ ಅವರ ನಿಧನ ನಂತರ ಅವರ ವಾರಸುದಾರರಿಗೆ ಖಾತೆ ಬದಲಾವಣೆ ಆಗಿಲ್ಲ. ಅವರ ವಾರಸುದಾರರು ಮೌಖಿಕವಾಗಿ ಹಿಸ್ಸಾ ಮಾಡಿಕೊಂಡು ಸ್ವಾಧೀನದಲ್ಲಿದ್ದಾರೆ. ಈಗ ಪೌತಿ ಆಧಾರದ ಮೇಲೆ ಮಾಲೀಕತ್ವ ಬದಲಾವಣೆ ಮಾಡಿದರೆ, ಪ್ರತ್ಯೇಕ ಹಿಸ್ಸಾದಲ್ಲಿರುವವರ ಜಮೀನಿಗೆ ವಾರಸುದಾರರ ಹೆಸರಿಗೆ ಜಮೀನು ಬರುತ್ತದೆ. ಪ್ರತ್ಯೇಕ ಹಿಸ್ಸಾ ಆಗಿರುವವರ ನಡುವೆ ಕೆಲವರು ಜಮೀನಿಗೆ ನೀರಾವರಿ ಸೌಲಭ್ಯ ಕಲ್ಪಿಸಿಕೊಂಡು ಲಕ್ಷಾಂತರ ರೂ. ಹಣ ಖರ್ಚು ಮಾಡಿದ್ದಾರೆ. ಕೆಲವರು ಜಮೀನು ಅಭಿವೃದ್ಧಿ ಆಗಿಲ್ಲ. ಈಗ ವಾರಸುದಾರರೆಲ್ಲರಿಗೂ ಮಾಲೀಕತ್ವ ಬರುವುದರಿಂದ ಅಭಿವೃದ್ಧಿ ಮಾಡಿಕೊಂಡಿರುವವರಿಗೆ ಆತಂಕ ಸೃಷ್ಟಿಯಾಗಿದೆ. ಅಭಿವೃದ್ಧಿ ಜಮೀನಿನಲ್ಲಿ ಬೇರೆಯವರು ಹಿಸ್ಸಾ ಕೇಳುವ ಆತಂಕ ನಿರ್ಮಾಣವಾಗಿ ಪೌತಿ ಖಾತೆಗೆ ಹಿಂದೇಟು ಹಾಕುತ್ತಿದ್ದಾರೆ.

ಅಡಕತ್ತರಿಯಲ್ಲಿ ಅಧಿಕಾರಿಗಳು

ಪೌತಿ ಆಧಾರದ ಮೇಲೆ ಆಸ್ತಿಯಲ್ಲಿ ಹೆಣ್ಣು ಮಕ್ಕಳಿಗೂ ಕಾನೂನಿನಲ್ಲಿ ಪಾಲಿದೆ. ಹೆಣ್ಣು ಮಕ್ಕಳಿಗೆ ಪಾಲು ನೀಡದೆ ಗಂಡು ಮಕ್ಕಳು ಮಾತ್ರ ಪಿತ್ರಾರ್ಜಿತ ಆಸ್ತಿಯಲ್ಲಿ ಸ್ವಾಧೀನದಲ್ಲಿದ್ದಾರೆ. ಪೌತಿ ಖಾತೆಗೆ ವಂಶವೃಕ್ಷ ಅಗತ್ಯ, ಅಲ್ಲಿ ಹೆಣ್ಣು ಮಕ್ಕಳನ್ನು ಬಿಟ್ಟು ಪೌತಿ ಖಾತೆ ಮಾಡಿಕೊಟ್ಟರೆ ನಿಯಮಬಾಹಿರವಾಗುತ್ತದೆ. ಹೆಣ್ಣು ಮಕ್ಕಳು ಆಧಾರ್, ಒಟಿಪಿ ಕೊಡಲು ನಿರಾಕರಿಸುತ್ತಿದ್ದಾರೆ. ಹೆಣ್ಣು ಮಕ್ಕಳು ಆಸ್ತಿಯನ್ನು ಕೇಳುವುದಕ್ಕೂ ಆಗುತ್ತಿಲ್ಲ, ಬಿಡುವುದಕ್ಕೂ ಆಗುತ್ತಿಲ್ಲ. ಇದರಿಂದ ಅಧಿಕಾರಿಗಳು ಅಡಕತ್ತರಿಯಲ್ಲಿ ಸಿಲುಕಿಕೊಂಡಿದ್ದಾರೆ.

ಜೀವನಾಂಶದ ಹಕ್ಕು ಇದ್ದವರಿಗೂ ತೊಂದರೆ

ಕುಟುಂಬದಲ್ಲಿ ಹಲವಾರು ಸಹೋದರರಿದ್ದು ಆಸ್ತಿ ಹಂಚಿಕೆ ಮಾಡಿಕೊಂಡು, ಅವರ ಆಸ್ತಿಯನ್ನು ವಿಭಾಗದಂತೆ ಖಾತೆ ಮಾಡಿಕೊಂಡಿದ್ದಾರೆ. ಅವರ ಪಾಲಕರಿಗೆ ಜೀವನಾಂಶಕ್ಕೆ ಒಂದಿಷ್ಟು ಜಮೀನು ಮೀಸಲಿರಿಸಿದ್ದು, ಅವರ ಕಾಲ ನಂತರ ಮೀಸಲಿನ ಜಮೀನು ಇಂತಹವರ ಹೆಸರಿಗೆ ಎಂದು ಹಕ್ಕು ನೀಡಲಾಗಿದೆ. ಈಗ ಜೀವನಾಂಶದ ಜಮೀನನ್ನು ಹಕ್ಕು ಇರುವವರ ಖಾತೆ ಮಾಡಿಸಿಕೊಳ್ಳಲು ಹೋದಾಗ ಉಳಿದವರು ಪಿತ್ರಾರ್ಜಿತ ಆಸ್ತಿ ನಮಗೂ ಆಸ್ತಿ ಹಕ್ಕು ಇರುವುದಾಗಿ ಪೌತಿ ಖಾತೆಗೆ ಮುಂದಾಗುತ್ತಿದ್ದಾರೆ. ಇದರಿಂದ ಜೀವನಾಂಶದ ಹಕ್ಕು ಇರುವವರು ಸಹ ಸಮಸ್ಯೆಗೀಡಾಗಿದ್ದಾರೆ.

ಕುಟುಂಬದಲ್ಲಿ ಪಿತ್ರಾರ್ಜಿತ ಆಸ್ತಿಯನ್ನು ಹಂಚಿಕೆ ಮಾಡಿಕೊಂಡಿರುವ ಸಹೋದರರು, ಹಿಂದೆಯೇ ಕೆಲವರು ವಿಭಾಗ ಖಾತೆ ಮಾಡಿಸಿಕೊಂಡಿದ್ದಾರೆ. ಮಾಡಿಸಿಕೊಳ್ಳದವರ ಆಸ್ತಿ ಕುಟುಂಬದ ಹಿರಿಯರ ಹೆಸರಿನಲ್ಲಿದೆ. ಅವರು ನಿಧನರಾಗಿದ್ದು, ಈಗ ವಾರಸುದಾರರಿಗೆಲ್ಲ ಜಮೀನಿನ ಮಾಲೀಕತ್ವ ಬರುತ್ತಿರುವುದರಿಂದ ಈಗಾಗಲೇ ಅವರ ಪಾಲಿನ ಆಸ್ತಿಯನ್ನು ಖಾತೆ ಮಾಡಿಸಿಕೊಂಡವರು, ಮಾಡಿಸಿಕೊಳ್ಳದವರ ಆಸ್ತಿಗೆ ದಾಖಲೆಯಲ್ಲಿ ಮಾಲೀಕರಾಗುತ್ತಿದ್ದಾರೆ.

ಸಹೋದರರಲ್ಲಿ ಹೊಂದಾಣಿಕೆಯಿಲ್ಲ

ಸಹೋದರರಲ್ಲಿ ಹೊಂದಾಣಿಕೆಯಿಲ್ಲದಿರುವುದು, ಹೆಣ್ಣು ಮಕ್ಕಳು ಒಟಿಪಿ, ಆಧಾರ್ ಕಾರ್ಡ್ ನೀಡದಿರುವುದು ಪೌತಿ ಖಾತೆ ಆಂದೋಲನ ಹಿನ್ನಡೆಗೆ ಕಾರಣ ಆಗುತ್ತಿದೆ. ಅಧಿಕಾರಿಗಳು ರೈತರನ್ನು ಮನವೊಲಿಸಲು ಯತ್ನಿಸುತ್ತಿದ್ದರೂ ರೈತರು ಪೌತಿಖಾತೆಗೆ ನಿರಾಸಕ್ತಿ ತೋರುತ್ತಿದ್ದಾರೆ. ಜಮೀನಿನ ಮಾಲೀಕ ಮೃತಪಟ್ಟಿದ್ದು, ಅವರ ಪತ್ನಿ, ಮಕ್ಕಳಿಗೆ ಪೌತಿ ಖಾತೆ ಸುಗಮವಾಗಿ ನಡೆಯುತ್ತಿವೆ. ಮಾಲೀಕ ಮೃತಪಟ್ಟು ಎರಡು, ಮೂರು ತಲೆಮಾರು ಕಳೆದಿರುವ ಆಸ್ತಿಗಳ ವಾರಸುದಾರರ ಸಂಖ್ಯೆ ದೊಡ್ಡದಿದೆ. ಇದು ರೈತರಿಗೆ ತಲೆನೋವಾಗಿ ಪರಿಣಮಿಸಿದೆ. ಇದನ್ನು ಸರ್ಕಾರ ಸರಳೀಕರಿಸಬೇಕೆಂಬ ಆಗ್ರಹ ರೈತರಿಂದ ಕೇಳಿಬರುತ್ತಿದೆ.

ಮೃತಪಟ್ಟವರ ಹೆಸರಿನಲ್ಲಿ ಆಸ್ತಿ ಇದೆ. ಕಾನೂನಿನ ಪ್ರಕಾರ ಅವರ ಜೀವಂತ ವಾರಸುದಾರರಿಗೆ ಖಾತೆ ವರ್ಗಾವಣೆ ಮಾಡಬೇಕು. ಅವರು ಜಂಟಿ ಖಾತೆ ಮಾಡಬೇಡಿ, ಹೆಣ್ಣು ಮಕ್ಕಳನ್ನು ಬಿಟ್ಟು ಖಾತೆ ಮಾಡಲು ಕೇಳುತ್ತಾರೆ. ಕಾನೂನಿನಲ್ಲಿ ಇದಕ್ಕೆ ಅವಕಾಶವಿಲ್ಲ. ಈಗ ಪೌತಿ ಖಾತೆ ಮಾಡಿಸಿಕೊಂಡು ನಂತರ ವಿಭಾಗ ಮಾಡಿಕೊಂಡು ಪ್ರತ್ಯೇಕ ಮಾಡಿಕೊಳ್ಳಬಹುದು. ರೈತರು ಸಹಕಾರ ನೀಡಿದರೆ ಪೌತಿಖಾತೆ ಆಂದೋಲನ ಯಶಸ್ವಿಯಾಗಲಿದೆ.

ಕೋಟ್..ಮೂರು, ನಾಲ್ಕು ತಲೆಮಾರಿನವರ ಹೆಸರಿನಲ್ಲಿ ಆಸ್ತಿ ಇದೆ. ಎರಡು, ಮೂರು ತಲೆ ಮಾರಿನವರು ಮೃತಪಟ್ಟಿದ್ದಾರೆ. ವಾರಸುದಾರರು ಮೌಖಿಕವಾಗಿ ಹಿಸ್ಸಾ ಮಾಡಿಕೊಂಡು ಅನುಭವಿಸುತ್ತಿದ್ದಾರೆ. ಎಲ್ಲರ ಹೆಸರಿಗೂ ಪೌತಿ ಖಾತೆ ಮಾಡಿಕೊಟ್ಟರೆ ಅನುಭವದಲ್ಲಿರದವರು ತಕರಾರು ಮಾಡಿ ಆಸ್ತಿ ಕೇಳಬಹುದು. ಆದ್ದರಿಂದ ಅನುಭವದಲ್ಲಿರುವವರಿಗೆ ಪೌತಿ ಖಾತೆ ಮಾಡಿಕೊಟ್ಟರೆ ಅನುಕೂಲವಾಗಲಿದೆ.

ಕಂದಾಯ ಅಧಿಕಾರಿಗಳು ಪೌತಿ ಖಾತೆ ಆಂದೋಲನವನ್ನು ಯಶಸ್ವಿಯಾಗಿ ಮಾಡುವುದರ ಮೂಲಕ ರೈತರಿಗೆ ಅನುಕೂಲ ಮಾಡಿಕೊಡಬೇಕು. ನಾನು ಕೂಡ ಆಂದೋಲನದ ಪ್ರಗತಿ ಬಗ್ಗೆ ನಿಯಮಿತವಾಗಿ ಪರಿಶೀಲನೆ ನಡೆಸುತ್ತೇನೆ. ಅಗತ್ಯ ಸಲಹೆ, ಸೂಚನೆಗಳನ್ನು ಅಧಿಕಾರಿಗಳಿಗೆ ನೀಡುತ್ತೇನೆ. ಕೆಲವು ಕಗ್ಗಂಟಿನ ಪ್ರಕರಣಗಳಿವೆ. ಅವುಗಳಿಗೆ ಪರಿಹಾರ ಕೊಡಿಸುವ ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇನೆ. ತಾಲೂಕಿನ ರೈತರ ಕೆಲಸವನ್ನು ಅಡಚಣೆಯಿಲ್ಲದಂತೆ ಮಾಡಲು ಕ್ರಮ ವಹಿಸುತ್ತೇನೆ.

ಕೆ.ಆರ್.ಪೇಟೆ