ತಹಸೀಲ್ದಾರ್‌ಗೆ ಪಾಲಹಳ್ಳಿ ಗ್ರಾಮಸ್ಥರ ಮುತ್ತಿಗೆ

ಪಟ್ಟಣದ ತಾಲೂಕು ಕಚೇರಿಗೆ ಗುರುವಾರ ವಿಷಯುಕ್ತ ರಾಸಾಯನಿಕ ನೀರು ಸಂಗ್ರಹಿಸಿದ್ದ ಬಾಟೆಲ್ ಹಿಡಿದು ಮುತ್ತಿಗೆ ಹಾಕಿದ ಗ್ರಾಮಸ್ಥರು, ತಹಸೀಲ್ದಾರ್ ಚೇತನಾ ಯಾದವ್ ಅವರನ್ನು ಸುತ್ತುವರಿದು ತಮ್ಮ ಸಮಸ್ಯೆ ವಿವರಿಸಿ ಶೀಘ್ರವೇ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದರು.

ಗ್ರಾಮದ ಮುಖಂಡ ಪಿ.ಡಿ.ಕುಮಾರ್ ಮಾತನಾಡಿ, ರೈತರ ಕೃಷಿ ಮತ್ತು ಜಾನುವಾರುಗಳ ಅನೂಕೂಲಕ್ಕಾಗಿ ನೀರು ಒದಗಿಸುವ ವಿರಿಜಾ ನಾಲೆಯು ತಾಲೂಕಿನ ಬೆಳಗೊಳದಿಂದ ಪ್ರಾರಂಭವಾಗಿ ಕಾರೆಕುರ, ಪಾಲಹಳ್ಳಿ, ಬೊಮ್ಮೂರು ಅಗ್ರಹಾರ, ನಗುವನಹಳ್ಳಿ, ಚಂದಗಾಲು, ಹೊಸೂರು, ಮೇಳಾಪುರ ಸೇರಿದಂತೆ ಸಾಕಷ್ಟು ಕಡೆ ಹರಿದು ಕಾವೇರಿ ನದಿ ಸೇರುತ್ತದೆ. ಆದರೆ ಇದೆ ಬೆಳಗೊಳದ ಸಮೀಪ ಮೈಸೂರಿನ ಹೆಬ್ಬಾಳದ ಕೈಗಾರಿಕಾ ಪ್ರದೇಶದ ಕಾರ್ಖಾನೆಗಳ ರಾಸಾಯನಿಕ ನೀರು ಈ ವಿರಿಜಾ ನಾಲೆಗೆ ಸೇರಿ ವಿಷಯುಕ್ತವಾಗುತ್ತಿದೆ.

ಇದೇ ನಾಲೆಯಿಂದ ದೇವಾರಾಯ ಹಾಗೂ ಆರ್‌ಬಿಎಲ್‌ಎಲ್ ನಾಲೆಗಳಿಗೂ ಸೇರಲಿದ್ದು, ಈ ನಾಲೆಗಳ ನೀರನ್ನು ಕೃಷಿಗೆ ಬಳಸಿ ಅದರಲ್ಲಿ ಓಡಾಡುವ ಈ ಭಾಗದ ಸಾಕಷ್ಟು ರೈತರ ಕೈ-ಕಾಲುಗಳಲ್ಲಿ ಅಲರ್ಜಿ, ಸೋಂಕು ಉಂಟಾಗಿ ಅನಾರೋಗ್ಯ ಪೀಡಿತರಾಗುತ್ತಿದ್ದಾರೆ. ಇನ್ನು ಇದೇ ನೀರನ್ನು ಕುಡಿಯುವ ಹಸು, ಎತ್ತುಗಳು ಮತ್ತು ಆಡು-ಕುರಿ, ಮೇಕೆಗಳು ವಿಚಿತ್ರ ಖಾಯಿಲೆಯಿಂದ ಬಳಲುತ್ತಿವೆ. ಈ ಸಮಸ್ಯೆಗೆ ಸಾಕಷ್ಟು ಬಾರಿ ತಾಲೂಕು ಅಡಳಿತ ಹಾಗೂ ಜನಪ್ರತಿನಿಧಿಗಳ ಗಮನಕ್ಕೆ ತಂದರೂ ಪ್ರಯೋಜನವಾಗಿಲ್ಲ. ತಾಲೂಕು ಆಡಳಿತ ಜಿಲ್ಲಾ ಪರಿಸರ ನಿಯಂತ್ರಣ ಮಂಡಳಿಯ ಜಂಟಿ ಕಾರ್ಯಚರಣೆಯೊಂದಿಗೆ ಈ ವಿಷಯುಕ್ತ ನೀರು ಸ್ಥಗಿತಗೊಳಿಸಲು ಕ್ರಮವಹಿಸಿ ಜನರ ಆರೋಗ್ಯ ಮತ್ತು ಹಿತಕಾಯಬೇಕು. ಇಲ್ಲವಾದಲ್ಲಿ ಈ ಸಂಬಂಧ ಗ್ರಾಮಸ್ಥರು ಉಗ್ರ ಚಳವಳಿ ನಡೆಸಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು.

ಮನವಿ ಆಲಿಸಿದ ತಹಸೀಲ್ದಾರ್ ಚೇತನಾ ಯಾದವ್ ಮಾತನಾಡಿ, ಈ ಬಗ್ಗೆ ಸ್ಥಳಕ್ಕೆ ಭೇಟಿ ನೀಡುವ ಜತೆಗೆ ಸಂಬಂಧಪಟ್ಟ ಇಲಾಖೆಗೆ ಪತ್ರಬರೆದು ಕ್ರಮ ವಹಿಸಲಾಗುವುದು ಎಂದು ತಿಳಿಸಿದರು.

ಪಾಲಹಳ್ಳಿ ಗ್ರಾಮದ ಗ್ರಾಮಸ್ಥರಾದ ಪಿ.ಎಸ್.ಶಿವಣ್ಣ, ರಾಜು, ಶಂಕರಣ್ಣ, ಈಶ್ವರ್, ಪ್ರಭಾಕರ್ ಸೇರಿದಂತೆ ಹಲವರು ಈ ವೇಳೆ ಇದ್ದರು.