ಅಡಕೆ ಬೆಳೆದು ಉತ್ತಮ ಲಾಭ ಪಡೆಯಿರಿ

ಬಳಿಕ ಮಾತನಾಡಿದ ಸಂಘದ ಉಪಾಧ್ಯಕ್ಷ ಎಚ್.ಎಸ್.ಮಹೇಶ್ ಹುಲ್ಕುಳಿ ಅವರು, ಅಡಕೆ ಬೆಳೆಗಾರರ ಹಿತ ಕಾಯುವ ಉದ್ದೇಶದಿಂದ 1939ರ ನವೆಂಬರ್ 8ರಂದು ಈ ಸಂಘವನ್ನು ಸ್ಥಾಪಿಸಲಾಯಿತು. ಸಂಸ್ಥೆಯ ಕೇಂದ್ರ ಕಚೇರಿಯು ಶಿವಮೊಗ್ಗದಲ್ಲಿದ್ದು, ಈಗಲೂ ಶಿವಮೊಗ್ಗ ಜಿಲ್ಲಾಧಿಕಾರಿಗಳು ಸಂಸ್ಥೆಯ ಅಧ್ಯಕ್ಷರಾಗಿರುತ್ತಾರೆ. ಪ್ರಾರಂಭದಲ್ಲಿ ಕೇವಲ 659 ಜನರು ಸದಸ್ಯರಿದ್ದು, 5121 ಮೂಟೆ ಮಾತ್ರ ಅಡಕೆ ಆವಕವಾಗಿತ್ತು. 16,031 ಷೇರು ಬಂಡವಾಳದೊಂದಿಗೆ ಆರಂಭಗೊಂಡ ಸಂಘವು ಸ್ಥಾಪನೆಯ ವರ್ಷವೇ ಉತ್ತಮ ಲಾಭ ಗಳಿಸಿ ಶೇ.6.25 ರಷ್ಟು ಡಿವಿಡೆಂಡ್ ನೀಡುವಲ್ಲಿ ಸಫಲವಾಗಿದೆ. ನಂತರ ಸಂಸ್ಥೆಯು ಯಶಸ್ಸಿನ ಹಾದಿಯಲ್ಲಿ ಮುನ್ನಡೆಯುತ್ತಿದ್ದು, ಪ್ರಸ್ತುತ 30,500 ಕ್ಕೂ ಹೆಚ್ಚು ಸದಸ್ಯರೊಂದಿಗೆ ಸದೃಢ ಆರ್ಥಿಕ ತಳಹದಿ ಹೊಂದಿದೆ ಎಂದರು. ಪ್ರಾರಂಭದಿಂದ ಇಲ್ಲಿಯವರೆಗೂ ಲಾಭದಲ್ಲಿ ಕಾರ್ಯನಿರ್ವಹಿಸುತ್ತಾ ಪ್ರತಿವರ್ಷ ಡಿವಿಡೆಂಡ್ ನೀಡುತ್ತಿರುವ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಜತೆಗೆ 2024-25ನೇ ಸಾಲಿನ ವರ್ಷದಲ್ಲಿ 5.52 ಕೋಟಿ ರೂ.ನಿವ್ವಳ ಲಾಭ ಗಳಿಸಿದ್ದು, ಇದೇ ಸಾಲಿನಲ್ಲಿ ಒಟ್ಟು ವ್ಯವಹಾರ ಅಂದಾಜು 1297.38 ಕೋಟಿ ರೂ.ಆಗಿರುತ್ತದೆ. ಆದ್ದರಿಂದ ಅಡಕೆ ಬೆಳೆಗಾರರು ಕೆ.ಆರ್.ಪೇಟೆ ಪ್ರಾರಂಭವಾಗಿರುವ ನೂತನ ಖರೀದಿ ಕೇಂದ್ರದಲ್ಲಿ ಮಾರಾಟ ಮಾಡಿ ಉತ್ತಮ ಲಾಭ ಪಡೆಯುವ ಮೂಲಕ ನೆಮ್ಮದಿಯ ಜೀವನ ಮಾಡುವಂತೆ ಸಲಹೆ ನೀಡಿದರು.

ರೈತರು ಖರೀದಿ ಕೇಂದ್ರದಲ್ಲಿ ಅಡಕೆ ದಾಸ್ತಾನು ಇರಿಸಿ ಆಧಾರ ಸಾಲವನ್ನು ಸಹ ಪಡೆಯುವ ಸೌಲಭ್ಯವನ್ನು ಕಲ್ಪಿಸಲಾಗುವುದು. ಇದನ್ನು ರೈತರು ಸದುಪಯೋಗ ಪಡಿಸಿಕೊಳ್ಳುವಂತೆ ಸಲಹೆ ನೀಡಿದರು.

ಪ್ರಗತಿಪರ ರೈತ, ಹೊಸಹೊಳಲು ಸೊಸೈಟಿ ನಿರ್ದೇಶಕ ಕೃಷ್ಣೇಗೌಡ ಮಾತನಾಡಿ, ನಮ್ಮ ತಾಲೂಕಿಗೆ ಅಡಕೆ ಮಾರಾಟ ಖರೀದಿ ಕೇಂದ್ರ ಪ್ರಾರಂಭವಾಗಿರುವುದು ಸಂತೋಷದ ಸಂಗತಿ. ಇದನ್ನು ತಾಲೂಕಿನ ರೈತ ಬಾಂಧವರು ಸದುಪಯೋಗ ಪಡಿಸಿಕೊಳ್ಳಬೇಕು. ಸಾಮಾನ್ಯವಾಗಿ ನಮ್ಮ ತಾಲೂಕಿನಲ್ಲಿ ತೆಂಗು, ಭತ್ತ, ಅಡಕೆ ಬೆಳೆಯುತ್ತಾರೆ. ರೈತ ಕಷ್ಟ ಪಟ್ಟು ಬೆಳೆಯುವ ಬೆಳೆಗೆ ಬೆಂಬಲ ಬೆಲೆ ಸಿಕ್ಕರೆ ಖುಷಿ ಪಡುತ್ತಾರೆ. ಅಡಕೆ ಖರೀದಿ ಕೇಂದ್ರವು ರೈತರ ಬೆನ್ನೆಲುಬಾಗಿ ಕೆಲಸ ಮಾಡಲಿ. ದಲ್ಲಾಳಿಗಳು ಮಧ್ಯ ಪ್ರವೇಶ ಮಾಡದಂತೆ ಸಂಸ್ಥೆಯು ಕೆಲಸ ನಿರ್ವಹಿಸುವಂತೆ ಸಲಹೆ ನೀಡಿದರು.

ಎಪಿಎಂಸಿ ಕಾರ್ಯದರ್ಶಿ ವಿದ್ಯಾಶ್ರೀ, ಸಂಸ್ಥೆಯ ಪ್ರಧಾನ ವ್ಯವಸ್ಥಾಪಕಿ ಜಯಂತಿ ಪಿ ಎಂ, ವ್ಯವಸ್ಥಾಪಕ ನಿರ್ದೇಶಕ ಶ್ರೀಕಾಂತ್, ನಿರ್ದೇಶಕರಾದ ತಿಮ್ಮಪ್ಪ, ರತ್ನಾಕರ್, ಕೀರ್ತಿರಾಜ್, ಕುಬೇಂದ್ರಪ್ಪ, ಅಂಬಿಕಾ, ಅಡಕೆ ವ್ಯಾಪಾರಿ ಮುರುಕನಹಳ್ಳಿ ಜಗದೀಶ್, ನಾಗೇಶ್, ಯೋಗಣ್ಣ, ನಾಗೇಶ್, ಆನಂದ್, ಕುಮಾರ್, ವೆಂಕಟೇಶ್, ವಿಜಯ್ ಕುಮಾರ್ ಇತರರು ಇದ್ದರು.