ಶಿಬಿರದಲ್ಲಿ ರೈತ ಚಳವಳಿಗಳ ಹೆಜ್ಜೆ ಗುರುತುಗಳು

ಭಗವದ್ರಾಮಾನುಜ ಸಂಸ್ಕೃತ ಸಂಶೋಧನಾ ಕೇಂದ್ರದಲ್ಲಿ ಲಲಿತಕಲಾ ಅಕಾಡೆಮಿ, ಕರ್ನಾಟಕ ಸಂಸ್ಕೃತ ವಿಶ್ವವಿದ್ಯಾಲಯ, ಕರ್ನಾಟಕ ರಾಜ್ಯ ರೈತ ಸಂಘದ ಸಹಯೋಗದಲ್ಲಿ ಇತ್ತೀಚೆಗೆ ಆಯೋಜಿಸಿದ್ದ ರೈತರ ಬದುಕು, ಹೋರಾಟ ಮತ್ತು ಚಳವಳಿಗಳ ಚಿತ್ರ ದಾಖಲೆಯ ರೈತ ಚಿತ್ರ ನಮನ ಶಿಬಿರದಲ್ಲಿ ಮಾತನಾಡಿದರು.

ರೈತ ಚಳವಳಿಗಳ ಕುರಿತು ಈವರೆಗೆ ಯಾವುದೇ ನಿಖರ ದಾಖಲೆಗಳು ಲಭ್ಯವಿರಲಿಲ್ಲ. ಹೋರಾಟಗಾರರ ಮಾಹಿತಿಯೂ ಅಧಿಕೃತವಾಗಿ ದಾಖಲೀಕರಣವಾಗಿಲ್ಲ. ಚಳವಳಿಗಳ ದಾಖಲೆಯ ಕಾರ್ಯ ಯಾವುದೇ ರೀತಿಯಲ್ಲೂ ಆಗಿಲ್ಲ. ಇದನ್ನು ಗಮನಿಸಿ ಕರ್ನಾಟಕ ಲಲಿತಕಲಾ ಅಕಾಡೆಮಿ ರಾಜ್ಯದ ವಿವಿಧ ಜಿಲ್ಲೆಗಳ ಮೂವತ್ತು ಉದಯೋನ್ಮುಖ ಕಲಾವಿದರನ್ನು ಆಹ್ವಾನಿಸಿ ರೈತ ನಾಯಕರ ಮಾರ್ಗದರ್ಶನಲ್ಲಿ ಧೀಮಂತ ಹೋರಾಟಗಾರ ರೈತ ನಾಯಕ ಕೆ.ಎಸ್ ಪುಟ್ಟಣ್ಣಯ್ಯ ಸೇರಿದಂತೆ ಎಲ್ಲ ಜಿಲ್ಲೆಯ ರಾಜ್ಯ ಮಟ್ಟದ ರೈತ ಮುಖಂಡರು ಮತ್ತು ಬೃಹತ್ ರೈತ ಚಳವಳಿಗಳ ಗಮನಸೆಳೆಯುವ ಚಿತ್ರ ಕಾವ್ಯಗಳನ್ನು ಬಿಡಿಸಿ ರೈತ ಚಳವಳಿಗಳನ್ನು ದಾಖಲೀಕರಣ ಮಾಡಿದೆ. ಅಕಾಡೆಮಿ ಮತ್ತಷ್ಟು ಶಿಬಿರಗಳನ್ನು ಆಯೋಜಿಸಿ ರೈತ ಹೋರಾಟದ ಎಲ್ಲ ಆಯಾಮಗಳ ಚಿತ್ರಸಂಪುಟವನ್ನು ಹೊರತರಲಿದೆ ಎಂದರು.

ರಾಜ್ಯ ರೈತ ಸಂಘದ ಅಧ್ಯಕ್ಷ ಬಡಗಲಪುರ ನಾಗೇಂದ್ರ ಮಾತನಾಡಿ, ಯಾವುದೇ ಸರ್ಕಾರಗಳು ರೈತ ನಾಯಕರ ಜೀವನಗಾಥೆ ಮತ್ತು ಚಳವಳಿಗಳನ್ನು ದಾಖಲೀಕರಿಸದ ಕಾರಣ ಮುಂದಿನ ಪೀಳಿಗೆಗೆ ಇವುಗಳ ಮಾಹಿತಿಯೇ ಲಭ್ಯವಾಗುವುದಿಲ್ಲ. ಅಕಾಡೆಮಿ ಚಿತ್ರಗಳ ಮೂಲಕ ದಾಖಲೀಕರಣ ಮಾಡಿ ನಮ್ಮನ್ನು ಚಿಂತಿಸುವಂತೆ ಮಾಡಿದೆ. ರೈತ ನಾಯಕರ ಜೀವನದ ಯಶೋಗಾಥೆ ಒಳಗೊಂಡ ಪುಸ್ತಕ ಸೇರಿದಂತೆ ಎಲ್ಲ ರೀತಿಯಲ್ಲೂ ದಾಖಲೀಕರಣ ಮಾಡುವ ಕಾರ್ಯ ಮಾಡುತ್ತೇವೆ. ಇಂದಿನ ರೈತರಿಗೂ ಹಿಂದಿನ ಹೋರಾಟಗಳ ವಿಶೇಷತೆಗಳು ತಲುಪಬೇಕು. ಚಳವಳಿಗಳು ನಿಂತ ನೀರಾಗದೆ ಮುಂದುವರಿಯಬೇಕು ಎಂದರು.

ಶಾಸಕ ದರ್ಶನ್ ಪುಟ್ಟಣ್ಣಯ್ಯ ಮಾತನಾಡಿ, ಕ್ಯಾತನಹಳ್ಳಿಯಲ್ಲಿ ರೈತ ನಾಯಕ ದಿ.ಕೆ.ಎಸ್.ಪುಟ್ಟಣ್ಣಯ್ಯ ಸಮಾಧಿ ಸಮೀಪದಲ್ಲಿ ವಸ್ತು ಸಂಗ್ರಹಾಲಯ ಮಾಡುವ ಮೂಲಕ ರೈತ ಚಳವಳಿಗಳ ಹೋರಾಟವನ್ನು ನಿರಂತರವಾಗಿ ಸ್ಮರಿಸುವ ಜತೆಗೆ ಮುಂದಿನ ಪೀಳಿಗೆಗೆ ತಲುಪಿಸುವ ಕಾರ್ಯ ಮಾಡಲಾಗುತ್ತದೆ. ಶಿಬಿರದಲ್ಲಿ ರಚಿಸಿದ ಚಿತ್ರಗಳನ್ನು ಅಲ್ಲಿ ಪ್ರದರ್ಶಿಸಿ ಸಂರಕ್ಷಿಸಲಾಗುತ್ತದೆ. ಶಿಲ್ಪ ಕಲಾಕೃತಿ ಮಾಡಿ ದಾಖಲೀಕರಣ ಮಾಡುವುದಾಗಿ ಘೋಷಿಸಿದ್ದು ಶೀಘ್ರ ಕಾರ್ಯರೂಪಕ್ಕೆ ಬರಲು ಎಲ್ಲ ರೀತಿಯ ಸಹಕಾರ ನೀಡುತ್ತೇನೆ ಎಂದು ಹೇಳಿದರು.

ಕರ್ನಾಟಕ ಶಿಲ್ಪಕಲಾ ಅಕಾಡೆಮಿ ಅಧ್ಯಕ್ಷ ಎಂ.ಸಿ.ರಮೇಶ್, ಸದಸ್ಯ ವಿ.ಇ.ಅಕ್ಷಯ ಕುಮಾರ್ ಡಾ.ಕುಮಾರ್. ರೈತ ನಾಯಕಿ ನಂದಿನಿ ಜಯರಾಂ, ಮಂಡ್ಯ ಜಿಲ್ಲಾ ರೈತ ಸಂಘದ ಅಧ್ಯಕ್ಷ ಎ.ಎಲ್.ಕೆಂಪೂಗೌಡ, ಹಿರಿಯ ರೈತ ಮುಖಂಡ ಕೆ.ಟಿ ಗೋವಿಂದೇಗೌಡ, ನಾಗಣ್ಣ, ತಾಲೂಕು ರೈತ ಸಂಘದ ಅಧ್ಯಕ್ಷ ವೈ.ಸಿ.ಮಂಜುನಾಥ್, ಲಲಿತಕಲಾ ಅಕಾಡೆಮಿ ಸಂಚಾಲಕ ಡಿ.ಅಭಿಲಾಷ್ ಭಾಗವಹಿಸಿದ್ದರು. ಕಲಾವಿದರಿಗೆ ಸ್ಮರಣಿಕೆ, ಪ್ರಮಾಣಪತ್ರ ಮತ್ತು ಗೌರವಧನ ನೀಡಿ ಅಭಿನಂದಿಸಲಾಯಿತು.