ಮಕ್ಕಳ ಸಾಹಿತ್ಯದಲ್ಲಿ ಸರ್ಕಾರ ಕುರುಡು ಪ್ರದರ್ಶನ: ಸಾಹಿತಿ ಜಿ.ಎನ್.ಮೋಹನ್ ಬೇಸರ

ಮಂಡ್ಯ ನಗರದ ಗಾಂಧಿಭವನದಲ್ಲಿ ಆಯೋಜಿಸಿದ್ದ ಸಮಾರಂಭದಲ್ಲಿ ಸಾಹಿತಿ ವಸು ವತ್ಸಲೆ, ಲೇಖಕಿ ಅನುಪಮಾ ಕೆ.ಬೆಣಚಿನಮರ್ಡಿ ಹಾಗೂ ರೇಖಾ ಚಿತ್ರಕಾರ ಸಂತೋಷ್ ಸಸಿ ಹಿತ್ಲು ಅವರನ್ನು ಸನ್ಮಾನಿಸಲಾಯಿತು.

Published on:

15 Apr 2026, 12:40 pm

ಪ್ರಮುಖ ಮುಖ್ಯಾಂಶಗಳು

ನಗರದಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭ
ಪರಿಚಯ ಪ್ರಕಾಶನದ ವತಿಯಿಂದ ಆಯೋಜನೆ

ಮಂಡ್ಯ: ಇಂದಿನ ತಂತ್ರಜ್ಞಾನವನ್ನಿಟ್ಟುಕೊಂಡೇ ಪುಸ್ತಕ ಸಂಸ್ಕೃತಿ ಹರಡುವ ಕೆಲಸವನ್ನು ಮಾಡಬೇಕಿದೆ ಎಂದು ಸಾಹಿತಿ ಜಿ.ಎನ್.ಮೋಹನ್ ಸಲಹೆ ನೀಡಿದರು.

ನಗರದ ಗಾಂಧಿಭವನದಲ್ಲಿ ಪರಿಚಯ ಪ್ರಕಾಶನದ ವತಿಯಿಂದ ಭಾನುವಾರ ಆಯೋಜಿಸಿದ್ದ 2024ನೇ ಸಾಲಿನ ಪರಿಚಯ ಮಕ್ಕಳ ಸಾಹಿತ್ಯ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದ ಅವರು, ಪ್ರಸ್ತುತ ಮಕ್ಕಳು ಹುಟ್ಟುತ್ತಲೇ ಮೊಬೈಲ್ ರಿಂಗ್ ಟೋನ್‌ನೊಂದಿಗೆ ಬೆಳೆಯುತ್ತಿದ್ದಾರೆ. ಪರಿಣಾಮ ಅದೇ ಅವರಿಗೆ ಜೋಗುಳವಾಗಿದೆ. ಹೀಗಾಗಿ ಮೊಬೈಲ್‌ನೊಂದಿಗೆ ಅತಿ ವೇಗವಾಗಿ ಸ್ಪಂದಿಸುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ಮೊಬೈಲ್ ಕಸಿದುಕೊಳ್ಳದೆ ಅದರ ಮೂಲಕವೇ ಪುಸ್ತಕ ಸಂಸ್ಕೃತಿ ತಿಳಿಸುವಂತೆ ಮಾಡಬೇಕು ಎಂದರು.

ಮಕ್ಕಳ ಸಾಹಿತ್ಯವೆಂದರೆ ತೆನಾಲಿ ರಾಮಕೃಷ್ಣ, ಪಂಚತಂತ್ರ, ಬೀರಬಲ್, ಚಂದಮಾಮನ ಕಥೆಗಳು ಅಥವಾ ಅನುಪಮಾ ನಿರಂಜನರ ಸಾಹಿತ್ಯ ಎಂದು ನಂಬಿದ್ದ ದೊಡ್ಡ ಅಂತರದ ನಡುವೆ ವಸು ವತ್ಸಲೆ, ಅನುಪಮಾ, ಪ್ರಸಾದ ನಾಯ್ಕ ಅವರಂತಹ 63 ಸಾಹಿತಿಗಳು ಮಕ್ಕಳ ಸಾಹಿತ್ಯವನ್ನು ಶ್ರೀಮಂತಗೊಳಿಸುವತ್ತ ಹೆಜ್ಜೆ ಇಟ್ಟಿರುವುದು ಅಭಿನಂದನೀಯ. ಬಾಹ್ಯಾಕಾಶದ ಸಾಧನೆಗಳು ಪುರುಷರ ಸಾಧನೆ ಎನ್ನುವ ರೀತಿ ಇರುವಾಗ ವಸು ವತ್ಸಲೆ ಅವರು ಬಾಹ್ಯಾಕಾಶದ ವಿಷಯ ತೆಗೆದುಕೊಂಡು ಅದರಲ್ಲಿ ಪುಟ್ಟ ಹುಡುಗಿಯ ಕನಸನ್ನು ಅಂತರಿಕ್ಷದಲ್ಲಿ ವಿಹಾ ಕೃತಿಯಲ್ಲಿ ಮನಗಾಣಿಸಿದ್ದಾರೆ ಎಂದರು.

ಸರ್ಕಾರಕ್ಕೆ ಮಕ್ಕಳ ಸಾಹಿತ್ಯ ಏನು ಎಂಬುದೇ ಅರ್ಥವಾಗಿಲ್ಲ. ಈ ವಿಷಯದಲ್ಲಿ ಸರ್ಕಾರ ಕುರುಡು ಮತ್ತು ಕಿವುಡಾಗಿದೆ. ಗ್ರಂಥಾಲಯಕ್ಕೆ ಸರಬರಾಜು ಮಾಡುವ ಸಗಟು ಪುಸ್ತಕ ಖರೀದಿಯಲ್ಲಿ ಯಾವುದೋ ಹಳೆಯ ಕಾಲದ ಮಾನದಂಡವನ್ನಿಟ್ಟುಕೊಂಡು ಮಕ್ಕಳ ಸಾಹಿತ್ಯದ ಪುಸ್ತಕಗಳನ್ನು ಸ್ವೀಕರಿಸುತ್ತಿಲ್ಲ. ಇಂತಹ ಸಂದರ್ಭದಲ್ಲಿ ಮಕ್ಕಳ ಸಾಹಿತ್ಯವನ್ನು ಪ್ರಚಾರಪಡಿಸುವ ನಿಟ್ಟಿನಲ್ಲಿ ಪ್ರಕಾಶಕರ, ಪಾಲಕರ, ಲೇಖಕರ ಒಂದು ನೆಟ್‌ವರ್ಕ್ ರೂಪಿಸಬೇಕು ಎಂದು ಅಭಿಪ್ರಾಯಪಟ್ಟರು.

ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಸಾಹಿತಿ ಶಿವಲಿಂಗಪ್ಪ ಹಂದಿಹಾಳ ’ಮಕ್ಕಳ ಸಾಹಿತ್ಯ-ನನ್ನ ಅಸ್ಮಿತೆಯ ಹುಡುಕಾಟ’ ಕುರಿತು ಉಪನ್ಯಾಸ ನೀಡಿದರು. ಪರಿಚಯ ಪ್ರಕಾಶನದ ಸಂಸ್ಥಾಪಕ ಶಿವಕುಮಾರ ಅರಾಧ್ಯ ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ಕರ್ನಾಟಕ ಸಂಘದ ಅಧ್ಯಕ್ಷ ಡಾ.ಬಿ.ಜಯಪ್ರಕಾಶಗೌಡ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು. ಖ್ಯಾತ ರೇಖಾಚಿತ್ರ ಕಲಾವಿದ ಗುಜ್ಜಾರಪ್ಪ, ವಿಕಸನ ಸಂಸ್ಥೆಯ ಮುಖ್ಯಸ್ಥ ಮಹೇಶ್ ಚಂದ್ರ ಗುರು, ಪ್ರಥಮ ಬುಕ್ಸ್ ಕನ್ನಡ ವಿಭಾಗದ ಸಂಪಾದಕಿ ಹೇಮಾ ಖುರ್ಸಾಪುರ, ಲೇಖಕ ಟಿ.ಸತೀಶ್ ಜವರೇಗೌಡ, ಭವಾನಿ ಲೋಕೇಶ್, ಬಿ.ಕೆ.ಪುಷ್ಪಾ ಉಪಸ್ಥಿತರಿದ್ದರು.

ಇದೇ ವೇಳೆ ಅಂತರಿಕ್ಷದಲ್ಲಿ ವಿಹಾ ಕೃತಿ ಕರ್ತೃ ವಸು ವತ್ಸಲೆ ಅವರಿಗೆ 2024ನೇ ಸಾಲಿನ ಪರಿಚಯ ಮಕ್ಕಳ ಸಾಹಿತ್ಯ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ತೀರ್ಪುಗಾರರ ಮೆಚ್ಚುಗೆ ಪಡೆದ ಇರುವೆಗಳು ಮತ್ತು ಆಗಂತುಕ ಕೃತಿಯ ಲೇಖಕಿ ಅನುಪಮಾ ಕೆ.ಬೆಣಚಿನಮರ್ಡಿ ಹಾಗೂ ರೇಖಾ ಚಿತ್ರಕಾರ ಸಂತೋಷ್ ಸಸಿ ಹಿತ್ಲು ಅವರನ್ನು ಸನ್ಮಾನಿಸಲಾಯಿತು. ಮಕ್ಕಳ ಸಾಹಿತ್ಯ: ಏನು-ಎತ್ತ? ಕುರಿತಾಗಿ ಸಂವಾದ ಕಾರ್ಯಕ್ರಮದಲ್ಲಿ ಫಣಿಮಾಲ, ಕಾರಸವಾಡಿ ಮಹದೇವು, ಆಶಾ ಹನಿಯಂಬಾಡಿ, ಭವಾನಿ ಲೋಕೇಶ್, ಚಂದ್ರಶೇಖರ ದ ಕೋ ಹಳ್ಳಿ ಇತರರಿದ್ದರು.