ಜೋತು ಬಿದ್ದ ಮುಖ್ಯ ವಿದ್ಯುತ್ ಕೇಬಲ್

ರಟ್ಟಿಹಳ್ಳಿ: ಪಟ್ಟಣದ ಖಬರಸ್ತಾನ ಹಿಂಭಾಗದ ಉಜ್ಜಕ್ಕಳವರ ಜಮೀನಿನಲ್ಲಿ ಅಪಾಯದ ಸ್ಥಿತಿಯಲ್ಲಿ ಜೋತು ಬಿದ್ದಿರುವ ವಿದ್ಯುತ್ ಸಂಪರ್ಕವಿರುವ ಎ.ಜಿ. ಕೇಬಲ್ ಅನ್ನು ಸರಿಪಡಿಸಬೇಕು ಎಂದು ಸ್ಥಳೀಯ ನಿವಾಸಿಗಳು ಒತ್ತಾಯಿಸಿದ್ದಾರೆ.

ಪಟ್ಟಣದ ಗ್ರಿಡ್​ನಿಂದ ದೊಡ್ಡಗುಬ್ಬಿ- ಮಾದಪುರ ಗ್ರಾಮಗಳಿಗೆ ವಿದ್ಯುತ್ ಸಂಪರ್ಕ ಪೂರೈಸುವ ಈ ಮುಖ್ಯ ವಿದ್ಯುತ್ ಕೇಬಲ್ ಕಳೆದ 25 ದಿವಸಗಳಿಂದ ಕೆಳಗೆ ಜೋತು ಬಿದ್ದಿದ್ದು, ಜನರಿಗೆ ತಾಗುವಂತಿದೆ.

ವಿದ್ಯುತ್ ಕಂಬದಲ್ಲಿನ ಕ್ಲಾಂಪ್​ಗಳು ಮುರಿದಿರುವುದರಿಂದ ವಿದ್ಯುತ್ ಕೇಬಲ್ ಕೆಳಗೆ ಜೋತು ಬಿದ್ದು, ಕಾಂಪೌಂಡ್ ಆಸರೆಯಲ್ಲಿ ತೂಗುತ್ತಿದೆ. ಈ ಜಮೀನನಲ್ಲಿ ಅಕ್ಕಪಕ್ಕದ ನಿವಾಸಿಗಳು ಓಡಾಡುವುದರಿಂದ ಅಪಾಯಕ್ಕೆ ಆಹ್ವಾನಿಸುವಂತಿದೆ. ರಾತ್ರಿ ವೇಳೆ ಕೇಬಲ್​ಗಳು ಕಾಣುವುದಿಲ್ಲ. ಮುಖ್ಯ ವಿದ್ಯುತ್ ತಂತಿಗಳು ಆಗಿರುವುದರಿಂದ ಯಾವುದೇ ಸಂದರ್ಭದಲ್ಲಿ ಅಪಾಯ ಸಂಭವಿಸುವ ಸಾಧ್ಯತೆಗಳಿವೆ. ಹೆಸ್ಕಾಂ ಈ ಕೇಬಲ್​ಗಳನ್ನು ಮೇಲಕ್ಕೆ ಎತ್ತರಿಸುವ ಕೆಲಸ ಮಾಡಬೇಕಾಗಿದೆ ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.