ಇದರ ಜತೆಗೆ ಉಷ್ಣಾಂಶ ದಾಖಲೆ ಮಟ್ಟದಲ್ಲಿ ಏರಿದ್ದು, ಉತ್ತರ ಕರ್ನಾಟಕ ಭಾಗದಲ್ಲಿ 40 ಡಿಗ್ರಿಗಿಂತ ಮೇಲೆಯೇ ಉಷ್ಣಾಂಶವಿದ್ದರೆ, ದಕ್ಷಿಣ ಜಿಲ್ಲೆಗಳಲ್ಲೂ 40 ಡಿಗ್ರಿ ಸನಿಹ ತಾಪಮಾನವಿದ್ದು, ದೊಡ್ಡ ಮಟ್ಟದ ಸಾರ್ವಜನಿಕ ಸಭೆ, ರ್ಯಾಲಿಗಳನ್ನು ಆಯೋಜಿಸುವುದು ಪ್ರಯಾಸ ದಾಯಕವಾಗಿದೆ. ಹೀಗಾಗಿ ಅಭ್ಯರ್ಥಿಗಳು ಸಮಾವೇಶದ ಬದಲು ರೋಡ್ಶೋ, ಮನೆ ಮನೆ ಪ್ರಚಾರಕ್ಕೆ ಒತ್ತು ನೀಡುತ್ತಿದ್ದಾರೆ. ಕೃಷಿ, ನರೇಗಾ ಯೋಜನೆಯಡಿ, ಕಟ್ಟಡ ಕಾರ್ವಿುಕರ ದಿನದ ಕೂಲಿ 320 ರಿಂದ 500 ರೂ.ಗೆ ಹೆಚ್ಚಳವಾಗಿದೆ. ಡೀಸೆಲ್, ಪೆಟ್ರೋಲ್ ದರವೂ ಇಳಿಯದ ಕಾರಣ ವಾಹನಗಳ ಬಾಡಿಗೆ ದರ ಪ್ರತಿ ಕಿಮೀಗೆ ಸರಾಸರಿ 3 ರಿಂದ 5 ರೂ. ಏರಿಕೆ ಕಂಡಿದೆ. ತರಕಾರಿ ದರ ಏರಿಕೆಯಿಂದಾಗಿ ಆಹಾರ ಪದಾರ್ಥಗಳ ದರ ಹೆಚ್ಚಳವಾಗಿದೆ. ಮತ್ತೊಂದೆಡೆ ಪ್ರಚಾರಕ್ಕೆ ಇಷ್ಟೇ ಹಣ ಖರ್ಚು ಮಾಡಬೇಕೆಂದು ಆಯೋಗ ಹಲವು ನಿಯಮ ರೂಪಿಸಿದೆ. ಹೀಗಾಗಿ ಚುನಾವಣೆ ಪ್ರಚಾರಕ್ಕೆ ವೆಚ್ಚ ಮಾಡಲು ಅಭ್ಯರ್ಥಿಗಳು ಮೀನಮೇಷ ಎಣಿಸುತ್ತಿದ್ದಾರೆ. ನಗರ, ಗ್ರಾಮೀಣ ಪ್ರದೇಶಗಳೆಂಬ ಭೇದವಿಲ್ಲದೆ ಚುನಾವಣೆ ಪ್ರಚಾರಕ್ಕೆ ಬಿಸಿಲಿನಿಂದಾಗಿ ಜನರು ಬರುತ್ತಿಲ್ಲ. ಪ್ರಚಾರಕ್ಕೆ ದಿನಕ್ಕೆ 500 ರೂ.ಕೂಲಿ, ಊಟ, ವಾಹನ ವ್ಯವಸ್ಥೆ ಮಾಡಬೇಕು. ಅದಕ್ಕಾಗಿ ನಿತ್ಯ ಲಕ್ಷಾಂತರ ರೂ. ವ್ಯಯಿಸಬೇಕಾಗುತ್ತದೆ. ವಿಧಾನಸಭಾ ಚುನಾವಣೆಯಲ್ಲಿ ಆಯಾ ಕ್ಷೇತ್ರದ ಅಭ್ಯರ್ಥಿಗಳು ಖರ್ಚು ಮಾಡುತ್ತಿದ್ದರು.
