ಸೋರುವ ಕೆಎಸ್​ಆರ್​ಟಿಸಿ ಬಸ್​ಗಳು

ಎಂ.ಎಸ್​.ಸಿದ್ದಲಿಂಗೇಶ್ವರ ಮಾಗಡಿ

ಮಾಗಡಿಯ ಕೆಎಸ್​ಆರ್​ಟಿಸಿ ಡಿಪೋದ ಬಹಳಷ್ಟು ಬಸ್​ಗಳು ಮಳೆ ಬಂದಾಗ ಸೋರುತ್ತಿದ್ದು, ಬಸ್​ ಹತ್ತಲು ನಾಗರಿಕರು ಹಿಂದೇಟು ಹಾಕುತ್ತಿದ್ದಾರೆ.

ಮಾಗಡಿ ಡಿಪೋನಲ್ಲಿ ಸುಮಾರು 88 ಬಸ್​ಗಳಿದ್ದು, ಹಳೆಯ ಬಸ್​ಗಳೇ ಹೆಚ್ಚಿದ್ದು, ಮಳೆ ಸುರಿಯುತ್ತಿದರೆ ಬಸ್​ ಒಳಗಿದ್ದರೂ ನೆನೆಯುವುದು ಅನಿವಾರ್ಯವಾಗಿದೆ. ಬಸ್​ಗಳಿಗೆ ಟಾರ್​ ಶೀಟ್​ ಅಳವಡಿಸದೆ ಇರುವುದರಿಂದ ಪ್ರಯಾಣಿಕರು ಸೋರುವ ಬಸ್​ಗಳಲ್ಲೆ ಪ್ರಯಾಣ ಬೆಳೆಸುವಂತಾಗಿದೆ.

ಬೆಂಗಳೂರಿನಿಂದ ಮಾಗಡಿಗೆ ಬರುವವರೆಗೂ ಮಳೆ ನೀರು ಬಸ್​ನಲ್ಲಿ ತೊಟ್ಟಿಕ್ಕುತ್ತಿತ್ತು. ಚಾಲಕ ಕೂಡ ನೆನೆದುಕೊಂಡೆ ಚಾಲನೆ ಮಾಡಿಕೊಂಡು ಬಂದರು. ಬಹುತೇಕ ಮಂದಿ ದಾಖಲೆ ಪತ್ರಗಳು ನೀರಿನಿಂದ ಹಾಳಾಗಿವೆ ಎಂದು ಮಾಗಡಿ&ಹುಲಿದುರ್ಗ ಮಾರ್ಗದ ಕೆಎಸ್​ಆರ್​ಟಿಸಿ ಬಸ್​ನಲ್ಲಿ ಪ್ರಯಾಣಿಸುತ್ತಿದ್ದ ಪ್ರಯಾಣಿಕರೊಬ್ಬರು ವಿಜಯವಾಣಿಗೆ ತಿಳಿಸಿದರು.

ಸುಮಾರು 5 ವರ್ಷಗಳಿಂದ ಹೊಸ ಬಸ್​ ಖರೀದಿಸಿಲ್ಲ, ಕಂಡಕ್ಟರ್​, ಡ್ರೆವರ್​ಗಳನ್ನು ನೇಮಕ ಮಾಡಿಕೊಂಡಿಲ್ಲ, ಗುತ್ತಿಗೆ ಆಧಾರದ ಮೇಲೆ ತೆಗೆದುಕೊಂಡಿರುವ ಸಿಬ್ಬಂದಿಗೆ ಜವಾಬ್ದಾರಿ ಇಲ್ಲದಂತಾಗಿದೆ. ಬಸ್​ಗಳು ಸೋರಿದರೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ತಿಳಿಸಿ ಸರಿಪಡಿಸಿಕೊಳ್ಳುವ ಗೋಜಿಗೆ ಹೋಗದೆ ನಮಗೇಕೆ ಈ ಉಸಾಬರಿ ಎಂಬಂತಿದ್ದಾರೆ. ಇದರಿಂದ ಪ್ರಯಾಣಿಕರು ಸಮಸ್ಯೆ ಎದುರಿಸುವತಾಗಿದೆ.

ಸಾಮಾಜಿಕ ಜಾಲತಾಣದಲ್ಲಿ ವೈರಲ್​

ಬಸ್​ನಲ್ಲಿ ಸೋರುತ್ತಿದ್ದನ್ನು ಕಂಡ ಯುವಕರು, ಅದನ್ನು ಮೊಬೈಲ್​ನಲ್ಲಿ ಸೆರೆ ಹಿಡಿದು "ಸೋರುತಿಹುದು ಮಾಗಡಿ ಕೆಎಸ್​ಆರ್​ಟಿಸಿ ಬಸ್​ಗಳು' ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ವೀಡಿಯೊ ಹರಿಬಿಟ್ಟಿದ್ದಾರೆ.

ಖಾಸಗಿ ಬಸ್​ಗಳ ಮೊರೆ

ಮಾಗಡಿಯಿಂದ ಬೆಂಗಳೂರು, ರಾಮನಗರ, ಕನಕಪುರ, ತುಮಕೂರು, ನೆಲಮಂಗಲ, ಕುಣಿಗಲ್​ ಮಾರ್ಗವಾಗಿ ಮೂರುನಾಲ್ಕು ವರ್ಷಗಳಿಂದ ಸರ್ಕಾರಿ ಬಸ್​ಗಳ ಸಂಚಾರ ಹೆಚ್ಚಾದ ಕಾರಣ ಖಾಸಗಿ ಬಸ್​ಗಳ ಸಂಖ್ಯೆ ಇಳಿಕೆಯಾಗಿದ್ದವು. ಆದರೆ ಸರ್ಕಾರಿ ಬಸ್​ ಅವ್ಯವಸ್ಥೆ ಕಂಡು  ಪ್ರಯಾಣಿಕರು ಈಗ ಮತ್ತೆ ಖಾಸಗಿ ಬಸ್​ಗಳತ್ತ ಮುಖಮಾಡುವಂತಾಗಿದೆ. ಮಹಿಳೆಯರಿಗೆ ಉಚಿತ ಪ್ರಯಾಣವಾದರೂ ನಮಗೆ ಉಚಿತ ಪ್ರಯಾಣ ಬೇಡ ಎನ್ನುವಂತಾಗಿದೆ.

ಸಮಸ್ಯೆಗಿಲ್ಲ ಪರಿಹಾರ

ಎಚ್​.ಸಿ.ಬಾಲಕೃಷ್ಣ ಶಾಸಕರಾದ ನಂತರ ಮಾಗಡಿ ಕೆಎಸ್​ಆರ್​ಟಿಸಿ ಬಸ್​ ನಿಲ್ದಾಣದಲ್ಲಿ ಎರಡು ಭಾರಿ ಕೆಎಸ್​ಆರ್​ಟಿಸಿ ಡಿಸಿ, ಡಿಪೋ ಮ್ಯಾನೇಜರ್​ ಸೇರಿ ಸಂಬಂಧಪಟ್ಟ ಅಧಿಕಾರಿಗಳ ಸಮ್ಮುಖದಲ್ಲಿ ಪ್ರಯಾಣಿಕರ ಕುಂದು&ಕೊರತೆ ಸಭೆ ನಡೆಸಿದ್ದಾರೆ. ಈ ವೇಳೆ ಸಾಕಷ್ಟು ಮಂದಿ ಪ್ರಯಾಣಿಕರು ಅಹವಾಲು ಸಲ್ಲಿಸಿದ್ದಾರೆ. ಆ ಸಮಸ್ಯೆಗಳಿಗೆ ಪರಿಹಾರ ನೀಡಲು ಅಧಿಕಾರಿಗಳು ಮುಂದಾಗಿಲ್ಲ.

ಮಳೆಗಾಲವಾದ ಕಾರಣ ಕಾರಿನಲ್ಲಿ ಓಡಾಡಲು ತೊಂದರೆ ಎಂದು ಕೆಎಸ್​ಆರ್​ಟಿಸಿ ಬಸ್​ಗೆ ಹತ್ತಿದರೆ ನೆನೆಯುವಂತಾಗಿದೆ. ಈ ಬಗ್ಗೆ ನಿರ್ವಾಹಕರನ್ನು ಪ್ರಶ್ನಿಸಿದರೆ ನಾವೇನು ಮಾಡೋಣ ಸ್ವಾಮಿ, ಎಲ್ಲರಿಗೂ ನೀಡುವಂತೆ ನಿನಗೂ ಬಸ್​ ನೀಡಿದ್ದೇವೆ ಎಂದು ನಮ್ಮ ಅಧಿಕಾರಿಗಳು ದಬ್ಬಾಳಿಕೆ ನಡೆಸುತ್ತಾರೆ ಎಂದು ಅಳಲು ತೋಡಿಕೊಂಡರು. ಮೇಲಧಿಕಾರಿಗಳು ಈ ಬಗ್ಗೆ ಗಮನ ಹರಿಸಿ ಪ್ರಯಾಣಿಕರಿಗೆ ಉತ್ತಮ ಬಸ್​ ಸೇವೆ ನೀಡಬೇಕು.

ವಿನಯ್, ವ್ಯಾಪಾರಿ ​

ಸೋರುತ್ತಿರುವ ಬಸ್​ಗಳನ್ನು ಸರಿಪಡಿಸುವಂತೆ ಸಂಬಂಧಪಟ್ಟವರಿಗೆ ತಿಳಿಸಲಾಗುವುದು. ಹೊಸ ಬಸ್​ಗಳನ್ನು ನೀಡುವಂತೆ ಈಗಾಗಲೇ ಸಾರಿಗೆ ಸಚಿವರಿಗೆ ಮನವಿ ಮಾಡಲಾಗಿದೆ. ಶ್ರೀವೇ ಹೊಸ ಬಸ್​ ನೀಡುವ ಭರವಸೆ ನೀಡಿದ್ದಾರೆ.

>  ಎಚ್​.ಸಿ.ಬಾಲಕೃಷ್ಣ

ಶಾಸಕ