ಮರದ ಹಲಗೆ ಮೇಲೆ ಮಣ್ಣಿನಿಂದ ಮಳೆರಾಯನ ಮೂರ್ತಿ ಮಾಡಿ ಅದನ್ನು ತಲೆ ಮೇಲೆ ಹೊತ್ತು ಗ್ರಾಮದ ಮನೆ ಮನೆ ಬಳಿ ಹೋಗಿ ಅದರ ಮೇಲೆ ನೀರು ಹಾಕಿಸಿಕೊಂಡು "ಹುಯ್ಯೋ ಹುಯ್ಯೋ ಮಳೆರಾಯ, ಕೆರೆ&ಕುಂಟೆಲ್ಲಿ ನೀರಿಲ್ಲ, ಬಾರೋ ಬಾರೋ ಮಳೆರಾಯ' ಎಂದು ಪ್ರಾರ್ಥಿಸುತ್ತ ಎಲ್ಲರೂ ಹಬ್ಬದ ರೀತಿಯಲ್ಲಿ ಮೆರವಣಿಗೆ ನಡೆಸುತ್ತಾರೆ. ಜತೆಗೆ ಅಕ್ಕಿ, ರಾಗಿ, ಬೆಲ್ಲ, ಸಾಂಬಾರು ಪದಾರ್ಥಗಳನ್ನು ಮನೆಗಳಲ್ಲಿ ಪಡೆದು ನಂತರ ಮೂರ್ತಿಯನ್ನು ಊರ ಓಣಿಯಲ್ಲಿ ಇಟ್ಟು ಬರುತ್ತಾರೆ. ಮತ್ತೆ ಕೆಲವು ಗ್ರಾಮಗಳಲ್ಲಿ ಕೆರೆ ನೀರಿನಲ್ಲಿ ಮುಳುಗಿಸಿ ಬರುತ್ತಾರೆ. ಹೀಗೆ ಮಳೆರಾಯನನ್ನು ಪೂಜಿಸಿದರೆ ಮಳೆ ಬರುತ್ತದೆ ಎನ್ನುವುದು ಹಿರಿಯರ ನಂಬಿಕೆ. ಈ ಹಿನ್ನೆಲೆಯಲ್ಲಿ ವರುಣನ ಕೃಪೆಗಾಗಿ ಪ್ರಾರ್ಥನೆ ಸಲ್ಲಿಸಲಾಗಿದೆ.
