ಬೆಳ್ಳಾವಿ ಕಾರದ ಶ್ರೀ ಭೇಟಿ ಮಾಡಿದ ಕುಣಿಗಲ್​ ಶಾಸಕ

ತುಮಕೂರು: ಡಿಸಿಎಂ ಡಿಕೆಶಿ ಸಹೋದರ ಸಂಬಂಧಿ, ಕುಣಿಗಲ್​ ಶಾಸಕ ಡಾ.ಎಚ್​.ಡಿ.ರಂಗನಾಥ್​ ಅಚ್ಚರಿ ಬೆಳವಣಿಗೆಯಲ್ಲಿ ಬೆಳ್ಳಾವಿ ಕಾರದ ಮಠದ ಶ್ರೀ ಕಾರದ ವೀರಬಸವ ಸ್ವಾಮೀಜಿ ಅವರನ್ನು ಭೇಟಿ ಮಾಡಿರುವುದು ತೀವ್ರ ಚರ್ಚೆ ಹುಟ್ಟುಹಾಕಿದೆ.

ಲಿಂಕ್​ ಕೆನಾಲ್​ ಯೋಜನೆ ವಿರುದ್ಧದ ಹೋರಾಟದಲ್ಲಿ ಮಂಚೂಣಿಯಲ್ಲಿದ್ದ ಶ್ರೀ ಕಾರದ ವೀರಬಸವ ಸ್ವಾಮೀಜಿ ಅವರನ್ನು ಸೋಮವಾರ ಸಂಜೆ ರಂಗನಾಥ್​ ಭೇಟಿ ಮಾಡಿರುವುದು ಸಾಕಷ್ಟು ಕುತೂಹಲ ಉಂಟುಮಾಡಿದೆ. ಲಿಂಕ್​ ಕೆನಾಲ್​ ಹೋರಾಟದಿಂದ ಕುಣಿಗಲ್​ಗೆ ಅನ್ಯಾಯವಾಗುತ್ತಿರುವ ಬಗ್ಗೆ ಶ್ರೀಗಳ ಜತೆ ಚರ್ಚೆ ನಡೆಸಿ ತಮ್ಮ ಅಳಲು ತೋಡಿಕೊಂಡರು.

ರಂಗನಾಥ್​ ಅವರ ಶ್ರೀಗಳ ಭೇಟಿ ಹಿಂದೆ ಒತ್ತಡ ತಂತ್ರವೋ, ಹೋರಾಟ ದಾರಿತಪ್ಪಿಸುವ ಉದ್ದೇಶ ಅಡಗಿದೆಯೋ ಎಂಬುದು ಹೋರಾಟಗಾರರ ಕಳವಳಕ್ಕೆ ಕಾರಣವಾಗಿದೆ.

ಮೇ 31 ರಂದು ಎಕ್ಸ್​ ಪ್ರೆಸ್​ ಕೆನಾಲ್​ ಯೋಜನೆ ವಿರೋಧಿ ಹೋರಾಟವು ನಿರೀಕ್ಷೆ ಗು ಮೀರಿ ಯಶಕಂಡಿದ್ದು ಸರ್ಕಾರಕ್ಕೆ ದೊಡ್ಡ ಹಿನ್ನಡೆಯಾಗಿದೆ. ಹಾಗಾಗಿ, ಡಿ.ಕೆ.ಶಿವಕುಮಾರ್​ ಮಠಾಧೀಶರ ಮನವೊಲಿಕೆಗೆ ಮುಂದಾಗಿದ್ದಾರೆ ಎಂದು ಅಂದಾಜಿಸಲಾಗುತ್ತಿದೆ.