ರಾಜ್ಯ ರಾಜಕಾರಣದ ಪವರ್ಹೌಸ್ ಬೆಳಗಾವಿ ಜಿಲ್ಲೆಯ ರಾಜಕಾರಣವೇ ವಿಚಿತ್ರ, ವಿಭಿನ್ನ ಹಾಗೂ ಕಗ್ಗಂಟು. ಸಹಕಾರ ರಂಗದ ಬಿಗಿ ಹಿಡಿತ ಇರುವ ಜಿಲ್ಲೆಯಲ್ಲಿ ‘ಸಕ್ಕರೆ’ ರಾಜಕಾರಣ, ಭಾಷೆ, ಗಡಿ, ಕುಟುಂಬ ರಾಜಕಾರಣವೂ ಸೇರಿ ‘ಒಳ ಹೊಂದಾಣಿಕೆ’ಯೂ ನಿರ್ಣಾಯಕ ಪಾತ್ರ ವಹಿಸುತ್ತ ಬಂದಿರುವುದು ಸುಳ್ಳಲ್ಲ. 2023ರ ವಿಧಾನಸಭಾ ಚುನಾವಣೆಗೆ ಅಖಾಡ ಈಗಾಲೇ ಸಿದ್ಧವಾಗಿದ್ದು, ಜಿಲ್ಲೆಯಲ್ಲಿ ಒಟ್ಟು 18 ವಿಧಾನಸಭಾ ಕ್ಷೇತ್ರಗಳಿವೆ. ಬೆಳಗಾವಿ ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ 10 ಕ್ಷೇತ್ರಗಳಿವೆ. ಜೆಡಿಎಸ್-ಕಾಂಗ್ರೆಸ್ ಸಮ್ಮಿಶ್ರ ಸರ್ಕಾರ ಕೆಡವಿದಾಗಿನಿಂದ ಇಲ್ಲಿನ ರಾಜಕೀಯ ಸ್ಥಿತಿ ‘ಮನೆಯೊಂದು ಮೂರು ಬಾಗಿಲು’ ಎಂಬಂತಾಗಿದ್ದು, ಯಾರ್ಯಾರು ಹೊಂದಾಣಿಕೆ ಮಾಡಿಕೊಳ್ಳುತ್ತಾರೋ? ಯಾರ್ಯಾರು ಹೊಂದಾಣಿಕೆ ಹೆಸರಲ್ಲೇ ಮತ್ತೊಬ್ಬರ ಕಾಲು ಜಗ್ಗುತ್ತಾರೋ ಎಂಬುದು ಸದ್ಯಕ್ಕೆ ಗುಟ್ಟು. 10 ಕ್ಷೇತ್ರಗಳ ಪೈಕಿ ಬೈಲಹೊಂಗಲ ಹಾಗೂ ಅರಬಾವಿ ಕ್ಷೇತ್ರದಲ್ಲಿ ಮಾತ್ರ ಜೆಡಿಎಸ್ ಉಸಿರಾಡುತ್ತಿದ್ದು, ಉಳಿದೆಡೆ ಬಿಜೆಪಿ-ಕಾಂಗ್ರೆಸ್ ನೇರ ಹಣಾಹಣಿ ಏರ್ಪಡಲಿದೆ.
