ಭತ್ತದ ಕೃಷಿಯಿಂದ ಅನ್ನದಾತ ವಿಮುಖ

ನಂ.1 ಕನ್ನಡ ದಿನಪತ್ರಿಕೆ ವಿಜಯವಾಣಿ ಪತ್ರಿಕಾ ಭವನದಲ್ಲಿ ಗುರುವಾರ ಕೃಷಿಕರೊಂದಿಗೆ ಆಯೋಜಿಸಿದ್ದ ಸಂವಾದ ಕಾರ್ಯಕ್ರಮದಲ್ಲಿ ಸಮಸ್ಯೆ ಬಿಚ್ಚಿಟ್ಟರು.

ಮುಂಗಾರು ವಿಳಂಬ, ಬರಗಾಲ, ಅಕಾಲಿಕ ಮಳೆ, ಉತ್ಪಾದನಾ ವೆಚ್ಚ ಹೆಚ್ಚಳ, ಕಾರ್ಮಿಕರ ಕೊರತೆ, ಬೆಲೆ ಇಲ್ಲದಿರುವುದು, ರೋಗಬಾಧೆ ಇವೆಲ್ಲಾ ಕಾರಣಗಳು ಸರ್ಕಾರಗಳಿಗೆ ಗೊತ್ತಿದ್ದರೂ ಭತ್ತ ಕೃಷಿಕರಿಗೆ ವಿಶೇಷ ಪ್ಯಾಕೇಜ್ ಘೋಷಿಸದ ಪರಿಣಾಮ ಭತ್ತದ ಬೆಳೆಗೆ ರೈತರು ನಷ್ಟದ ಭಯದಿಂದ ಕೃಷಿಗೆ ಆಸಕ್ತಿ ತೋರಿಸುತ್ತಿಲ್ಲ ಎಂದು ಅಳಲು ತೋಡಿಕೊಂಡರು.

ಕೆಲ ರಾಜ್ಯಗಳಲ್ಲಿ ಭತ್ತ ಬೆಳೆಯುವ ರೈತರಿಗೆ ಎಕರೆಗೆ ಇಂತಿಷ್ಟು ಸಹಾಯಧನ ಕೊಟ್ಟು ರೈತರನ್ನು ಪ್ರೋತ್ಸಾಹ ಮಾಡಲಾಗುತ್ತಿದೆ. ನಮ್ಮಲ್ಲಿ ಸರಿಯಾದ ಬೆಳೆಹಾನಿ ಪರಿಹಾರವನ್ನು ನೀಡುವುದಿಲ್ಲ. ಆಸ್ತಿ ದಾಖಲಾತಿ ಇಲ್ಲದವರಿಗೆ ನಯಾಪೈಸೆ ಪರಿಹಾರ ನೀಡುತ್ತಿಲ್ಲ ಎಂದು ದೂರಿದರು.

ಭತ್ತ ನಶಿಸುತ್ತಿರುವ ಕೃಷಿ ಎಂದು ಭಾವಿಸಿ ಸರ್ಕಾರ ಪ್ರೋತ್ಸಾಹಧನ ನೀಡದಿದ್ದರೆ ಮುಂದಿನ ಹತ್ತು ವರ್ಷಗಳಲ್ಲಿ ಕೊಡಗಿನಲ್ಲಿ ಭತ್ತದ ಗದ್ದೆಗಳನ್ನು ಫೋಟೋದಲ್ಲಿ ಮಾತ್ರ ನೋಡಬೇಕಾಗುವಂತಹ ಸ್ಥಿತಿ ಬರಲಿದೆ ಎಂದು ಹೇಳಿದರು.

ಸೋಮವಾರಪೇಟೆ ತಾಲೂಕನ್ನು ಭತ್ತದ ಕಣಜ ಎಂದೇ ಹೇಳಲಾಗುತ್ತಿತ್ತು. ಅತೀ ಹೆಚ್ಚು ಭತ್ತ ಉತ್ಪಾದನೆಯಾಗುತ್ತಿತ್ತು. ಪ್ರತಿವರ್ಷವೂ ಭತ್ತಕ್ಕೆ ಉತ್ತಮ ಬೆಲೆ ಸಿಗದಿದ್ದರೂ ಮನೆ ಬಳಕೆಗಾಗಿ ಭತ್ತ ಬೆಳೆಯುತ್ತಿದ್ದರು. ಉಳಿಕೆ ಭತ್ತವನ್ನು ಸಿಕ್ಕಿದ ಬೆಲೆಗೆ ಮಾರಲಾಗುತ್ತಿತ್ತು. ಕಳೆದ ಹತ್ತು ವರ್ಷಗಳಿಂದಲೇ ಭತ್ತದ ಗದ್ದೆಗಳನ್ನು ಮುಚ್ಚಿ ಕಾಫಿ ತೋಟ ಮಾಡಲು ಪ್ರಾರಂಭಿಸಿದರು. ಆಗಲೂ ಸರ್ಕಾರ, ಕೃಷಿ ಇಲಾಖೆ ಎಚ್ಚೆತ್ತುಕೊಳ್ಳಲಿಲ್ಲ, ಸೌಲಭ್ಯಗಳನ್ನು ವಿತರಿಸಲಿಲ್ಲ, ಸಹಾಯಧನ ಕೊಡಲಿಲ್ಲ. ಈಗ ಕೆಲ ಗ್ರಾಮಗಳಲ್ಲಿ ಭತ್ತದ ಗದ್ದೆಗಳೇ ಮಾಯವಾಗಿವೆ. ಮನೆಗೆ ಬೆಂಕಿ ಬಿದ್ದಮೇಲೆ ಬಾವಿ ತೋಡಿದರೆ ಪ್ರಯೋಜನವಿಲ್ಲ ಎಂದು ರೈತರು ಹೇಳಿದರು.

ಹಿಂದೆಲ್ಲಾ ಜೂನ್ ತಿಂಗಳಲ್ಲಿ ಮುಂಗಾರು ಪ್ರಾರಂಭವಾಗುತ್ತಿತ್ತು. ಜುಲೈನಲ್ಲಿ ನಾಟಿ ಮುಗಿಸುತ್ತಿದ್ದರು. ಹಿಂಗಾರು ಸಕಾಲದಲ್ಲಿ ಬೀಳುತ್ತಿತ್ತು. ಈಗ ಗ್ರಾಮದ ಕೆರೆಗಳಲ್ಲಿ ನೀರು ಸಂಗ್ರಹವಾಗುತ್ತಿಲ್ಲ. ಈಗ ಕೆರೆಗಳ ಜಾಗ ಒತ್ತುವರಿಯಾಗಿವೆ. ಒತ್ತುವರಿ ತೆರವು ಆಗುತ್ತಿಲ್ಲ. ಎತ್ತುಗಳಿಂದ ಉಳುಮೆ ಮಾಡಲಾಗುತ್ತಿತ್ತು. ಈಗ ಜಾನುವಾರುಗಳನ್ನು ಸಾಕಲು ಆಗುತ್ತಿಲ್ಲ. ಭತ್ತ ಭೂಮಿಗೆ ರಸ್ತೆಗಳಿಲ್ಲ. ಅನೇಕರು ರಸ್ತೆಯ ಜಾಗವನ್ನು ಒತ್ತುವರಿ ಮಾಡಿಕೊಂಡಿದ್ದಾರೆ. ಒತ್ತುವರಿ ತೆರವಿಗೆ ಕಂದಾಯ ಇಲಾಖೆ ಮುಂದಾಗುತ್ತಿಲ್ಲ. ಕೃಷಿ ಯಂತ್ರಗಳನ್ನು ಭತ್ತ ಭೂಮಿಗೆ ತೆರಳಲು ರಸ್ತೆ ಇಲ್ಲದಂತಾಗಿದೆ. ಇವೆಲ್ಲವೂ ಸರ್ಕಾರದ ನಿರ್ಲಕ್ಷ್ಯದಿಂದ ಆದ ಪ್ರಮಾದಗಳು ಎಂದು ರೈತರು ನೊಂದು ನುಡಿದರು.

ಸೋಮವಾರಪೇಟೆ ತಾಲೂಕಿನಲ್ಲಿ ಅತಿಹೆಚ್ಚು ಅರೇಬಿಕಾ ಕಾಫಿ ಬೆಳೆಯುತ್ತಿದ್ದು, ಹಿಂದಿನ ಹತ್ತು ಹದಿನೈದು ವರ್ಷಗಳಲ್ಲಿ ಭತ್ತ ಗದ್ದೆಗಳನ್ನು ಸಮತಟ್ಟು ಮಾಡಿ, ಕಾಫಿ, ಅಡಕೆ ಕೃಷಿ ಮಾಡಿದ ಕೃಷಿಕರು ಉತ್ತಮ ಫಸಲನ್ನು ಪಡೆದು ಯಶಸ್ಸು ಕಂಡ ಹಿನ್ನೆಲೆಯಲ್ಲಿ ಕೃಷಿಕರು ಉತ್ತೇಜನಗೊಂಡು ಭತ್ತ ಕೃಷಿಗೆ ಗುಡ್‌ಬೈ ಹೇಳುತ್ತಿದ್ದಾರೆ ಎಂದು ಹೇಳಿದರು.

ಪ್ರಸಕ್ತ ವರ್ಷ ಕಳೆದ ಮೇ ತಿಂಗಳಿನಿಂದ ಮಳೆ ಪ್ರಾರಂಭ ನಿರಂತರವಾಗಿ ಡಿಸೆಂಬರ್ ತನಕ ಮಳೆ ಸುರಿದಿದೆ. ಬಹತೇಕ ಕಡೆಗಳಲ್ಲಿ ಭತ್ತ ಬೆಳೆಗೆ ಹಾನಿಯಾಗಿದೆ. ಭತ್ತದ ಇಳುವರಿ ಬಹಳ ಕಡಿಮೆಯಾಗಿದೆ. ಬುಧವಾರ ಅನೇಕ ಗ್ರಾಮಗಳಲ್ಲಿ ಅಕಾಲಿಕ ಮಳೆ ಸುರಿದಿದೆ. ಕೊಯ್ಲಿಗೆ ಬಂದ ಪೈರಿಗಳು ಮಣ್ಣಿಗೆ ಬಿದ್ದಾಗಿದೆ. ಇದರಿಂದ ದೊಡ್ಡಮಟ್ಟದ ಹಾನಿಯಾಗಿದೆ. ಇನ್ನು ಮಳೆ ಬೀಳುವ ಮುನ್ಸೂಚನೆಯನ್ನು ಹವಾಮಾನ ಇಲಾಖೆ ನೀಡಿದೆ. ಬೆಳೆಹಾನಿ ಪರಿಹಾರದ ಆಸೆಯನ್ನು ರೈತರು ಬಿಟ್ಟಿದ್ದಾರೆ ಎಂದು ಬೇಸರ ವ್ಯಕ್ತಪಡಿಸಿದರು.

ಕಾಫಿ ಬೆಳೆದು ನಷ್ಟದಿಂದ ಬಚಾವಾಗಿದ್ದೇವೆ: ಹಲವಾರು ದಶಕಗಳಿಂದ ಭತ್ತ ಕೃಷಿ ಮಾಡಿದ್ದೇವೆ. ಭತ್ತ ಬೆಳೆದು ಸಾಲಗಾರರಾಗಬೇಕಾಯಿತು. ಪ್ರತಿವರ್ಷ ಉತ್ಪಾದನಾ ವೆಚ್ಚ ಜಾಸ್ತಿಯಾಯಿತು, ರಾಸಾಯನಿಕ ಗೊಬ್ಬರ ಬೆಲೆ ಗಗನಕ್ಕೇರಿತು, ರೋಗಬಾಧೆ ಹೆಚ್ಚಾಯಿತು, ಭತ್ತಕ್ಕೆ ಬೆಲೆ ಸಿಗಲಿಲ್ಲ. ಸರ್ಕಾರ ತೃಪ್ತಿಕರವಾದ ಬೆಂಬಲ ಬೆಲೆ ಕೊಡಲಿಲ್ಲ, ಧಾರಾಕಾರ ಮಳೆ, ಅಕಾಲಿಕ ಮಳೆಯಿಂದ ಫಸಲು ಹಾನಿಯಾಯಿತು. ಸರ್ಕಾರದಿಂದ ಸೂಕ್ತ ಪರಿಹಾರ ಸಿಗಲಿಲ್ಲ. ಪ್ರೋತ್ಸಾಹಧನವನ್ನೂ ಕೊಡಲಿಲ್ಲ. ಗದ್ದೆಗಳನ್ನು ಮುಚ್ಚಿ ತೋಟಗಾರಿಕಾ ಬೆಳೆಗಳನ್ನು ಬೆಳೆಯುವುದು ಒಳ್ಳೆಯದು ಎನಿಸಿತು. ಈಗ ಕಾಫಿ ಫಸಲು ಸಿಗುತ್ತಿದೆ. ನಷ್ಟದಿಂದ ಬಚಾವಾಗಿದ್ದೇವೆ.