ವಿಜೃಂಭಣೆಯ ಪುತ್ತರಿ ಕೋಲಾಟ್

ಆರಾಯಿರ ನಾಡ್ ಪೂಮಾಲೆ ಮಂದ್ ವಿರಾಜಪೇಟೆ ವತಿಯಿಂದ ಪೂಮಾಲೆ ಮಂದ್‌ನಲ್ಲಿ ವಾರ್ಷಿಕ ಪುತ್ತರಿ ಕೋಲಾಟ್ ಪ್ರದರ್ಶನ ವಿಜೃಂಭಣೆಯಿಂದ ಜರುಗಿತು. ಭೈರವನಾಡ್ ಎಡೆನಾಡ್, ಬೇಟೋಳಿನಾಡ್, ಪೊರೆವನಾಡ್ ಮತ್ತು ಕುಕ್ಲೂರು ಗ್ರಾಮ ನಾಡುಗಳು, ಐಮಂಗಲ, ಚೆಂಬೆಬೆಳ್ಳೂರು, ಮಗ್ಗುಲ, ತಲಕಟ್ಟಕೇರಿ, ದೇವಣಗೇರಿ, ಹಾಲುಗುಂದ, ಭೈರನಾಡ್, ಬೇಟೋಳಿ, ಆರ್ಜಿ, ನಾಂಗಾಲ, ಕುಕ್ಲೂರು, ಕಣ್ಣಂಗಾಲ, ವೈಪಡ( ಮಗ್ಗುಲ) ಬಿಟ್ಟಂಗಾಲ, ಹಚ್ಚಿನಾಡ್ (ಪಚ್ಚಾಟ್) ಪೆಗ್ಗಳ, ಬಾಳೂಗೋಡು ಗ್ರಾಮಗಳ ಜನರು ಕೊಡವ ಸಾಂಪ್ರದಾಯಿಕ ಧರಿಸಿನಲ್ಲಿ ಪೂಮಾಲೆ ಮಂದ್‌ಗೆ ಪ್ರವೇಶ ಮಾಡಿದರು. ನಂತರ ಊರು, ತಕ್ಕ, ನಾಡ್ ತಕ್ಕರಿಗೆ ಮಂದ್ ಸಮಿತಿಯ ಪದಾಧಿಕಾರಿಗಳು ಹೂಮಾಲೆ ಹಾಕಿ ಬರಮಾಡಿಕೊಂಡರು. ಎಲ್ಲ ಊರುಗಳ ಬಾಂಧವರಿಂದ ಮೂರು ಸುತ್ತುಗಳ ಕೋಲಾಟ್ ಪ್ರದರ್ಶನ ನಡೆಯಿತು. ಏಳು ಜೋಡಿಗಳಿಂದ ಪರೆಯ ಕಳಿ ನಡೆಯಿತು. ತ್ರಿವೇಣಿ ಆಂಗ್ಲ ಮಾಧ್ಯಮ ಶಾಲೆಯ ವಿದ್ಯಾರ್ಥಿಗಳಿಂದ ಉಮ್ಮತ್ತಾಟ್, ಬೊಳಕಾಟ್ ಪ್ರದರ್ಶನ ನಡೆಯಿತು.

ಆರಾಯಿರ ನಾಡ್ ಪೂಮಾಲೆ ಮಂದ್ ಸಮಿತಿಯ ಮರಣ ನಿಧಿ ಫಂಡ್ ಅಧ್ಯಕ್ಷ ಚೆಂದಂಡ ಪೊನ್ನಪ್ಪ ಮಾತನಾಡಿ, ವರ್ಷದಲ್ಲಿ ಒಂದು ಬಾರಿ ನಡೆಯುವ ಕೊಡವ ಸಾಂಪ್ರದಾಯಿಕ ವಾರ್ಷಿಕ ಕೋಲ್ ಧೀಮಂತ ಸಂಸ್ಕೃತಿಯನ್ನು ಪ್ರತಿಬಿಂಬಿಸುತ್ತದೆ. ಕೊಡವ ಆಚಾರ-ವಿಚಾರಗಳು ಜೀವಂತವಾಗಿರಿಸುವ ನಿಟ್ಟಿನಲ್ಲಿ ಕೊಡವ ಸಮುದಾಯ ಬಾಂಧವರು ಮತ್ತು ಕೊಡವ ಭಾಷಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಕಲೆಗಳನ್ನು ಉಳಿಸುವ ಮತ್ತು ಪ್ರೋತ್ಸಾಹಿಸಿದಲ್ಲಿ ಮಾತ್ರ ಮುಂದಿನ ಪೀಳಿಗೆಯು ಆಚರಣೆಗೆ ಮುಂದಾಗುತ್ತದೆ ಎಂದು ಹೇಳಿದರು. ಕೋಲಾಟ್, ಪೆರಿಯ ಕಳಿ ವಿಜೇತರನ್ನು ಗೌರವಿಸಲಾಯಿತು.

ಸಮಿತಿಯ ಅಧ್ಯಕ್ಷ ಅಜ್ಜನಿಕಂಡ ಸುದೀರ್, ಉಪಾಧ್ಯಕ್ಷ ವಾಟೇರಿರ ಶಂಕರಿ ಪೂವಯ್ಯ, ಕಾರ್ಯದರ್ಶಿ ಪೊಟ್ಟಂಡ ಗಣೇಶ್, ಕ್ರೀಡಾ ಸಮಿತಿ ಅಧ್ಯಕ್ಷ ಪುಗ್ಗೇರ ನಂದಾ ಇದ್ದರು.