ಗುಲಾಮಗಿರಿ ಪದ್ಧತಿಯಡಿ ಆದಿವಾಸಿಗಳ ಜೀವನ

ಕರ್ನಾಟಕ ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ, ಆದಿವಾಸಿ ಆದಿಕಾರ್ ರಾಷ್ಟ್ರೀಯ ಮಂಚ್ ಸಂಯೋಜಿತ ಕೊಡಗು ಜಿಲ್ಲಾ ಸಮಿತಿಯಿಂದ ನಗರದ ಟೀಚರ್ಸ್ ಕಾಂಪ್ಲೆಕ್ಸ್‌ನ ವೈ.ಕೆ.ಗಣೇಶ ಸಭಾಂಗಣದಲ್ಲಿ ಆಯೋಜಿಸಿದ್ದ ನಾಲ್ಕನೇ ಕೊಡಗು ಜಿಲ್ಲಾ ಸಮಾವೇಶ ಉದ್ಘಾಟಿಸಿ ಮಾತನಾಡಿದ ಅವರು, ಕೊಡಗು ಜಿಲ್ಲೆಯ ಆದಿವಾಸಿಗಳ ಜೀವನ ಶೈಲಿ, ಸಂಸ್ಕೃತಿ, ಭಾಷೆ ವಿಭಿನ್ನವಾಗಿದೆ.

ಸರ್ಕಾರ ಅನೇಕ ಯೋಜನೆಗಳನ್ನು ಆದಿವಾಸಿಗಳ ಹೆಸರಿನಲ್ಲಿ ಬಿಡುಗಡೆ ಮಾಡಿದರೂ ಆದಿವಾಸಿಗಳಿಗೆ, ಬುಡಕಟ್ಟು ಜನಾಂಗದವರಿಗೆ ತಲುಪಲು ಮೀನಮೇಷ ಎಣಿಸುತ್ತಿದೆ. ಕೊಡಗಿನಲ್ಲಿ ಆದಿವಾಸಿಗಳನ್ನು ಮತ್ತು ಬುಡಕಟ್ಟು ಜನಾಂಗದವರನ್ನು ಭೇಟಿ ಮಾಡಲು ತೋಟದ ಮಾಲೀಕರ ಒಪ್ಪಿಗೆ ಕೇಳಬೇಕು. ಇದಕ್ಕಾಗಿ ಪೊಲೀಸ್ ಇಲಾಖೆಯ ಮೊರೆ ಹೋಗಬೇಕು. ತೋಟದ ಮಾಲೀಕರ ಗುಲಾಮಗಿರಿ ಪದ್ಧತಿಯಲ್ಲಿ ಇನ್ನೂ ಆದಿವಾಸಿಗಳು ಜೀವನ ಮಾಡುತ್ತಿದ್ದಾರೆ. ನಮ್ಮ ಜನಾಂಗದ ಚುನಾಯಿತ ಪ್ರತಿನಿಧಿಗಳಿದ್ದರೂ ಜನಾಂಗದ ಅಭಿವೃದ್ಧಿ ಕುಂಠಿತವಾಗಿದೆ ಎಂದು ತಿಳಿಸಿದರು.

ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ ರಾಜ್ಯ ಸಹ ಸಂಚಾಲಕ ಡಾ.ಎಸ್.ವೈ.ಗುರುಶಾಂತ್ ಮಾತನಾಡಿ, ಸರ್ಕಾರಗಳು ಆದಿವಾಸಿಗಳಿಗೆ ನಿವೇಶನ ನೀಡುವಲ್ಲಿ ವಿಫಲವಾಗಿವೆ. ಸರ್ಕಾರದ ಆಸ್ತಿಗಳು ಶ್ರೀಮಂತರ ಪಾಲಾಗಿವೆ. ಹೋರಾಟಗಳಿಂದ ಕೆಲವು ಕಡೆಗಳಲ್ಲಿ ಮಾತ್ರ ಆದಿವಾಸಿಗಳಿಗೆ ಹಕ್ಕು ದೊರಕಿವೆ. ಇನ್ನೂ ಹೋರಾಟ ನಡೆಯುತ್ತಿದೆ. ಸರ್ಕಾರ ಆದಿವಾಸಿಗಳು, ಬುಡಕಟ್ಟು ಜನಾಂಗದ ಅಭಿವೃದ್ಧಿಗೆ ಕೋಟ್ಯಂತರ ರೂ. ಅನುದಾನ ಮೀಸಲಿಟ್ಟರೂ ಅದು ಬೇರೆ ಕಾರ್ಯಗಳಿಗೆ ಬಳಕೆಯಾಗುತ್ತಿದೆ. ಸರ್ಕಾರಗಳು ಆನೆ-ಹುಲಿ-ಮಾನವ ಸಂಘರ್ಷ ನೆಪ ಹೇಳಿ ಕಾಡುಗಳಿಂದ ಆದಿವಾಸಿಗಳನ್ನು ಹೊರತಳ್ಳುವ ಪ್ರಯತ್ನ ಮಾಡಲಾಗುತ್ತಿದೆ. ಕಾಡಿನಿಂದ ನಾಡಿಗೆ ಬಂದರೂ ನಿವೇಶನ ಕೊಡಲು ಸರ್ಕಾರದ ಜಾಗಗಳಿಲ್ಲ. ಎಲ್ಲವೂ ಒತ್ತುವರಿಯಾಗಿದೆ ಎಂದು ದೂರಿದರು.

ಕಾರ್ಮಿಕ ಮುಖಂಡ ಪಿ.ಆರ್.ಭರತ್ ಮಾತನಾಡಿ, ಕೊಡಗಿನಲ್ಲಿ ಗುಲಾಮಗಿರಿ ತೊಲಗಬೇಕು. ಆದಿವಾಸಿಗಳ ಅಭಿವೃದ್ಧಿ ಯಾವ ಸರ್ಕಾರ ಬಂದರೂ ಆಗುತ್ತಿಲ್ಲ. ಇಂದಿಗೂ ಗುಡಿಸಲುಗಳಲ್ಲಿ ಜೀವನ ನಡೆಸುತ್ತಿದ್ದಾರೆ. ತಮ್ಮ ಹಕ್ಕಿಗಾಗಿ ಹೋರಾಟ ಮಾಡುತ್ತಲೇ ಇದ್ದಾರೆ. ಸರ್ಕಾರದ ಯೋಜನೆಗಳು ಆದಿವಾಸಿಗಳಿಗೆ ತಲುಪಬೇಕು ಎಂದರು.

ಇದೇ ವೇಳೆ ತಾಲೂಕು ಸಮಿತಿ ರಚಿಸಿ ಪದಾಧಿಕಾರಿಗಳನ್ನು ಆಯ್ಕೆ ಮಾಡಲಾಯಿತು. ಸಮಿತಿಯ ಪಿ.ಕೆ.ರಮೇಶ್, ಶಿವು, ರಾಮಕೃಷ್ಣ, ಅಶೋಕ, ಆದಿವಾಸಿ ಹಾಗೂ ಬುಡಕಟ್ಟು ಜನಾಂಗದ ಮುಖಂಡರು ಹಾಜರಿದ್ದರು.