ಬಾಬುರಾವ ಯಡ್ರಾಮಿ
ಕಲಬುರಗಿ ಜಿಲ್ಲೆ ಹೊನ್ನಕಿರಣಗಿ, ಫಿರೋಜಾಬಾದ್ ಬಳಿ ೧೦೦೦ ಎಕರೆ ಪ್ರದೇಶದಲ್ಲಿ ಕೇಂದ್ರ ಸರ್ಕಾರದ ಪಿಎಂ ಮಿತ್ರ ಯೋಜನೆಯಡಿ ಮಂಜೂರು ಮಾಡಿದ ಮೆಗಾ ಟೆಕ್ಸ್ ಟೈಲ್ ಪಾರ್ಕ್ ಕಡತಕ್ಕೇ ಸೀಮಿತವಾಗಿದೆ. ರಾಜ್ಯ ಸರ್ಕಾರ ಶಿಫಾರಸು ಮಾಡಿದ್ದ ಮೂರು ಜಿಲ್ಲೆಗಳ ಹೆಸರುಗಳಲ್ಲಿ ಕೇಂದ್ರ ಕಲಬುರಗಿಗೆ ಮೊಹರು ಒತ್ತಿದೆ. ಇದು ಈ ಭಾಗದಲ್ಲಿ ಪ್ರತ್ಯಕ್ಷ ಹಾಗೂ ಪರೋಕ್ಷವಾಗಿ ಒಂದು ಲಕ್ಷಕ್ಕೂ ಅಧಿಕ ದುಡಿಯುವ ಕೈಗಳಿಗೆ ಕೆಲಸ ಕೊಡುವ ದೊಡ್ಡ ಯೋಜನೆ. ಆದರೆ ಇದರ ಪ್ರಾರಂಭಿಕ ಕೆಲಸಗಳು ಸಹ ಶುರುವಾಗದಿರುವುದು ನಿರುದ್ಯೋಗಿಗಳಲ್ಲಿ ನಿರಾಸೆ ತಂದಿದೆ. ಕಳೆದ ಮಾರ್ಚ್ ೨೭ರಂದು ಆಗಿನ ಸಿಎಂ ಬಸವರಾಜ ಬೊಮ್ಮಾಯಿ ತರಾತುರಿಯಲ್ಲಿ ಇದಕ್ಕೆ ಭೂಮಿಪೂಜೆ ನೆರವೇರಿಸಿದ ಬಳಿಕ ಈವರೆಗಿನ ದೊಡ್ಡ ಕೆಲಸ. ರಾಜ್ಯ ಮತ್ತು ಕೇಂದ್ರ ಸರ್ಕಾರ ಸಮನ್ವಯ ಸಾಧಿಸಿ ಈ ಪಾರ್ಕ್ಗೆ ಉದ್ಯಮಿಗಳಿಂದ ಬಂಡವಾಳ ಹೂಡಿಸಿ ಕಾಮಗಾರಿಗೆ ಮೂರ್ತ ಸ್ವರೂಪ ನೀಡಬೇಕೆಂಬುದು ಸ್ಥಳೀಯರ ಆಶಯ. ಇನ್ನು ಈ ಭಾಗದಲ್ಲಿ ದೊಡ್ಡ ಕೈಗಾರಿಕೆಗಳಿಲ್ಲ. ಹೀಗಾಗಿ ಪ್ರತಿವರ್ಷ ಸಹಸ್ರಾರು ಮಂದಿ ಕೆಲಸ ಅರಸಿ ಗುಳೆ ಹೋಗುವುದು ಸಾಮಾನ್ಯ. ಇದಕ್ಕೆ ಶಾಶ್ವತ ಪರಿಹಾರ ನೀಡಲು ಸರ್ಕಾರ ಉದ್ಯಮಿದಾರರನ್ನು ಈ ಕಡೆ ಸೆಳೆದು ದೊಡ್ಡ ಕೈಗಾರಿಕೆಗಳನ್ನು ಸ್ಥಾಪಿಸಬೇಕು. ಬಂಡವಾಳ ಹೂಡಿಕೆದಾರರು ಹುಬ್ಬಳ್ಳಿ, ಧಾರವಾಡವರೆಗೆ ಸೀಮಿತವಾಗುತ್ತಿದ್ದಾರೆ. ಅವರನ್ನು ಕಲಬುರಗಿ, ಬೀದರ್ ಕಡೆ ಸೆಳೆಯುವ ಕೆಲಸ ಸರ್ಕಾರ ಮಾಡಿದರೆ ಬರುವ ಕೆಲ ವರ್ಷಗಳಲ್ಲಿ ಸ್ಥಿತಿ ಬದಲಾಗಬಹುದು.
