ಧರಣಿಗೆ ತಂಪೆರೆದ ರೋಹಿಣಿ ಮಳೆ

ಮೇ 25ರಂದು ಆರಂಭವಾಗಿರುವ ರೋಹಿಣಿ ಮಳೆ ನಕ್ಷತ್ರವೂ ಭರ್ಜರಿ ಮಳೆಯೊಂದಿಗೆ ಆರಂಭವಾಗಿದ್ದು, ಇಡೀ ಜಿಲ್ಲೆಯ ಎಲ್ಲೆಡೆ ಸುಮಾರು ನಾಲ್ಕೆ$ದು ಗಂಟೆ ಮಳೆ ಸತತವಾಗಿ ಸುರಿದಿದ್ದು, ನಗರದಲ್ಲಿ ಚರಂಡಿಗಳು ತುಂಬಿ, ವಿವಿಧ ವೃತ್ತಗಳು ಜಲಾವೃತ್ತವಾಗಿದ್ದವು.

ನಸುಕಿನ ಜಾವ ಐದು ಗಂಟೆ ಸುಮಾರಿಗೆ ಆರಂಭವಾದ ಮಳೆಯೂ ಸುಮಾರು 9ಗಂಟೆವರೆಗೆ ನಿರಂತರವಾಗಿ ಜಿಟಿಜಿಟಿಯಾಗಿ ಮುಂದುವರಿಯಿತು. ಮಧ್ಯಾಹ್ನ ಸುಮಾರು 1ಗಂಟೆವರೆಗೆ ಮೋಡ ಕವಿದ ವಾತಾವರಣವಿದ್ದು, ಬೆಳಗ್ಗೆ ಕೆಲ ಗಂಟೆ ಜನರು ಹೊರಬರದಂತೆ ಮಳೆ ತಡೆಯಿತು.

ನಗರದ ಗೋಲ್ಡ್​ ಹಬ್​ ಎದುರು, ಆನಂದ ಹೊಟೇಲ್​ ವೃತ್ತ, ಜೇವರ್ಗಿ ಕ್ರಾಸ್​, ಲಾಲ್​ಗೇರಿ ಕ್ರಾಸ್​ ಬಳಿ, ಶಹಾಬಜಾರ್​ ಚೌಕ್​ನಿಂದ ಆಳಂದ ಚೆಕ್​ ಪೋಸ್ಟ್​ವರೆಗೆ, ಸಿದ್ದರಾಮೇಶ್ವರಿ ಕಾಲನಿ, ಹಳೇ ಜೇವರ್ಗಿ ರಸ್ತೆಯ ರೈಲ್ವೆ ಕೆಳಸೇತುವೆ ಸೇರಿ ವಿವಿಧೆಡೆ ನೀರು ಸಂಗ್ರಹವಾಗಿ ಜನರು ಓಡಾಟಕ್ಕೆ ತೊಂದರೆಯಾಯಿತು.

ಕಲಬುರಗಿ ನಗರ, ಸೇಡಂ, ಕಾಳಗಿ, ಚಿಂಚೋಳಿ, ಆಳಂದ, ಚಿತ್ತಾಪುರ, ಜೇವರ್ಗಿ, ಅಜಲಪುರ ಸೇರಿ ಭಾಗಶ@ ಇಡೀ ಜಿಲ್ಲೆಯಲ್ಲಿ ಮಳೆ ಸುರಿದಿದ್ದು, ವಿವಿಧೆಡೆ ಸಿಡಿಲು ಬಿದ್ದಿದ್ದು, ಕೆಲವು ಗ್ರಾಮಗಳಲ್ಲಿ ಭಾರಿ ಪ್ರಮಾಣದಲ್ಲಿ ನೀರು ಹರಿದು, ಸಮಸ್ಯೆ ಉಂಟು ಮಾಡಿತ್ತು.