ಕಲಬುರಗಿ ಜಿಲ್ಲೆಯಲ್ಲಿ ಕೋಲಿ ಸಮಾಜದ ನಿರಂತರ ಹಲ್ಲೆ : ಬೃಹತ್​ ಪ್ರತಿಭಟನೆ

ನಗರದ ಸರ್ದಾರ್​ ವಲ್ಲಭಭಾಯಿ ಪಟೇಲ್​ ವೃತ್ತದಿಂದ ಜಿಲ್ಲಾಧಿಕಾರಿಗಳ ಕಚೇರಿಯವರೆಗೆ ನೂರಾರು ಜನರು ಬೃಹತ್​ ಪ್ರತಿಭಟನಾ ಮೆರವಣಿಗೆ ಮೂಲಕ ಆಗಮಿಸಿ, ಜಿಲ್ಲಾಧಿಕಾರಿ ಮೂಲಕ ರಾಜ್ಯಪಾಲರಿಗೆ ಮತ್ತು ಸರ್ಕಾರಕ್ಕೆ ಮನವಿ ಪತ್ರ ಸಲ್ಲಿಸಿದರು.

ಅಫಜಲಪುರ ತಾಲೂಕಿನ ದೇವಲಗಾಣಗಾಪುರದಲ್ಲಿ ಜು.24ರಂದು ಆಟೋ ಚಾಲಕ ದತ್ತು ಖರ್ಚಿ (ಮಾಗಣಗೇರಿ) ಮೇಲೆ ದುಷ್ಕರ್ಮಿಗಳು ಭೀಕರ ಹಲ್ಲೆ ನಡೆಸಿದ್ದು, ಯುವಕ ಸಾವು ಬದುಕಿನ ಮಧ್ಯೆ ಹೋರಾಡುತ್ತಿದ್ದಾನೆ. ಯುವಕನ ಚಿಕಿತ್ಸಾ ವೆಚ್ಚವನ್ನು ಜಿಲ್ಲಾಡಳಿತ ಭರಿಸಬೇಕು, ಸಂತ್ರಸ್ತ ಯುವಕನಿಗೆ 25 ಲಕ್ಷ ರೂ. ಪರಿಹಾರ ನೀಡಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು.

ಮುಖಂಡ ಅವ್ವಣ್ಣ ಮ್ಯಾಕೇರಿ ಮಾತನಾಡಿ, ಜಿಲ್ಲೆಯಲ್ಲಿ ಕೋಲಿ ಸಮಾಜದವರ ಮೇಲೆ ನಿರಂತರ ಹಲ್ಲೆ, ಅತ್ಯಾಚಾರ ನಡೆಯುತ್ತಿವೆ. ಜಿಲ್ಲಾ ಉಸ್ತುವಾರಿ ಸಚಿವರ ಹೆಸರು ಹೇಳಿಕೊಂಡು ಅಟ್ರಾಸಿಟಿ ಕೇಸ್​ ಹಾಕುವ ಬೆದರಿಕೆ ಒಡ್ಡಲಾಗುತ್ತಿದೆ. ಕೋಲಿ ಸಮಾಜದವರನ್ನು ಅಜಲಪುರ, ಜೇವರ್ಗಿ, ಚಿತ್ತಾಪುರ, ಕಲಬುರಗಿ ಸೇರಿ ಎಲ್ಲೆಡೆ ನಿರಂತರವಾಗಿ ಹಲ್ಲೆಗಳಾಗಿವೆ, ಕೊಲೆಗಳಾಗಿವೆ. ಕಿರುಕುಳ ನೀಡಲಾಗುತ್ತಿದ್ದು, ಇದಕ್ಕೆ ಕಡಿವಾಣ ಹಾಕಬೇಕು ಎಂದು ಮನವಿ ಮಾಡಿದರು.

ಬಂದರವಾಡ ಗ್ರಾಮದ ವಿದ್ಯುತ್​ ಅವಘಡ ಸಂತ್ರಸ್ತ ಲಕ್ಷ್ಮಣ ಕೇಳಕರ ಎರಡು ಕೈ ಕಳೆದುಕೊಂಡಿದ್ದು, ಪರಿಹಾರಕ್ಕೆ ವರ್ಷಗಟ್ಟಲೇ ತಿರುಗಾಡಿದರೂ ಸ್ಪಂದಿಸುತ್ತಿಲ್ಲ. ಜಿಲ್ಲೆಯಲ್ಲಿ ದಿನಕ್ಕೊಂದು ನೆಪ ಹೇಳಿ ತಳವಾರ ಸಮುದಾಯದವರಿಗೆ ಎಸ್​ಟಿ ಪ್ರಮಾಣ ಪತ್ರ ವಿತರಿಸದೇ ಸತಾಯಿಸಲಾಗುತ್ತಿದೆ ಎಂದು ಕಿಡಿಕಾರಿದರು.

ಮುಖಂಡರಾದ ಶರಣಪ್ಪ ತಳವಾರ, ಬಸವರಾಜ ಸಪ್ಪಣಗೋಳ, ಬಸವರಾಜ ಬೂದಿಹಾಳ, ವಿದ್ಯಾಧರ ಮಂಗಳೂರ, ರಮೇಶ ನಾಟೀಕಾರ, ಮಲ್ಲಿಕಾರ್ಜುನ ಎಮ್ಮನೂರ, ಸೂರ್ಯಕಾಂತ ಚೀರಾದ, ರಮೇಶ ಜಮಾದಾರ, ರಾಕೇಶ ಜಮಾದಾರ, ಸಂತೋಷ ಕೋಲಿ ಹಾಗೂ ಪ್ರೇಮ್​ ಕೋಲಿ, ಪ್ರೇಮ ಜಮಾದಾರ, ಪ್ರವಿಣ ಜಮಾದಾರ ಇತರರಿದ್ದರು.