ಇಡೀ ಕಟ್ಟಡ ಶಿಥಿಲ, ಜೀವ ಭಯ: ಸರ್ಕಾರಿ ಬಾಲಕಿಯರ ಪದವಿಪೂರ್ವ ಕಾಲೇಜಿನ ನೂತನ ಕಟ್ಟಡವೂ ನಾಲ್ಕೆದು ವರ್ಷದ ಹಿಂದೆಯೇ ಲೋಕಾರ್ಪಣೆಯಾಗಿದ್ದು, ನಿರ್ಮಿತಿ ಕೇಂದ್ರದಿಂದ ನಿರ್ಮಿಸಲಾಗಿದೆ. ನಾಲ್ಕು ಅಂತಸ್ತಿನ ಇಡೀ ಕಟ್ಟಡದ ಎಲ್ಲೆಂದರಲ್ಲಿ ಬಿರುಕು ಬಿಟ್ಟಿದ್ದು, ಚಾವಣಿಯೂ ಯಾವುದೇ ಸಂದರ್ಭದಲ್ಲಿ ಬೀಳಬಹುದಾಗಿದೆ. ಶುಕ್ರವಾರ ಕಾಲೇಜಿನ ಕೋಣೆ 18ರಲ್ಲಿ ದುರಂತ ಸಂಭವಿಸಿತ್ತು. ಎರಡು ವರ್ಷದ ಹಿಂದೆ ಕೋಣೆ 17ರಲ್ಲಿ ಚಾವಣಿ ಕುಸಿದಿತ್ತು. ಅಲ್ಲಿಯೇ ಬೋಧನೆ ಮುಂದುವರಿಸಲಾಗಿತ್ತು. ಕೆಳ ಅಂತಸ್ತಿನ ಕೋಣೆ 4ರಲ್ಲಿ ಗೋಡೆಯೂ ಉಬ್ಬಿ ನಿಂತ್ತಿದ್ದು, ವಿದ್ಯಾರ್ಥಿನಿಯರನ್ನು ಗೋಡೆಯಿಂದ ದೂರ ಕೂಡಿಸಿ, ಪಾಠ ಮಾಡಿಸುತ್ತಿದ್ದೇವೆ ಎಂದು ಉಪನ್ಯಾಸಕರು ಭೀತಿ ತೋಡಿಕೊಂಡರು. ನಾಲ್ಕು ಅಂತಸ್ತಿನ ವಿವಿಧ ಕೋಣೆಗಳಲ್ಲಿ ಗೋಡೆ ಬಿರುಕು ಬಿಟ್ಟಿದ್ದು, ಯಾವುದೇ ಕ್ಷಣದಲ್ಲಿ ಇಡೀ ಕಟ್ಟಡ ಕುಸಿಯುವ ಸಾಧ್ಯತೆ ಇದೆ ಎಂದು ಉಪನ್ಯಾಸಕರು ಅಳಲು ತೋಡಿಕೊಂಡರು.
