ಕಲಬುರಗಿಯಲ್ಲಿ ಗೋವುಗಳ ಅನುಮಾನಾಸ್ಪದ ಸಾವು: ವಿಷವುಣಿಸಿದ ಅನುಮಾನ

ತಾಂಡಾದಲ್ಲಿ ಸುಮಾರು 150 ಜಾನುವಾರುಗಳನ್ನು ಲಂಬಾಣಿ ಸಮುದಾಯದವರು ಸಲಹುತ್ತಿದ್ದು, ಕಳೆದ ಎರಡು ದಿನದಲ್ಲಿ ಬದ್ಲಾಬಾಯಿ ರಾಠೋಡ, ದಾನಾಬಾಯಿ ಚವ್ಹಾಣ್​, ಸಕ್ಕುಬಾಯಿ ಧನಸಿಂಗ್​ ಅವರ ನಾಲ್ಕು ಜಾನುವಾರು ಮೃತಪಟ್ಟಿವೆ. ಅದಕ್ಕು ಮುನ್ನವೂ ಎರಡು ಜಾನುವಾರು ಮೃತಪಟ್ಟಿವೆ ಎಂದು ಸ್ಥಳಿಯರು ತಿಳಿಸಿದ್ದಾರೆ.

ಬೆಳಗ್ಗೆ ತಿರುಗಾಡಲು ಬಿಡುತ್ತಿದ್ದು, ಎಲ್ಲೆಂದರಲ್ಲಿ ಆಕಳುಗಳ ಸಾವು ಸಂಭವಿಸುತ್ತಿದೆ. ಸ್ಪಷ್ಟ ಕಾರಣ ತಿಳಿಯದೇ ಗೋ ಸಾಕುವವರು ಸಂಕಷ್ಟಕ್ಕೆ ಈಡಾಗಿದ್ದಾರೆ. ವಾರದಿಂದ ಗೋವುಗಳು ಸಾವು ಸಂಭವಿಸುತ್ತಿದೆ. ಸ್ವಸ್ಥ, ಆರೋಗ್ಯದಿಂದ ಗೋವುಗಳು ಬೆಳಗ್ಗೆ ಮನೆಯಿಂದ ಹೋಗುತ್ತಿದ್ದು, ಹೊಟ್ಟೆ ಉಬ್ಬಿದ ಸ್ಥಿತಿಯಲ್ಲಿ ಮೃತಪಟ್ಟು ಬೀಳುತ್ತಿವೆ. ಇನ್ನು ಕೆಲವು ಸಹಜ ಸ್ಥಿತಿಯಲ್ಲೇ ಮೃತಪಟ್ಟಿವೆ ಎಂದು ಗೋವನ್ನು ಕಳೆದುಕೊಂಡವರು ತಿಳಿಸಿದ್ದಾರೆ.

ಗುರುವಾರವೂ ಗೋವು ಮೃತಪಟ್ಟಿದ್ದು, ಸ್ಥಳಿಯರು ಪೊಲೀಸರು, ಪಶು ಸಂಗೋಪನಾ ಇಲಾಖೆ ಅಧಿಕಾರಿಗಳನ್ನು ಕರೆಸಿ, ಪರಿಶೀಲಿಸಲು ತಿಳಿಸಿದ್ದಾರೆ. ಗುರುವಾರ ರಾತ್ರಿ ಪೊಲೀಸರು, ಪಶು ಸಂಗೋಪನಾ ಇಲಾಖೆ ಅಧಿಕಾರಿಗಳು ಭೇಟಿ ನೀಡಿ, ಪರಿಶೀಲಿಸಿದ್ದು, ಕಾರಣ ತಿಳಿಯಬೇಕಿದೆ.