ಲೋಕನಾಯಕ ಭೀಮಣ್ಣ ಖಂಡ್ರೆ ಇನ್ನಿಲ್ಲ

ಬೀದರ್: ದೇಶದ ಸ್ವಾತಂತ್ರ್ಯ, ಹೈ-ಕ ವಿಮೋಚನೆ, ಕರ್ನಾಟಕ ಏಕೀಕರಣ ಚಳವಳಿಯಲ್ಲಿ ಸಕ್ರಿಯ ಪಾಲ್ಗೊಂಡ ಹೋರಾಟಗಾರ, ಮಾಜಿ ಸಚಿವ ಡಾ.ಭೀಮಣ್ಣ ಖಂಡ್ರೆ (102) ಶುಕ್ರವಾರ ನಿಧನ ಹೊಂದಿದರು.

ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದ ಅವರು ಶುಕ್ರಬಾಯ ರಾತೆ 11ಕ್ಕೆ ಕೊನೆಯುಸಿರೆಳೆದರು. ಜಿಲ್ಲಾ ಉಸ್ತುವಾರಿ ಸಚಿವ ಈಶ್ವರ ಖಂಡ್ರೆ, ಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಅಮರ ಖಂಡ್ರೆ, ಇಬ್ಬರು ಪುತ್ರಿಯರು ಸೇರಿ ಅಪಾರ ಬಂಧು ಬಳಗ, ಅಭಿಮಾನಿಗಳನ್ನು ಅಗಲಿದ್ದಾರೆ.

ಡಾ.ಖಂಡ್ರೆ ಕರುನಾಡಿನ ಅಪರೂಪದ ರಾಜಕೀಯ ಮುತ್ಸದ್ಧಿ. ದಿಗ್ಗಜ ನಾಯಕ. ರಾಜ್ಯದ ಬೆರಳೆಣಿಕೆಯ ಮೊದಲನೇ ತಲೆಮಾರಿನ ನೇತಾರರಲ್ಲಿ ಖಂಡ್ರೆ ಹೆಸರು ಅಗ್ರಪಂಕ್ತಿಯಲ್ಲಿ ಅಚ್ಚೊತ್ತಿದೆ. ಇವರ ಅಸಾಮಾನ್ಯ ಸಾಧನೆ ಭಾಲ್ಕಿಯಿಂದ ದಿಲ್ಲಿವರೆಗೂ ವ್ಯಾಪಿಸಿದೆ. ಇವರ ಶ್ರೇಷ್ಠ ವಿಚಾರ, ಮೌಲಿಕ ಚಿಂತನೆ, ಸಮಾಜವಾದಿ ಸಿದ್ಧಾಂತ, ಜನಸೇವೆಗಾಗಿ ಮಿಡಿದ ಹೃದಯ, ಸರಳ ವ್ಯಕ್ತಿತ್ವವನ್ನು ವಿರೋಗಳು ಸಹ ಮೆಚ್ಚುತ್ತಾರೆ. ಹೀಗಾಗಿ ಲೋಕನಾಯಕ ಮಾತ್ರವಲ್ಲ, ಅಜಾತಶತ್ರು ನಾಯಕರೂ ಹೌದು.

ರಾಜಕೀಯ, ಸಾಮಾಜಿಕ, ಸಹಕಾರ, ಶೈಕ್ಷಣಿಕ, ಧಾರ್ಮಿಕ ಹೀಗೆ ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸಿ ಅವಿಸ್ಮರಣೀಯ ಕೊಡುಗೆ ಕೊಟ್ಟ ಖಂಡ್ರೆ ಅವರು ಬಸವಭೂಮಿ ಕಲ್ಯಾಣ ನಾಡಿನ ಹೆಮ್ಮೆಯ ಪುತ್ರ.

ಶಿವಲಿಂಗಪ್ಪ ಖಂಡ್ರೆ ಮತ್ತು ಪಾರ್ವತಿಬಾಯಿ ಉದರದಲ್ಲಿ ಜನಿಸಿದ ಡಾ.ಭೀಮಣ್ಣ ಖಂಡ್ರೆ ಅಪ್ರತಿಮ ಹೋರಾಟಗಾರ. ಸಮಾಜವಾದಿ ಸಿದ್ಧಾಂತಕ್ಕೆ ಸೈ ಎಂದು ಜನಸೇವೆಗೆ ಬದುಕು ಮೀಸಲಿಟ್ಟವರು.

ಭೀಮಣ್ಣ ಖಂಡ್ರೆ 1953ರಲ್ಲಿ ಭಾಲ್ಕಿ ಪುರಸಭೆ ಅಧ್ಯಕ್ಷರಾಗಿ ಅನೇಕ ಕೆಲಸ ಮಾಡಿದರು. 1962, 1967, 1978, 1983ರಲ್ಲಿ ಭಾಲ್ಕಿ  ವಿಧಾನಸಭೆ ಕ್ಷೇತ್ರದ ಶಾಸಕರಾದರು. 1988 ಹಾಗೂ 1994ರಲ್ಲಿ ವಿಧಾನ ಪರಿಷತ್ಗೆ ನೇಮಕಗೊಂಡರು. 1992ರಿಂದ 1994ರವರೆಗೆ ವೀರಪ್ಪ ಮೊಯ್ಲಿ ಸರ್ಕಾರದಲ್ಲಿ ಸಚಿವರಾಗಿ ಸೇವೆ ಸಲ್ಲಿಸಿದರು. ಶಾಸಕ, ಸಚಿವರಾಗಿ ಖಂಡ್ರೆ ಮಾಡಿರುವ ಸಾಧನೆ ಹೇಳತೀರದಷ್ಟಿದೆ.  ಜಯಪ್ರಕಾಶ ನಾರಾಯಣ ಉತ್ತರದ ಲೋಕನಾಯಕರಾದರೆ, ಭೀಮಣ್ಣ ಖಂಡ್ರೆ ದಕ್ಷಿಣದ ಲೋಕನಾಯಕ ಎಂಬ ಖ್ಯಾತಿ ಗಳಿಸಿರುವುದು ವಿಶೇಷ.