ರವಿ ಗುತ್ತೇದಾರ್​ ಕೊಲೆ: ಐವರು ಕೊಲೆ ಆರೋಪಿಗಳ ಬಂಧನ

ನರೋಣಗಲ್ಲಿಯ ಅಬ್ದುಲ್​ ಇಮ್ತಿಯಾಜ್​, ಛೋಟಾ ರೋಜಾದ ಅಬ್ದುಲ್​ ಸಮೀರ, ಯಾದುಲ್ಲಾ ಕಾಲನಿಯ ಮೊಹ್ಮದ್​ ಸರ್ರಾಜ್​, ಹೈದರಾಬಾದ್​ನ ಮೊಹ್ಮದ್​ ಖಲೀಲ್​, ಮಿಲತ್​ ನಗರದ ಮೊಹ್ಮದ್​ ಸಿಯೋದ್ದೀನ್​ ಬಂಧಿತ ಆರೋಪಿಗಳು. ಬಂಧಿತರಿಂದ ಆಟೋ ರಿಾ, ಚಾಕುಗಳನ್ನು ಜಪ್ತಿ ಮಾಡಲಾಗಿದೆ.

ಸೋಮವಾರ ನಸುಕಿನ ಜಾವ ನಗರದ ಆದರ್ಶ ನಗರದ ನಿವಾಸಿ, ಟೀ ಪಾಯಿಂಟ್​ ಕೆಲಸಗಾರ ರವಿ ಗುತ್ತೇದಾರ್​ನನ್ನು ಬಾರ್​ವೊಂದರ ಬಳಿ ಮಾರಕಾಸ್ತ್ರಗಳಿಂದ ಬರ್ಬರ ಹಲ್ಲೆ ಮಾಡಿ, ಕೊಲೆ ಮಾಡಿದ್ದರು. ಹಳೇ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೊಲೆ ಮಾಡಲಾಗಿದೆ ಎಂದು ಕುಟುಂಬಸ್ಥರು ಅನುಮಾನ ವ್ಯಕ್ತಪಡಿಸಿದ್ದರು. ಈ ಕುರಿತು ಎಂಬಿ ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.

ಎಸಿಪಿ ಶಿವನಗೌಡ ಪಾಟೀಲ್​, ಪಿಐ ಖಾಜಾ ಹುಸೇನ್​ ನೇತೃತ್ವದಲ್ಲಿ ಸಿಬ್ಬಂದಿ ರಾಜಕುಮಾರ ಟಾಕಳೆ, ದಸ್ತಯ್ಯ, ಸಂತೋಷ, ನಾಗರಾಜ, ಮಹೇಶ, ಕಾಶಿರಾಮ ಅವರ ತಂಡ ಕಾರ್ಯಾಚರಣೆ ನಡೆಸಿ, ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ ಎಂದು ನಗರ ಪೊಲೀಸ್​ ಆಯುಕ್ತ ಡಾ.ಶರಣಪ್ಪ ಎಸ್​.ಡಿ.ಶ್ಲಾಘಿಸಿದ್ದಾರೆ.