ಕರೊನಾ ಲಾಕ್ಡೌನ್ನಿಂದಾಗಿ ಆರ್ಥಿಕ ಹೊಡೆತಕ್ಕೆ ಸಿಲುಕಿದ್ದ ರಾಜ್ಯದ ಸಣ್ಣ, ಮಧ್ಯಮ ಮತ್ತು ಬೃಹತ್ ಕೈಗಾರಿಕೆಗಳಿಗೀಗ ಕಚ್ಚಾವಸ್ತುಗಳ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ಕೈಗಾರಿಕೆಗಳಲ್ಲಿ ಬಳಸುವ ಎಲ್ಲ ಲೋಹದ ಕಚ್ಚಾ ವಸ್ತುಗಳ ಬೆಲೆ ವರ್ಷದಲ್ಲಿ ಶೇ.20 ರಿಂದ ಶೇ.40 ದುಬಾರಿಯಾಗಿದೆ. ಇದರ ಪರಿಣಾಮವಾಗಿ ಕೈಗಾರಿಕೆಗಳ ವಾರ್ಷಿಕ ಉತ್ಪಾದನೆ ಅರ್ಧಕ್ಕರ್ಧ ಕುಂಠಿತವಾಗಿದೆ. ಕಚ್ಚಾವಸ್ತುಗಳ ಕೃತಕ ಅಭಾವ ಸೃಷ್ಟಿಸುತ್ತಿರುವ ಆರೋಪಗಳೂ ಕೇಳಿ ಬಂದಿರುವುದರಿಂದ ಸಿದ್ಧವಸ್ತುಗಳ ಕೊರತೆಯಾಗುವ ಮುನ್ಸೂಚನೆ ಸಿಕ್ಸಿದೆ. ರಾಜ್ಯದಲ್ಲಿ ಕರೊನಾಕ್ಕೂ ಮುನ್ನ, ಕೈಗಾರಿಕೆಗಳಲ್ಲಿ ಬಳಸುವ ಕಚ್ಚಾವಸ್ತುಗಳ ಬೆಲೆಯಲ್ಲಿ ಸಣ್ಣಪುಟ್ಟ ಏರಿಳಿತ ಕಂಡುಬರುತ್ತಿತ್ತು. ಆದರೆ, ಕೋವಿಡ್ 1ನೇ ಅಲೆಯ ಲಾಕ್ಡೌನ್ ವೇಳೆ ಲೋಹ ಕಚ್ಚಾವಸ್ತುಗಳ ಬೆಲೆ ಗಗನಕ್ಕೇರಿತ್ತು. ಬಳಿಕ ಬೆಲೆ ಇಳಿಕೆ ಆಗಲಿಲ್ಲ. ಕೋವಿಡ್ 2ನೇ ಅಲೆಯ ನಂತರ ಪುನಃ ಶೇ.40 ದರ ಹೆಚ್ಚಳವಾಗಿದೆ. ಕಬ್ಬಿಣ, ಉಕ್ಕು, ಅಲ್ಯೂಮಿನಿಯಂ, ತಾಮ್ರ, ಹಿತ್ತಾಳೆ, ಕಂಚು ಹೀಗೆ ಎಲ್ಲವೂ ದುಬಾರಿಯಾಗಿದ್ದು, ಉದ್ಯಮ ನಡೆಸುವುದಕ್ಕೆ ತೊಂದರೆಯಾಗಿದೆ. ಹೀಗಾಗಿ, ವ್ಯಾಪಾರೋದ್ಯಮಿಗಳೊಂದಿಗೆ ಕೈಗಾರಿಕೆ ಮಾಲೀಕರು ಮಾಡಿಕೊಂಡ ಒಪ್ಪಂದದಂತೆ ಸಿದ್ಧವಸ್ತು ಪೂರೈಸಲು ಸಾಧ್ಯವಾಗುತ್ತಿಲ್ಲ.
